Siamsin Medical Trip & Siamsin Summit: Zogam Paak-huanpi

Siamsin Medical Trip & Siamsin Summit: Zogam Paak-huanpi

Siamsin Medical Trip & Siamsin Summit te ah Pasian hehpihna tawh 4 vei ka kihel thei hi.

1st Buanli (Makaite nung zui, volunteer), 2nd Pimpih, 3rd Guasing (Medical – Convener), 4th Haiciin (Medical – Volunteer). Hih experience te pan in a ka mukhiat thu te Mipi theih pih ding in hong hawmsawn nuam ing.

Laigelhpa Ngimna –

1. Siamsin te,’ Nulepa te in mailam hun te ah zong “Hih a manpha Nahoihsepna” a kizop suak zawh nading panpih in tha ipiak theih nading (Moral Support)

2. A pua lam pan theician lo pi in upmawhthugen thei pawl khat hangin Siamsin te nasep kalsuanzia te tung ah mipi muhkhialhna a om loh nading (Clarification)

3. Hih dan nasephoih a sem nuam te ading thuvaihawmzia te hawmsawn na, (Technical Sharing)

Siamsin te nasepzia sung ah akihel THU te-

1.Thugeelna vaihawmna te ah Mihing khat/Makaipi khat ii cihcih dan in kigamta om lo in, vaipuak kiseh makaite mapang khopna (Collective Leadership) tawh akikalsuan ahi hi.

2.Ei panmuntek ah iseppih te tawh kipawl in na kisem khawm hi. (Team work)

3.Siamsin te in Zomi minam khat ihih hang, ei tawh akibang lo Universities, Major, pianna, omna khua le tui, upna, biakna pawlpi, behlephung, kampau awkaih, pilna, siamna a tuam tek a nei khangual mipih te tawh nasepkhopna kisin thei uh hi. (Unity in Diversity).

4.A kihel thei Siamsin Makai, volunteer-te, Siavuan Siamah te in Zogam a om a mipih te tawh kithuah thei in, nuntak khuasak zia sin theihna pan, Gam le nam ading deihsakna, lainatna, hanciam nopna thathak ngah uh hi. (Social Responsibility)

5.Post Trip hun te ah zong hih huntomno sung pan ki theih pih khak lawm te tawh kizopna nei toto thei uh hi. (Networking)

6.Siamsin te in undergraduate degree a zawh uh ciangin, nasepzonna, sangzopna, scholarship siauhna te ah hih bang in volunteer nasepah kihelna pan in tampi phattuam pih thei uh hi. (Volunteer Experience)

Siamsin te nasepzia sung ah akihel LO THU te-

Hih amanpha nahoihsepna pan –

1.Election politic tawh kisai Party khat ading thapiakna, thapiak lohnate, Biakna, Pawlpi Denomination, Kipawlna khat peuhpeuh or Mimal khat ading aituam hamphatna, minthanna a nei, a ngah ki om lo hi.

2.Kua mah in Mipi te mai ah makai te thupiak Title thulu losiah, “Personal promotion” te kigen lo hi.

3.Kua mah in hih nasephoihna te paulap in mimal min tawh koi mah sum kidong lo hi.

4.Organizer kumsim kikhel toto hi a, hih sung ah kihel man khak in, makaih manin, thaman, lai-ip, love-gift, commission cih tuamtuam te mimal angsung a ngah ki om lo hi.

Amun teel dan –

Siamsin Medical Trip in koi tak pai ding cih a teelna Criteria in Zogam sung ah khua neu pian, a tawng pian (hard to reach area) Zoto Siavuan Siamah te tun ding a haksatna mun te priority in kiteel hi.

Vaihawmna –
Zomi Siamsin Kipawlna – Universities of Myanmar pan in, Kumsim November in Siamsin Seminar, April kha in Medical Trip cih Annual Activity kinei a, Medical Trip paina ding mun pen November Siamsin Seminar sung a kibawl Makaipi te Meeting pan geelna (tentative) khua 2, 3 pan in tua Khuate Siamsin makai, upa hausa te feedback te gawm tuah in kiteel hi.

Bang hun akipai;

Kumsim April (Dota) kha, Kawl Tuibuahpawi, Sang khak sung in kipai hi.

Bang teng kisem:

• A. Siamsin Medical Trip
• 1. Free Medical Service (inntek khua le khua kiim khua paam)
• 2. Child Education(inntek khua naupang te)
• 3. Civic Education (inntek khua upate)
• 4. Community Survey (khuasung mipi te nuntak khuasakzia te kantelna)

Cih nampi 4 kisem hi.

