Russia – Ukraine Update: Russia galkap asi aliam 40,000 val ta

Russia – Ukraine Update: Russia galkap asi aliam 40,000 val ta

Russia in Ukraine gam abuluhna hangin Russia galkap asi, aliam leh akimaan avekpi kigawm 40,000 val ta ding hi ci in NATO in taangko khia uh aa, asi galkap 15,000 val ding hi ci uh hi. Tua bek thamlo in Russia galkap mang (Top commanders) 15 kiim sih lawh ta uh aa, tua lak ah General 6 kihel hi ci uh hi. Russia in World War II zawh Galkap mang tam asih pen na hi ci uh hi.

Ukraine President Zelensky in belh Russia galkap asi bek bek 16,000 val ta hi ci in tuni in genkhia hi. Russia Kumpi lam pan belh Russia galkap asi 1,300 leh aliam 3,800 bek pha hi ci in Russia Military in gen aa, NATO leh Ukraine te genkhiat tawh kikhai mahmah hi. Pawlkhat ten belh Russia lam te zong MAL leh Zaw Melone dan mah in khem thei, zuau thei zel uh hi ci uh hi.

The Sun News te suahsakna ah tuni ciang dong Russia lam pan Fighter Aircrafts (Gal vanleng) – 101, Helicopters -124, Tanks – 517, Armoured vehicles (gal mawtaw) – 1578, UAV (Drones) – 42 MLRS – 80 leh adang tampi sum ta uh hi ci uh hi. Mr. Putin in ama tupna dan in Ukraine la zo lo bek thamlo in Sum leh van dollars million tampi suplawh hi.

Tua bek thamlo in NATO, EU leh leitung gam tuamtuam te in Russia gam pen nawlkhin in mun khempeuh pan khaktan ngei ngai uh ahih manin Russia te ci mawh mahmah hi ci uh hi. Ref: The Sun News, Daily Mail (UK) Thomas On Sian Mung (Thomas Mung Guite) Washington D.C March 26, 2022

News update: Russia-Ukraine vai (March 24, 2022)

1. Tulai tak in NATO, EU leh G7 makaipi teng Belgium gam Brussels khua ah akimu khawm uh aa, tualai ah Russia in Ukraine abuluh vai mah kikup pi in nei uh hi. US President Pu Biden zong meeting kah dingin Brussels ah va pai thei aa, tualai ah Russia tung khaktanna – sanctions thak tangkona leh Ukraine pan Refugees lak ding vai tangko khia hi.

2. Ukraine galkap ten Capital Kyiv khuapi pan Russia galkap te nawt khia kik uh aa, Russia gal Tembaw pi khat zong susia zo uh hi ci uh hi. NATO, EU, US, UK leh gam tuamtuam te in Ukraine gam pen Galvan nasia takin puak in panpih uh ahih manin tudong ciang Russia te tupna tungzo nai lo uh hi.

3. NATO Secretary General Jens Stoltenberg in tu tadih in NATO leh Russia kikal kidona pi om ding ka um kei phot aa, NATO gam khat peuh peuh ii gam hong buluh kei nak leh NATO lam pan kido masa lo ding ci in NATO thukikupna ah genkhia hi. US President Biden in belh Russia ten NATO gam khat peuh peuh hong sim nak leh NATO in kido kik ding hi ci hi. French President Emmanuel Macron in zong Russia leh Ukraine buaina a nasiat sem sem loh ding ka hanciam dingaa, Ukraine tung galvan leh humanitarian support piakna te ka kan to to dinguh hi ci hi.

4. Russia in Ukraine abuluh zawh kha khat sung in Russia gamgi tawha kinai Ukraine khua pawlkhat buluh in Russia galkap te koih zo bek aa, ahih zongin Ukraine gam atam zaw Ukraine te khut sung ah om lai hi ci in CNN in Map tung tawn in taangko khia uh hi.

5. Russia-Ukriane buaina hong pian zawh aa kipan NATO gam te sung kipumkhatna nakpi tak in piangsak hi ci in President Biden in Brussels, Belgium gam ah akibawl news conference ah genkhia hi. A zen zen in Russia te in Chemical Weapons hong zat uh leh US leh NATO in kithuk kik tei tei dinghi ci in gen pha pha lai hi. Russia te ngongtat vai Chinese President Xi Jinping tawh zong nung nipi sung ka kiho uh aa, China in Russia ahuh zen zen leh tua hangin China gam in thuak kha ding cih ka gen ci in Pu Biden in behlap hi. Russia gam ii buluhna hangin leitung gambup ah nek leh dawn kitangsapna zong hong om to to thei dingaa, Russia tung khaktanna (sanctions) pawl khat bawl beh ding vai zong Pu Biden in behlap hi. Tua bek thamlo in Gam khangto Gam 20 te kipawlna ahi G20 pan Russia gam lak khiat ding kihanciam kha ding hi ci in genkhia hi.

6. German Chancellor Olaf Scholz in zong Russia ten chemical leh biological weapons cih te nong zat khak loh ding uh hi ci in Putin kiang warning piakna leh ngetna nei hi. Tua weapons te na zat uh leh hong kithuk kik pah ding hi ci hi. Tua bek thamlo in leitungah Gam thahak, gam khangto pen 7 te kipawlna G7 kikupna ah zong G7 ten Russia tung tua weapons te zat khak het loh ding ngetna nei pha pha uh hi.

7. UN General Assembly in Russia te buluhna amanlang takin khawl nading thupiakna leh Ukraine gam sung mipi te kepbit nading vote khai na nei uh aa, UN member gam 140 thu kimna vote khia in gam 38 in vote khia lo uh hi. Hih thu piak nading UN resolution pen US leh gam 25 ten geelna nei uh aa, UN general assembly ah vote khai dingin puak to uh ahi hi. Kawlgam aading in thukimna vote zong U Kyaw Moe Tun in pia thei hi cih kiza hi. Russia in Ukraine buluhna hangin mipi asi 10,000 val ta aa, million tampi refugees in tai uh hi ci in UN in tuni pulak khia hi.

More: Russia & Ukraine vai nai 24 sung thu piang tuamtuamte

8. Ukraine te khuapi Kyiv kiim leh paam pan Russia galkap te kinawt khia zo aa, Russia te buluh sa mun te kila kik zo hi ci in Ukrainian Defense Ministry in genkhia uh hi. Tua bek tam lo in Russia te buluh sa khua pawlkhat zong Ukraine galkap ten la kik zo uh hi ci uh hi. Ref: CNN breaking news, Twitter *** News Update zong LIVE tawh kikhah ding ahih manin kimu tek ni…. Thomas On Sian Mung (Thomas Mung Guite) Washington D.C March 24, 2022