Samsung Galaxy Note 7 Phone te vanleng sungah zat kiphallo

Samsung Galaxy Note 7 Phone te vanleng sungah zat kiphallo

Samsung Galaxy Note 7 Smartphones tepen nawngkaina om, Battery Charging laitak puakkhamthei ahih manin leitung gamtuamtuam aom Airlines te’n vanleng sungah zatding phallo uhhi.

Hih Samsung Galaxy Note 7 Smartphones Model hangin Samsung Company zong mindaituam mahmah bekthamlo, sumzianzong tampitak suplawh dikdek ding uhhi. Samsung te genkhiatna ah 2.5 Million valbang hih Model pen ki zuakkhiakhin ci a, tuateng khempeuh phialpen Battery nawngkaina om ahih manin avekin alaihkik sakding uh himawk hi.

Tuatawh kizui in Singapore Airlines (SIA) te’n amau ii vanleng khempeuh te sungah Samsung Galaxy Note 7 Smartphones zat kiphallo hi ci’n September 09 ni in tangko khiagiap uhhi. Charging laitak khawngin Battery puakkhamthei cih himawk ahih manin, vanleng ii bitnading Safety ding cih ngimna tawh zat aphawllo uh ahhi.

Tuamah bangin “US Federal Aviation Administration” inzong Samsung Galaxy Note 7 Smartphones te vanleng sungah zat hetlohding genkhia uhhi. Passengers khempeuh in Samsung Galaxy Note 7 Smartphones tepen vanleng tuansung in zangkha hetkei un, Charging zong bawlkha hetkei un. Ahoihpen ah navan Luggage te uhtawh Check-in bawlkhawmzaw un ci’n genkhia uhhi.

Taiwan gam te ii Airlines minthang leh alianbel nihte ahi China Airlines leh EVA Airways te’nzong Samsung Galaxy Note 7 Smartphones te vanleng tungah ki zangtheilo ci’n Friday ni in genkhia uhhi.

Australian te Airlines ahi Qantas, Jetstar, Virgin Australia cihte’n zong vanleng tungah Samsung Galaxy Note 7 Smartphones te ki zangtheilo cih genkhia uhhi.

Hih Samsung Galaxy Note 7 Smartphones te adangtawh laihsakna “Replacement Program” pen September 16 ni in kipanta dinghi ci’n Samsung Company in genkhia uhhi. Singapore gamsung bangah hih Phone te zuak kiphalvetlo cihzong CNA pan kiza hi.

U.S. Government Safety Agency inzong zanni Friday ni in Samsung Galaxy Note 7 Smartphones te zangvet kei un ci’n tangko khia cihzong Reuters News pan kiza hi. ZD Sawltak #zomidaily