A. Siamsin Summit sung ah;

1. Kawlgambup a om Zomi Siamsin Kipawlna tuamtuam pan in President le Chairman teng a tuam vilvel in thukikupna hi.

2. Hih sung ah Kawlgambup Siamsin te in amau muntek ah asepte, a tuah khak uh haksatna te, khat le khat kikupna le kitheihsakna, solution zon khopna te kinei hi.

3. November Seminar bawlna ding vaipuak sehna, geelna, khentatna te kinei hi.

4. Hih Siamsin Summit Meeting ah Panmunlen Siamsin te bek kihel thei uh a, midang Senior, Junior, Volunteer, Inntek cibangte kihel thei lo hi. Kongkhak ki-kalh Meeting nam ahi hi.

Medical Trip le Summit hoih tak in akibawl zawhna ding vaipuak a nei pi pen in Kawlgambup Siamsin Makaipi – Chairman/women le General Secretary, Convener te hi pha diak hi.

Kumsim March laivuanpi man phet in, mi te suakta in holiday la hiit hiat thei hitaleh Siamsin Makaipi te pen lungkham kipan ta uh hi. Budget koi tak pan ngah ding? Siavuan Siamah te kua teng hong kihel thei ding? Summit Meeting Agenda te a kim nai hiam? Inntek khua ah va van ma sa in inntek te tawh a vai te geel khol… Kua teng hong hong zui thei ding? Zatui koi ci leng ding? Mawtaw etc…

Budget pen Kumsim phial Innteek khuamite, ZIUSA te, GZA te in a mau hih theih zah panpih uh hi. Akisam lai teng pen Kalaymyo sung ah Siamsin makaite in mipih te inn tuamtuam ah vadong uh hi.

Ni 3-4 sung in Khua innteek te ading zin dona, Clinic honna, Naupang thusinna, Uham thusinna le nitak kihopna ding cih akipan vaipuak lianpi, beina tampi tawh a khua ua ading mapang khawm uh hi.

Ahaksapi pen in Siavuan Siamah te hong kihel theihna ding ahi hi. Hong kihel thei ding lamet Siavuan Siamah list te khat khit khat va hopih in hong kihel theih theih nading un ki sam ahi hi.

Siamsin Medical Trip zuih theihna ding, zumkhak holiday sung ahizong in, zato ki khak lo ahih manin duty kia kha te, duty laih ding a lem vet lo te, ei duty ah namdang lawm te zumkah sak, I tun kik ciang en va kah kik cih bang in a mau zong kipiakhiat uh hi. Tua ban ah, Biakinn Camp zuihnopna, innkuan tawh om hunpiakna cih te zong saikak kul hi. Siavuan, Siamah te a zui te in cina nong et-sak man un lungdamna ci in Nitawpni ciang in Siamsin pan lungdamkohna Laipi frame a golpi khat ngah thei uh hi.

Siamsin Medical Trip ah akisem Community Survey, Child Education, Civic Education te ading volunteer, resources person te zong sap kul hi. Naupang te tawh hoih tak akithuah thei ding te pen Pawlpi te in muanlesuan te zong an hi uh a, ngah theih ding haksa mahmah hi. Civic Education pen a Athu a theih bek hi lo in khuami te tel ding in a hilh theih te zon kul hi. Community Survey ading in, volunteer te in Question te hoih tak a dot theihna ding, inn a om zahzah kidong ahih man in, ni 2-3 sung in zawh nading haksa mahmah hi.

Siamsin Medical Trip le Summit in Zogam ah Kumsim April kha ciang, hong piang khia, a etlawm, a namtui Paak namkim te a cina, Paak-huan pi khat ahi hi.

Kumsim in hih nahoihsep pen haksatna tampi sung pan in akizom toto hi a, tukum 2018 hi leh Medical Trip pen a 8 veina hi ta a, Medical Trip hong piankhiatna Siamsin Summit Meeting ahi leh a 9 veina hong hi ta hi.

Kong zahtak Zomi ulenau te aw,

Hih dan Nahoihsepna pen mailam hun te ah lungnuam takin akibawl suak theih nading in, ihih theihna tek pan in Siamsin te panpihna, thapiakna kisam mahmah hi.

Thungetna te ah phawk pih ni. Sumlepai tawh piakkhiatna, Thulela tawh Vaihawmpih ni!

Panpih theihna i neih kei leh zong dai takin om hiit-hiatna tawh panpih tek ni!

Sin in, Sem in, Mainawt ni!

Dr. Siambawi
April 22, 2018