Sepvet loh sang in ziakai na hoihzaw

Sepvet loh sang in ziakai na hoihzaw

Tu ma kum 10 lai in ihlungsim ah tua sem ding, tua suak ding,tua nei ding cihdan ih ngaihsut sa tu in ih etkik teh ih suah zawh loh, ihngah zawh loh bang teng a om hiam? Hanciam na pi in alungtup a tung zo lo zong tampi omding in ka um hi. Banghang hi mawk ahiam? Ih lunggulh nuntak na ah bang hang in tungzo lo mawk ih hi hiam? Pilna ki sam maw? Sum kisam maw? Hun ki sam maw? Hih teng thum hang in ihlung gulh na a tungzo lo tampi tak ki om a kei zong tua te lak ah khat ka hihi.

Tu in a beisa kum 10 lai a ih ngaihsut sa te hanciam lai leng a piangzo nawn lo taktak ding hiam? Ih nuntak na sung ah ziakai ih ki sak bang teng a om hiam? Hi ci bang in mawk nusiat ding ih hi hiam?Ih lunggulh na a tawp dong han ciam teta lai lo ding ih hihiam?Pilna sin ding in ih kum tam lua ta hiam? Kei ka kum tampi hi ta, pilna zon hun nawn kei na ki ci kha hiam? Sum zong ding in ih kum tam lua in sum zong zo nawn lo ih hi hiam? Ka kum tam lua ta in ka khan sung in a hau zo nawn lo ding ka hi ta ve na ki ci kha hiam? Ka khan sung inka lunggulh teng a nei zo nawn lo ding ka hi ta ve na ki ci kha hiam? Tua dan in ki ngaih sun ngei ngei kei in. Pil na ih zon vet loh sang in ih kum tam ta leh ih zonzon veve pen man nei in thu pi hi cih ka thei hi.. Hun om lai a, nang a ding in zingsang sim in nihong suak thak zel hi cih phawk in. Kei pen hai pha deuh ing, ki cian kei deuh ing, mi te tawh ki bang kei deuh ing cih dan khawng in nang leh nang ki ngaih sun kha mawk mawk kei in. Leitung ah mi khem peuh a ki bang hi a, huih diik khawm in a nungta khawm te ih hihi. Sepvet loh na sang in ziakai na in hoih zaw a, hunmaan tak a sep theih na in hoih zaw lai hi.

Sep zawh loh ding a ih ngaih sut sa, ih sep nop mah mah thu te ah kei hi zo kei ning ci lo a, maban ih phutteitei ding kadeih hi. Tai tultampi ih kalsuan na ding in kalkhat pan in ki pan hi cih ih theih sa mah bang in ziakai ih kisak khit na te, thu te ah ziakai nai keng ei ci in tha khauhsak semsem a, kal suan in dingtang kik ding hihang. Nidang in tua sem nuam ing ci in na lungkia a nasep nawn loh, maban na zop nawn loh bang zah na nei ngei khin hiam? Bangzah vei gual lel ngei na hiam? cih a thu pi hi lo a, na gual zawh na leh na lungtup na tunna in a thu pi hi zaw hi.

Mihing nuntak na ah ihhaksat na te ki gengen ni cileng ih lungsim ah tua haksat na in hongvial kik kik a hih manin ih haksat na te ki mang ngilh bawl siam ni. Haksat na tuak in bangzah vei ih puk zong in khat vei hoih tak a ih dintang kik na in man pha hi. Ih hun lui lai in sem man lo in, apiang thei lo ding a ih ngaihsut sa thu te in tu in apiang zo ding in ngaih sun ni. Hun lui sung ah lawp na,tupna khat peuh peuh nei in a tangtun zo lo ih hih leh tu mahmah in kitha khauh sak kik in, ki pankik ni. Naupang khat a pau thei lo ding a hih sang in a pau thei hak a hih leh thupi zaw lai hi. Lam a pai thei lo ding ahih sang in lam a pai thei hak a hihding thu pi zaw hi. A hih thei lo ding sang in a hih thei hak hoih zaw hi. Laisiangtho a sim ngei vet lo na hih sang in a sim hak na hih ding thu pi zaw hi. Topa Zeisu hih leitung ah hong kum nawn ding a hih sang in hong pai hak a hih pen ei a ding hoih zaw hi.Sepvet loh sang in ziakai na in hoih zaw hi cih phawk in.

Deih Tung