Sakamkei in gial lam manawh ~ Lian Tuang

(2017 kum ading lunggulh thusunna )
Zomite khangthak hunthak sungah “ Tung sunni bangin tan lam manawh in, Sakamkei bangin gial lam I manawh theihna ding lunggulhna tawh I nuntakpih ding thu 3 khawng kiluikhia nuam hang

1) Pilna thutheihna thumuhna
Tu ni ciangciang Zomi le Zogam ading ahih nakleh akua maciatin I hih theihnate thasial hetloin kidiang ngeingai pah lianlian hi. Hih pen a lungdamhuai lua mahmah thu ahi hi. Hih kalsuanna mah kizom suaksuak zo hen la ahi zongin a thulu tawm kikhel leh lunggulhhuai ka sa hi.

“ Zomi Zogam ading pilna “ cih thulu tawh thakhauh takin I kisatsuah phatding kisam kasa hi. Pilna I cih ciangin laitan sang pilna bek hi loin thutheihna pilna ciimnate a gen nuam I hi hi.
Tua hi a

a)
Pawlpite leh kipawlna tuamtuamte in khangnote pil sinna le mipite thutheihna lam ah a khantohna ding mapanna pen minam nasep lian khatin neih sawm ni.

b)
Mimal in I neih sumlepai leh vanlenate pen khangnote pil sinna le I mipihte khatlenihin thutheihna thumuhna in a zat theihna dingin zangkhia ni.

c)
Gam le minam ading mapanna in ei mahmah in I neihsa leh I hun manphate pilna thutheihna le thumuhnate behlapna in nei ciat ni.

2 ) Khat le khat kizahtaksiamna

I minam sungah a kipuahphat huai mahmah thu tampi lakah Khatlekhat kizahtaksiamna I neih kholloh pen khat in akihel dingin ka um hi.
I minam sung ahualpi in en kik leng

a)
-Mipite in makaite kizahtaksiamzo taktak lo
-Makaite in zong khangmasate le mipi zahtak siamzo taktak lo
-Mimasate, tu laitak makaite le mipite kikal a kilekkim kizahtaksiamna thanem

b)
-Mipite sungah mimal khat le khat kizahtaksiamna thanem
-Makai khat le khat kikal ah kizahtaksiamna thanemzaw
-Kipawlna khat le khat kizahtaksiamna thanem

c)
-Khangnote in khanglaite zahtaksiam zolo
-Khanglaite in khangham upate zahtaksiam zo tuanlo
-Khangno khanglai le khangham kikal kilekkim kizahtak siamna thanem hi.

Ahi zongin tu kum 2017 kipat a kipan I minam sungah khak le khat kizahtak siamna luangkhia sak ta ni. Khat le khat kipahtawi sawm ta ni. Khat le khat kitheihsiam sawm ta ni. Tu mahmah in kipan pah ni.

3) Hamciamna cihtakna

Kum kipat a kipan pawlpi le kipawlna tuamtuamte in I kipawlna le I pawlpite a thakhauh semsem nadingin nakpi in thasan pha ni.

Mimal mahmah in zong I nasepna le i maban ciatah thumanna citakna khahsuah loin hanciam semsem lai ni.I tavuante zo in I mate hangsan takin behlap ciat ni.
Tua ciangin

a)
I kipawlna le I pawlpi ong thakhauh dinga, tua in I minam thakhauhna ong hi pah ding hi.

b)
I mimal nisim nuntakna lawhcinin khangto dinga, tua in i minam lawhcinna le khantohna hi pah hi.

c)
Minam sungah lawhcinna khanthohna le thakhauhna a om ciangin I gam I lei cidam in nuntak ong nuam semsem pah ding hi.

Hih bangin Zomite in khat le khat kizahtaksiamna tawh nungta in pilna ciimnate thupi sakin nasepna maban ciatah mavanna lawhcinnate I neih ni ciangin “Gual tawh tan bang kim” bek hi loin gual tungah i tuang ding hi.

Tua ciangin ‘ Nun bang nuam, aw Zogam lei’ ci in la in i awiawi thute ong tangtung taktakdinga, Zomi Zogam in “ Tung sunni bangin tan lam manawh in, Sakamkei bangin gial lam I manawh” taktak ding hi ci in ka um hi. (2 Jan 2017)

Lian Tuang