Siatvat zu a ciam pak Zomite ~ Lengtong Pauno

Siatvat zu a ciam pak Zomite ~ Lengtong Pauno

Kei mahmah a kipan Zomi akua maciat in i lungsim ngaihsutna luite nusia in ngaihsutna thak/ lungsim thak tawh mainawt ta ni cih kammal tawmkhat tawh akua maciat hong hanthawn nuam ing .Hih thu pen kei mahmah ii ngaihsutna lungsim agennuam kahi a, kei tawh akibang zong om kha thei ding ahih teh ci in deihsakna tawh hong gelh ka hi hi. Ei’ Zomi atamzawte’ ngaisutna kei’ muh danah, i mailam ading sangin abeisa/ hun beisa thu le la tawh i buaizaw thei hi. Mualliamsa hunte samkik/lakik thei leng maw!

Topa nang’ ading zangh nuam siing ci-in la i phuak a, i neihlai hunte lah Topa’ ading i zat sawm tuankei hi. A beisa hunte Topa i pia toto a, i neih lai hunte i pia ngam kei hi. A sisa i nu i pate ngai in lungzuan’lawh in la i phuah thei a, ahi zongin a nungta laite lah i ki-it sawm tuan kei hi.

Nu le pa nei lai te’n zong a it siam kitamlo napi hongsi taktak le uh la aphuah nuam kitam mahmah zeel hi. I nu i pa i it ding pen asih ngak hi leeng kilawm liang kasak hun bang om hi. Hun beisa sunga i gentheihna, i haksatna teng gengen sutsut inah,…bangci mainawt ding,bangc i kalsuan’ding,bangci hanciam ding cih pen ngaihsut hun, geelna hun ki tawm neih mahmah in thei ing.Hunbeisa ah kilehkik cih omthei samlo ahihmain, ei pen, nunglam nga kawmsa aa mainawt (NUNGLAM NGAKAWMSA A, MAILAMAH BACK ) cih tawh ikibang hi.Mawtaw zong speed tawh back cih omtheilo ahihmanin, hunbeisa bekbek i buaipih manin i khantohna zekai hi.

Tua hi a, hun beisa i hih/tat khialhnate mai lamah khial nawnlo dingin, hong nusia sate sialsial nawn kei ni. I gentheih haksatnate sutsut nawn loin,hun beisate khempeuh kimangngilh bawl phot ni. I nunglam nga nawn loin i mai lam mah nga kawm sa in mainawt dih ni. Lungdamna lawpna leh lametna vive tawh i hunte zang limlim phot dih ni. Leilak bek en loin vantung lam nga kawm sa in kalsuansin dih ni. Topa’ maipha zong kawm sain nuntak sawm photphot dih ni. Tua bang hi le hang i leitang mahmah hong cidamin i nuntakna hong kilamdang dinga, i minam khangto in i Zogam hong paallun ding hi. Hih thute pen kei nuntakna mahmah tawh ka tuah khana (Experience) pan kong gelh khiat ahi hi.

Mai lam hun ding bel hong koici diam cih i gen thei peuh mah kei hi. A hi zongin tuni ciangciang i Kawlgam nuntak dan pen Tangho pheeltuun tawh kibang kasa hi. I lu i taw pan hong kihencip ahihmanin an le tui genloh huih nangawn sihlohna khop bek a hong kidiiksak himai hi. Tua bangin a kigentheihna sung pan ei Zomite kizawng phadiak lai mawk hi. A hi zongin Pasian theikha bilbel i hihna kiukiau hang bek tawh siatvatna angah kha lingleng i hi hi. Tua siatvat zu pen tutpih keii dinga hong piak zong hinai peuh mah loin hong ciamsak bek hipan hi. Tua Siatvatzu pen ataktak in Din’ sa a kiteep hiphot lai hi.

Ciapdan,omdan,gamtat kampau ziate i siam a hong pahtaak leh a Hai hong teep sak ding hi. I ciap khakbek zong akamtam nuam le ama paupau khawng om maalam leeng kilawm kasa hi. Tawm hong ciapsak bek zong nuamsa mahmah khin i hih teh, a Hai hong teepsak lai mawk leh tu a sang’ nuam i sazaw lai ding hi.

Siatvatzu i khamtak i teepkhit teh om dan, khawldan, gamtat kampau dante siam hong sak a, a ma pahtaak in i om theih ding kisam mahmah hi. Muan huai hong sa le piak huai hong sa dinga muan’tak cing hong sa leh piaktakcing hong sa ding hi. A hangin tu’n bel keem thei, zangthei, zeekthei ta in ciai ci a hong muan’mahmah ciang bekin Pasian in thupha taktak hong pia pan ding hi khiinkhian ei’ Guai!

Tua ahih manin tulaitak i dinmun ciang tawh kua mah kisusu, kiselsel loin, thupha piak tham dingin omdan siam photphot dih ni. Internet tawm i theih khak pen galdona thaltang bang danin kingaihsun kei mawk dih ni. Siatvatzu aciam kha hipan hanga, i khamtak a i neek ding zong om lai hi. A neekdan, adawn dan i siam nak le,a Thupha tampi ahi cipi a om ahi hi. Tuate i taan’ khak ding kidophuai lua mahmah ding hi ci-in deihsakna lianpi tawh hih lai kong glh khia hi. Laisim mimal kim Topan hong makaih ciat hen.

Lengtong Pauno
2011-05-14