Saizang: i Zogam bup Kumkhen Khuadopi hunhial Gualzawhna thu

Saizang: i Zogam bup Kumkhen Khuadopi hunhial Gualzawhna thu

3/4-11-2017 nidong
i Zogam, Saizang Khuapi ah i Zomi namte Kumkhen Khuado i Zomi nam Mipi 3000 val leh Kipawlna atuamtuam te akipan kumpi U lian tetawh nasiatak in kibawl khawm hi.

4-11-2017 ni nitak hunhial na in ZDF President – Dr Pu Paul Pau in i Zomi i Zogam itna,veina, Lainatna taktawh i Zomi i Zogam i khantoh nadingthu nasiatak in gen in Mipi in tha ngahtheih mahmah uh hi.

Hun zawh lungdam kohna thu zong Dr Pu Paul Pau mah in nasiatak in thungen in Kumkhen Khuadopi gualzawhna kila hi. Lungdam

Thugen bulpi teng

1.i Zomi namte i ngeina Midangten bawl in ngeina anei ei Zomiten asiam cihdan hinawnlo in i Zomi i Zogambup lungkituaktak in i ngeina ahi i kumkhen Khuadopi ei leh ei in i Zogam leitang mahah gambup Kumkhen Khuadopi bawl in Kumpite dong in isap zawkding hanthawg hi.

2. i Zomi nam ingeina thupisak toto in sangkah-ni nikhat peuhpeuh in i sangnaupang te silhni khat khensat in isilhsak zawh nading hanthawng hi.

3. Minam khatpeuhpeuh in aminam agam dialkhai cih alotheilo in neihkul ahih man in i Zomi i Zogam dialkhaipi khat ineih zawh nading in Mipi thukim natawh ikipsak zawh nading i Zogambup in Minam gambup khawmpi khat ibawl zawhding thupi mahmah dinghi cih hanthawng hi.

4. i Zomi i Zogam khantoh nading asemtaktak sang agen kitamzaw in i Zogam hongkhangto zolo ahih man in asemtaktak ding i Zomi nambup aneu alian in tulehtu in nangleh kei kisam hihang cih hanthawng hi.

5.i Zogambup lawngkhat in ipaizawh masiah i Zogam hongpallunzo ngeilo ding banah mikhut nuai ah kiom dending himawk hi tua ahih man-in i Zogambup lawngkhat in ipaizawh ding thupi mahmah hi.

i Biakna min bulphuh natawh i Zogam cikmah ciang lawngkhat in kipumkhat zo ngeilo ding ahih man in kaminam kasisan, ka Zogam cih min bulphuh zaw-in itna, veina, lainatna lianpi taktawh kiap ciat in isep khawp zawh ding thupi mahmah ding hi tuaciang bek in Biakna deidan, beh deidan, khua deidan cih hong hinawnlo ding ahih man in i Zogambup hong kipumkhat in lawngkhat in kipai zopan ding ahih man in i Zomi i Zogam mikhut nuai ah hongom nawnlo in i Zogam hongpallunzo pan ding hi cih hanthawng hi.

Muntuam gamtuam a, aom i Zomi nam khempeuh in hih thu nangaih kimciat nading un itna zahtakna lianpi taktawh kong hanthawn uhhi.

Minthanna leh pahtawina khempeuh i Biak Pasian in tangzaw tahen. Amen

Rom – 9:1-3
Jeremiah – 7:4-7
Sawltak – 2:44-45

Agen bang in asempah

Zomi Development Foundation – ZDF Committee
State Office, Tedim Khuapi, Lawibual Veng, Zogam
Phone- 09442348889
Email- [email protected]