Malaysia ah Security asepkawm migilo tetawh akizom Philippines 7 kiman

Malaysia ah Security asepkawm migilo tetawh akizom Philippines 7 kiman

Malaysia gamsung ah Security Guard asepkawm in migilo tetawh akizomsim khinkhian, Philippines gammi 7 kiman ci’n zanni Thursday ni in Malaysian police te’n genkhia uhhi. Tua Philippines gammi tepen Malaysia gamsung ah Security Guard nasep sem uh a, ahi zongin asimtham in migilo tetawh akizom uh kici hi.

Philippines gamsungah mi manin sumtawh akitansak aminthang mahmah ahi Kidnap-for-ransom Abu Sayyaf Group (ASG) cih migilo tetawh hih Filipino Security Guard te kizopna omding kici hi.

Hih akiman Philippines gammi tepen pasal vive hi uh a, Sabah, Sandakan panin Passport atuh “fake” tawh Malaysia gamsung ah alut uhhi ci’n Police te’n genkhia hi.

Inspector-General of Police Mohamad Fuzi Harun in Statement ah agenkhiatna ah hih akiman tepen kum 22 leh 38 kikal hi uh a, Selangor leh Kuala Lumpur sungteng muntuamtuam ah Security Guard nasep asem uh cihi. Nungkalsung in muntuamtek pan amatkhiat uh ahihi.

Adiakdiak in kum 22 aphakhin khatpa pen abeisa in Southern Philippines gamsung ah miman in sumtawh akitansak ASG Kidnap tetawh kzom, kihelkha ngei cihi. Tuaban ah Philippine Military kumpi galtak tetawhzong buaina neingei cihi.

Khatpa leuleu pen Malaysia gamsung ah tuihawmkhia Company ahi Syabas Water Utility Company te kiangah nasemkhat ahihi. Akimat laitak in akhutsung ah bangmah hiamvan kimulo cihi.

Intelligence Source te genkhiatna ah hihbang in migilo tetawh akizom te’n Malaysia gamsung ah Security Guard aseptheih uhpen lauhuai mahmah hi. Amau hihna taktak ki selcip in, nasepkawm in gamsung toknawi theiding hi ci’n genkhia hi.

Adiakdiak in Security Guard cihtepen mipi te’n amuan uh, ahih keileh mipite banglokhat hileh ahuhding te hi uh a, tuabang mite pen migilo tetawh akizom, bekthamlo migilo te nahimawk uh ahih manin, ki patau mahmah hi.

Hih akiman Philippines gammi 7 te lakah abeisa SEA Games sungin Bukit Jalil National Stadium sungah buaina apiansaksawm, Attack abawlsawm zong kihel uh cimawk hi. SEA Games leh Malaysia Independence Day Ceremony hunsung in migilo te’n buaina bawlsawm uh himahleh kumpi thunei te’n ahunlap in mankhiathei uhhi.

Related: Aung San Suu Kyi Security apiading thautawi Bodyguards kibehlap

Security Guard ci’n ihmuan penpending tepen gal peuh nahihtuak mawk hi. “Deklam tuktum gal suakthei” ihmuan ihsuanding penpen tezong galpeuh nahimawk mate 🙂 Bitna hongpiading te galpeuh nahizaw, Gupkhiatna thu gending in gamdang azinkhia pawlkhat huhna ngen peuhzong nahithei khinkhian kici lailai ei. Sawltak #zomidaily