“Salpha” cih kammal kuppihna ~ Khup Khan Thang

“Salpha” cih kammal kuppihna ~ Khup Khan Thang

“Salpha” ihcih ihkammal pen tu aa ih zat dan ah a buaihuai kammal khat ahihi. AD 2000 kum masiah tua kammal kei bang aza ngeilo hing. 2010 kum khit lamteh net sung khawngah kamu ngei pan hi. Bang hun in kua in hong zangh masa hiam cih ka theilo hangin, adangnal (Articulated) ih Biaknasia te tung pan a hih tammaw cih ka ngaihsun hi. Nidangin, (The 90s) Biaknasia pawlkhat in Thu a’nget uh ciang in, na “Sal pa/nu kei mah ” cih kammal peuh hong zangh thei uhhi.

Pi Luan Za Cing in zong Pasian nasep te amau leh amau Pasian Sal a kicih uhpen maanlo hoihlo ci-in, “Sal” leh “Sila” cih ih zokammal te khiatna (Defination) kiteltak in “Tedim Journal” sung maw? khat ah hong at ngei hi. “Sal” ihcih akhiatna in “Slave” ahihi. “Salpha” ihcih teh “Good Slave” acihna hong suak hi.

“Sal” pen ih galmat te hi aa, “Sila” ih cih pen amau leh amau ki-ap aa, a’ “To” te kiang aa nasem te ahihi.Tua ahih ciangin tu aa, ZYA te huh piaknop dan leh “Salpha” cih kammal kituak kasa kei hi.

Pu Cin Sian Thang bang ih galmat (Slave) hilo, aana (By force) aa ZNC (Now ZCD) hong makaih in ci aa, ihsawl hilo in, amah leh amah hong kipia (Volutarily) ahihi. Tua ahih ciang in a mah bang “Salpha” ih cih ding kilawm kasa kei hi.

Kei mimal in “Ngalliam” or “Zogam Ngalliam” ci leng akhum zaw keitam maw? ka cici hi. (Ngalliam vontawi taang ka laulo lai e) ci in ih pu ihpa ten a gam-itna, ahansanna gen uhhi. “Ngalliam” ih cih pen “Martyr” ih cihna dan hi-in ka um hi. “Galhang” ih cihteh “Hero” hi. “Pasal” ih cih saang’ “Piisal” ih cih zong thukzaw lai hi.

General Aung San bang Kawlgam ading “Martyr” “Ngalliam” ahihi. India te ading in “Mahatma Gandhi” bang, Singapore adingin “Lee Kuan Yew” te aa “Ngalliam” uh ahi uhhi. Tua ahih leh ih Zogam ading ih ngalliam Kua? Kei mimal bang in, Pu Thual Zen bang “Zogam Ngalliam” a ci nuam hing.

Aa Maa patna (Tedim tual pau in, Thual Zen tapong) maatun or gualzo, maatunzolo or guallel cih te, thukhat hi aa, asih dong Kawl Galkap kumpi tung surrender lo “alinwan” lo hi. Mandalay Zatopi (General Hospital) anuai daawl, Zato Thong inn sung ah si hi. Keizong Zogam it mikhat in hong ciamteh un cih vaikhak hi. Khupkhan Thang Taithul (Norman, OK)