Siamah Dim Lun Mang maban ~ Lian Tuang

Siamah Dim Lun Mang maban ~ Lian Tuang

Siamah Lunpi nuntakna, nasepna le deihsaknate thupi sa banah a thuaknate lainatna zahtak piakna le maban om laite thapiakna in Sangmang S T Hau Go’ suak le khakte (ST Hau Go, foundition) panin 500,000 ks panpihna pia hi.

Mangno (Khutkhialpa’ tanu) pen 21 November nitak pawlpite hun bawl sungin inn pan na tai khia hi. A om loh lam a kitheih ciangin a neu a lian in kizong ngeingai hi. Ama vak theihna mun teng leh siamahnu han khawngah zong uh a, mu tuan lo uhi.

Tua bangin lungmangin a om lai tak uh 8:20 pm pawl in phone khat lut a akiho uh leh Mangno na hi mawk hi. Mangno in ” Nu aw, na lung himawh kei in. Ka buk ngei zelna ah na pai mai ning. Ka pate kiangah lah ciah kei ning. Tun Thangmual tungta ing” ci in a phone khiakik ziau hi ci hi.

Nu Mante in zong cihna dingdang thei tuan loin hausa upa le thuneite kiang thu om bangbang pulak uhi.

Nu Man tawh hun nuam la in ka kihoho thei zel uhi. Ama genna ah ka tanu u pen gamdang ah om a, a tun zawh sawt nailo ahih manin bangmah ong en zo lua nailo a, Siamah Lunpi zon sa bek mah tawh a nungta hi ung.

Ka tanu Lunpi in tu laitak maban lianpi thum khawng nei hi.

1- kei le anaute nih banah inn a om naupang 4 te nek le dawn silh le ten ding khempeuh ong van hi.

2-Cikha khua ah inn khat lam ding kipan hi. Tuivel zang khua pan tan li a zo peuhpeuh in sang a zop zawh hamtang nading ding cih a lunggulhna hi.

3- Inn ong ciah sim in Khai Kam Khua pan a kigamla lo mun khat ah telhawng lo eka 5 khawng kipan a, tu lai takin a cii ding a kaihkop san laitak hi.

Hih teng bel a mah lah om nawnlo aih teh bangteng ka zom zo uh tam thei nawn keng. Ka pasal in ong nusiat baih mahmah a, genthei hamsapi in a nungta ka hi uhi. Ka tanu lunpi bang aneu tunga kipan sep theih bangbang asep kawikawi manin lettama, payan, innzut khawng zong siam mahmah hi. Lo khawh singpuak bel gen vetloh hi lel hi.

Nasep kizen mahmah in a ihmut hun sim loh na semsem hi. Om mawk theilo hi. Tagah genthei lua mahmah ahih manin midangte zong lainat thei mahmah hi. Zuauna kineih khemnate zadah mahmah hi. A hoihlo amuh leh puahpah a, gen a kul leh gen pah lel hi. A lungsim nem in mi dangte lainat thei mahmah na pi kamsiam khollo pawl hi vet se hi. Kisam a sak bangin pau ziauzaiu thei lel hi. Kisam a sak keileh pau vetlo lel thei hi.

Amah pen nasep hanciam mahmah in hun awng a neih sunsun ciangin tukpeng zong kimawl den hi. Pahtawina zong tampi ngah hi. Sangsia a sep zawh ciangin tukpeng kimawlna bek hi loin Taii siamna (kilai siamna) zong nakpi takin sin beh lai hi.

Siamah Lunpi’ naute genna ah ka u pen ka u bek hi loin ka lawm zong hi a, ka pa zong ahi hi. Amah pen lai deih mahmah khat hi a, midangte ading zong deihsak mahmah hi. Laihilh uk mahmah khat hi a, ka neu tunga kipan inn ah lai ong hilh den hi. Kei bek loin ka lawm teng tawh ong hilh khawm den hi. Ama hilhna le makaihna mah tawh sang laite a zo toto hi ung ci uh hi.

Tu ni ( 24November) nitak lam in ZYA ( Tahan ) in tutpihna hun thupi takin bawl uh a, tua hun sung mah ah Sangmang S T Hau Go’ suak le khakte ( ST Hau Go, foundation ) te panpihna sum zong kipia thei hi. Lungdamna lianpi tawh, Liantuang (A sawt lua loin RFA Burmese pan Siamah Lunpi thu a kician takin ong dawk kik ta ding hi.)