Sawlna (Inspiration)

Sawlna (Inspiration)

Pa in kei ong sawl bangin note zong ka ong sawl hi (John 20: 21)

Pawlpi khat ii vaipuak lian pen mission nasep ahi hi. Ih mission nasep nadingin Pawlpi in budget bangzah geel? Mission kuan dingte in Lai Siangtho a hilh thei hiam? Upna maan a pom hiam? A piangthak takpi mah hiam? Cihte a thupi mahmah ahih manin ngaihsun taka sep ding le awlmawh pen-a neih ding thupi mahmah hi. Missonary sem khat pen Jesuh Khrih ii sawlna ngah ahi hi. Mission nasepna ah mite’ deihna thupi masa lo a, Jesuh’ thupiakna thupi masa zaw hi. Mite ahih leh hauhna daupaina thupha thupha bekbek ahi hi. Inn le lo, ann le tui, nik le puan, pilna le siamna, minthanna le vangliatna (materialism & power) vive mite in lunggulh uh hi. Ahi zongin Jesuh’ thupiak ahih leh mikhempeuh nungzui hoih suak sak dinga, Pa Ta Kha min tawh baptize ding ahi hi. Pianthakna (born again) ahi hi. Ye must be born again. Na pianthak loh phamawh hi.

Mission nasep nadingin ih ngah sawlna (inspiration) pen a mailam pan kaihna hi loin ih nunglam pan sawlna ahi hi. Mai lam ah ih ngah theih ding Ordination, MC, Khasum, min le za, lawhcinna le gualzawhna cihte ii tawsawn sawlna (inspiration) hangin mission a kuan ih hih khak ding lunghihmawh huai mahmah hi. Tua banga a gamta kha ih hih leh “Aw, Topa nangmah mah in kei ong hawl in. Ong sawl in” ci-a, Tuiphum pa John bangin Topa adingin lampi a sial, Topa adingin na a sem taktak ih hih nadingin kipuahphat huai mahmah hi. Tua pen Sawlna maan (inspiration) taktak ahi hi. Topa pen ih nung pan hong hawl Pa ahih kul den hi. Tulai Mission nasepna ah mi tampi takte pen hauhna le daupaina (prosperity and wealth), lawhcinna le gualzawhna (success) thute in amai lam uh pan bawng nakpheh bangin kikai sak uh ahih manin Lungdamna thu a cih zong thei nawn lo bek loin, amau mahmah a Lungdam zo lote suak uh a, Gammial mite in Christiante hong um zo lo uh hi. Thuciam Thak sung mite in ahih leh Jesuh pen a nung uh ah koih in tua Thu kisawl sak bek uh hi. Tua thu mah suut le gen belin nei uh hi. Tua message (Lungdamna Thu) a gensiam, a puak siam, a hawm siam, dingin kisin huai ki-ap huai mahmah hi. Mission nasep nopna a hang pen Jesuh’ Sawlna ahih ding thupi penpen hi. Tua Jesuh pen nunglam pan thauvui bangin a henhen a tahtah in kidim sak ding thupi masa hi. Missionary pa pen thautang hi a, a nunga om Pa pen thauvui ahi hi. Tua ih thauvui pen Jesuh ahih leh thauvui pha zo bek ding hi. Jesuh pen ih nung pan ong sawlpa ong tawsawn Pa hih sakna le tua ong sawl Pa’ nasep citak taka ih sep ding pen Sawlna (command) ahi hi, cih a thakin phawk ciat ni. Sawlna na sem hiam?

Tulai hun in mission nasepna ah a lauhuai mahmah thu khat pen mite’ duh le deih bulphuh masak khakna ahi hi. Missionary pa in Topa’ sapna le Topa’ sawlna bangin gamta loin mite’ deihna le sapna, mitesuangdal zaknop le lunggulh daan thute tawh a pattah khak ding lauhuai mahmah hi. Topa’ ong sawlna thu mite’ sandan, duhdan le deihdan thute tawh sukphiat sak loh ding thupi mahmah hi. Mizawngte mihaite veina pen Kha mangthang veina hi nai lo hi. Mite’ kisap na guat sawm leh na guan zo dek suai kei dinga, na guat sunsun kitot lawh ding uh a, nang nangawn na minsia ding hi. Topa in ih deih ong guan lo a, ih kisap Jesuh a lian penpen letsong ong pia nuam masa ahi hi. Mite’ kisapna lian lua hi. A zawng a hai a mawl mite hehpih huai mahmah uh hi. Mite’ kisap huh zawh ding thupi hi (Support). Mite pilna pattah huai mahmah hi (Education). Ahi zongin Jesuh sawlna in mite lapsang gawp ding, pattah gawp ding hi pah lo zawin, Jesuh’ Sawlna Thu vei ding na hi masa zaw hi. “Note pai kawikawi unla, midang khempeuh keima’ nungzui mi suak sak un…” Hih thu pen Missionary te in a paina mun mite’ ci le sa sapnate a bulphuh luat uh ciangin hih Jesuh’ Sawlpina Thu pen kimang ngilh pahpah hi.

Innpi Lopi ih lam zongin ih Thupuak (the Message) a thanem leh mission ah lawhcinna maan taktak kimu zo lo kha ding hi. Mission nasepna ah hong tawsawn hong sem nuam sak Sawlna pen Jesuh le a Singlamteh (Jesus Christ and Him crucified) Thu ahi hi. Mite’ lungkim nading le eimau lam-et le ngaihsut tawm thute kinakpheh kaih sak loin Jesuh kihawl sak ding hi hang. Mite eimau nungzui suah sak ding hi lo a, Jesuh’ nungzui suah sak ding ahi hi. Missionary te pen Jesuh’ tawsawn Sawlna ngahte hi ta hen! Amen!!!

Evan. Suang Dal