Satan’ ngian ~ Tdkhen

Satan’ ngian ~ Tdkhen

Theih masak ding thu: Satan in hong thangsiah nadingin i theih nailohte hong zang hi lo hi. Ih theihsa lakah zong hoih i sak tengteng, i deih tengteng, i uukna leh i duh pente zangin thang hong siah kawikawi ahi hi. Hong thangsiahna vanzat, a thangkhau, a thangpeu, a antahte bang teng hipen hiam cih a pholak nuam ihi hi.

Satan’ thang i tel nadingin Pasian’ hong piak, a nisim-a i zat dente i gen masa ding hi. Banghanghiam cihleh Satan in a thak phuantawm lo hi. A kipatcilin zong vanzat a neilo-sa limlim ahi hi. Adam’ tung panin singgah pumkhat tawh nangah kha citciat ahih hang hi. Tua pen Singlamteh tungah Jesu in a vekin a sut kik khin zo hi. Satan in bangmah nei nawn lo hi. Nei nawnlo ahihmanin ngian a zang ahi hi. Kihtakhuai hetlo napi-in tua a ngian pilna pen eima’ geelna peuh hong sa sakin, a thangtual zang khawngah i kipak mahmah zaw lai hi. Gul in a nek ding zusa a mai-ah a dian leklek i bang hi.

Tua ahihmanin tua vanzatte i theih masak dingin a hoih hi. Pasian’ hong piak vanzat teng mah hong lehzat sak nuam hi. Tua vanzatte a kikoihna godown honna tawhtang pen, “Kammal” ahi hi. Tua tawhtang ahi, kammal mah tawh i thuphate hong zangkhial sak nuam mahmah hi.

Thupha kong honna tawhtang a zat dan:

1. Kam-a pulakna tawh gupna(nuntakna)kingah thei hi.

2. Kam-a pulakna tawh lungdamna, cidamna kingah thei hi.

3. Kam-a pulakna tawh hangsanna, gualzawhna kingah thei hi.

4. Kam-a pulakna tawh i mailam ding i ma kihong khol thei hi.

5. Kam-a(Jesu’ min)pulakna tawh thupha kikoihna Van godown tawhbu kihong thei hi.

Hih a tunga thuphate a kong honna pen, “Kam tawh pulakna” ahi hi. Tua pen Satan in kammal vangliatna na tel mahmah ahihmanin a thei nai lo, a phawk nai lote’ tungah vanzatin hong nei nuam hipah hi. Tua pen a theilote i kihilh kim ding a deih ihi hi.

Thusia kong honna tawhtang a zatdan:

1. A hau kimlai a zawn sak nopleh, mizawngte simmawh sak nuam.

2. A sang kimlai a kiatniam sak nopleh, a niamte nopneh sak nuam.

3. Khe cidam kimlai a baai sak nopleh, khebaite ko sak nuam.

4. Khut cidam kimlai a buih sak nopleh, khutbuite ko sak nuam.

5. Mit cidam kimlai a tawt sak nopleh, mitawte ko sak nuam.

6. Muk cidam kimlai a poi sak nopleh, muk-kate ko sak nuam.

7. Bil vakte a ngon sak nopleh, bilngongte ko sak nuam.

8. A utloh pen munah a din sak nopleh, mibang lo, gual banlote ko sak nuam.

9. Mihoih kimlai a siat sak nopleh, mihoihlote ko sak nuam.

10. Innkuan nuamte a siat sak nopleh, innkuan nuamlote ko sak nuam.

Khensat ding:

1. Jesu na taklamah tu cih thei in.

2. Satan na veilamah tu cih thei in.

3. Jesu’ lam nga-in thupha kong na hong thei hi.

4. Satan’ lam nga-in thusia kong na hong thei hi.

5. Na pulak bangbang a kipsak dingin taklam “To” leh veilam “to” na
neih lam phawk in.

6. Na pulak bangbang a sia a hi-a, a pha ahizongin, na thulu sungah kigelh pahpah cih phawk in. Tua thulu in na nuntak sung na om dan ding thulu ahi hi.

7. Thupha lam na gen ding a deih Jesu hi cih thei in.

8. Thusia lam na gen ding a deih Satan hi cih thei in.

9. Na pulak bangbang nang a’ hipahpah cih thei in.

10. Ih kampauna banga hong piangte san loh phamawh cih thei in. (Pau 18:21).

It khemna tel thei in:

1. Ih lawmte khat in van a lei ding kimlai, a niamno khatin i va deekpihleh, kilei theilo-in neihloh lawha, a zuakte in zong khotloh lawh hi.

2. A ngai theilo, a zatheilo khat thu va hilh thapai leng, ngai theilo semsemin i kitelkhial thei zaw lai hi.

3. Lawmte’ zatlohpi khat, e’n zangta-hang ci-in va hahpiak gawp leng, i nekngaihna pen kineubawlna a suak thei hi.

4. A mawh a khial mikhat hilh behbeh leng, ki gamla semsem zaw thei hi.

5. Melhoihna leh hauhna tawh ki-itna pen a kum nei zatui tawh kibanga, utlo pipi-a kikhen hun hong tung thei hi.

6. Maitaina leh kamsiamna tawh ki-itna pen hun hoih ki-itna hi a, hun hoihlo ki-itna i ki sam lai hi.

7. It ding, ngaih dingte it kha lo-a, it dang ngaih dangte itna pen gam lam manawh tawh kibang hi.

8. Innkuan dinmun in a citlohpi khat lawm i ngaihleh, tua mo man pen khantawn buaipih mo man hi kha ding hi.

9. Ki-it se-lua-a kihilh kitai ngamlohna pen, vun a let-lo puatham ki-itna bek hi-a, lingkhei’ ngamloh tawh kibang hi.

10. Kiguangkhual lua lianga cil luatna pen pumpi in thuaka, nuntak lai ci-a duhduh nekna zong pumpi in thuak hi.

Khaikhopna:

(1) A masa belin mi khempeuh Hell ah!

(2) A hih keileh a tam theithei Hell ah!

(3) A hih keileh Pasian a muh ma-un lomsih sak ding!

(4) A hih keileh Vangamah mizawng suak sak ding!

(5) A hih keileh lei-ah mi genthei suak sak ding!

(6) A hih keileh a lunggim theihtheih nadingin om sak ding!

(7) A hih keileh kitawng sakin kitukalh sak ding!

(8) A hih keileh a uukna khat zangin a ma’ deihteelna mah tawh awk
sak ding!

(9) A hih keileh lei thupha tawh khim ding, khuavak musak lo ding!

(10) A hih keileh lungkia sak ding, lametna bei sak ding, si nuam sak ding! Tdkhen