Siamsin anei kua?

Siamsin anei kua?

Kawlgamah “Siamsin” cih pen 1965 kumin Yangon Sangnaupangte Siamsinten a phuatkhiat uh kipawlna ahihi. Tuahunin kipawlna cih zangtheilo ahihmanin Zomi Siamsin Tangsum naci uh hi. Tuahunma in nitumnalam gam omten Siamsin Kipawlna naneikhin uhhi.

Zomi Siamsin Tangsum cihtawh Yangon sangnaupangten nalianpi tampitak nasemkhia uh hi. Tuate sungah 1966 kum in Zominam puan nabawl uh a, Tedim-Tonzang sungbek thamlo Zomite omna muntuamtuam ah nahawmkhia uhhi. 1968 kum ciangin Zomi Zingsol Magazine cih laibu hoih mahmahkhat nahawmkhia leuleu uhhi. Zomi sangnaupangsung nopna, dahna khempeuh ah naki uap liailiai uhhi.

Yangon khuapi ah Zomite kitam nailo ahihmanin sangnaupang sungsum zatding akisamte adingzong sum leitawisakzel uhhi. Kumsimin maithak muakna le mangpha khakna zong naneiden uhhi. Tulaitak Siamsin lapi ci a i sakdenzong tuahun a sangnaupangte phuah ahihi.

A hunhunin a kilaih toto Siamsin makaiten sangmansa U te thudotpi-in nei toto uh a, maban kizomto diamdiam hi. 1933 kum ciangin Yangon Siamsinten Ciimnuai Magazine Volume I cih laibu hoihmahmah khat hong hawmkhia leuleu uhhi. A kumkik cianginzong hawmkhia zolai uhhi. Hih Ciimnuai Magazine pen tunidong mahin Tedim-Tonzang sung sangkhempeuh phialah kimu theilaiding ka um hi.

Tu in ahihleh Yangon bek hinawnlo Kawlgamsung mun tuamtuam ah Siamsin Kipawlna om zihziah ta hi. Siamsin omna khuaciatpan a kilaihtoto makaiten thukizakna, nopna dahna kiuapna, maithak muakna le mangpha khakna, Excursion paina cihte kum simin kineitek ta hi.

2005-2006 laisinkum ciangin Siamsin U ten Siamsin omna khuateng hong gawmtuah uh a, Universities-Myanmar cih hong piangsak leuleu uhhi. Tuakum mahin Siamsin Seminar I Tedim khuapi ah i bawlzo hi. Tu in Seminar IV asawtloin Tonzang khuapi ah i bawllai ding hi. 2003-2004 laisin kumin Kalay University Siamsinten Ngeisok Magazine hong hawmkhia uhhi. 2006 kum ciangin Siamsin Magazine Volume I cih laibu hoih mahmah khat hong hawmkhia leuleu uh a, tu in Volume III dong i hawmkhiazo hi. 2009 khal sungin Magwe Siamsinte amau le amau hanciamin Medial Trip khamtungah pai uhhi.

Hihteng khempeuh i et takciang Siamsin mi masatepan kipan tunidong nasepnate hoih le thupi kasa mahmah hi. A hunzui-in a kilaihto makaite hanciamnazong thupi kasa hi. Sangkah kawm a, hun tampi piakhia, sumlepaai tampi a omlo sungpan vaihawm kankan uh ahihmanin pahtakhuai kasa mahmah hi. Ahizongin makaiten amau mualsuang ding le maipha ngahnang a nasem kuamah om dingin ka lamen kei hi. Hih nasepna khempeuh minam a itna tawh asepkhiat uh hidinghi cih ka lamen hi.

Tua ahih manin a beisa a Siamsin masate nasepna le kalsuanna tuamtuam te a hoih mahmah bangin hong pailaiding khangthak Siamsintenzong tua bangmah in kalsuanto laiding ka lamen hi. Siamsin mintawh nasepna khempeuh pen minam adingin akisem hicih kei muhna le ngaihsutna ahi hi. Khangthak Siamsinten zong i sepna khatpeuhtawh kei Siamsin a neipahing kici kei ni. Siamsin a nei pen minam hi kacici hi. Nang bang ci ngaihsut…..? Siamsin Awging