Naupang tampi te tungah Covid-19 natna kimu khia

COVID-19 Alert XVI: Breaking news: Naupang tampi te tung ah COViD-19 natna kimu khia, kidop ciat ding kipulak khia…

New York Gov. Andrew Cuomo in New York state sung naupang 102 tungah COVID-19 tawh akizawi tawn “Pediatric Multi-System Inflammatory Syndrome (PMIS)” akici natna mukhia uh aa, naupang pawlkhat zong si ta ahih manin in Nu leh Pa ten I kidawp ciat ding cih taangko khia hi.

Hih natna pen US states 18 leh Washington D.C te ah bek thamlo in leitung gam teng zong kizeel mang ta aa, Europe gam tampi ah zong kimu ta ci hi. Abeisa hunte ah COVID-19 pen naupang te tung kimu khol loin lungmuang in akiom pen tun lungmuan om nawnlo hi ci in New York Governor pa in genkhia hi.

Hih COVID-19 tawh akizawi tawn natna pen naupang kum 1-21 apha te tungah tampi kimu ta hi ci hi. Hih natna symptoms ii 60% pen COVID-19 positive angah thak te tawh kibang lian aa, 40% symptoms pen COVID-19 positive ngah in adam tung te tawh kibang hi ci uh hi.

Innkuan sung natna nei ten a naupang te tung akilawh tam mahmah hi ci uh hi. COVID-19 angah naupang te ii 71% pen natna nasia lua uh ahih manin ICU ah tung uh aa, 43% pen zato ah lum suak uh ci hi. Tua ahih manin naupang nei Nu leh Pa ten I tate hoih tak I kep cing ding thupi mahmah ding hi.

New York Gov. Andrew Cuomo in agen suak na ah Naupang te lak ah COVID-19 symptoms te bek thamlo in anuai aa symptoms te I muh leh amanlang in zato paipih ding leh I Siavuan (doctor) te I sap pah dingin genkhia hi:

• Cisa ni 5 sung bang aom suak leh (prolonged fever)
• Gilna (abdominal pain), Ek tui (diarrhea), Lua (vomiting)
• Amit sungah si dan aom leh(bloodshot eyes)
• Cithak/ciphual (skin rash)
• Adang : Vun (skin) color akilaih leh (e.g. blue), na nak zawh kei leh, anak dan amaan kei leh, alungtang akisai leh, a awm anak leh (chest pain)

The US Centers for Disease Control and Prevention (CDC) in zong hih naupang te tungaa akimu natna “Covid-related pediatric syndrome” pen lahuai mahmah ahih manin hoihtak kidop tek ding US gam sungaa om doctors teng khempeuh kiang zaksakna nei khin hi ci hi.

Abeisa hun in COVID-19 natna pen naupang te tung tam kimu lo aa, nu leh pa te lungmaung tak aa akiom hi in, tu in state tampi leh gam pawlkhat te ah COVID-19 natna pen naupang tampi tung kimu ta ahih manin Nu leh Pa akua ma peuh in I ta te hoih tak kikep cing ding leh COVID-19 anei (positive) peuh mah in zong I naupang te tawh kisawh kha vet lo in hoih tak quarantine, isolation te I bawl ding thupi mahmah ding hi. Topan I naupang te hong kem bit ciat ta hen. Thomas On Sian Mung (Thomas Mung Guite) Washington D.C May 15, 2020