Rev. Fr. Isidore Tuang Khan Pau (57 years), Rest In Peace

Muan tuamtuam aa om azahtak huai Catholic Pawlpi mite leh sanggam uh leh nau te
Lei tung aa ih deihloh pen leh ih tuaknoploh pen ahi tazongin mihing aa ih piang aa kipan ih kipelhtheih loh, nikhat niciang aa ih tuakkhak ciatding ahi SIHNA THU hong taangko ung. Pasian nasem ding aa gehbang aa a kipia khia ahi Rev. Fr. Isidore Tuang Khan Pau in, leitung a nuntaksung aa asepding aa a kiciam Pasian nasepna, a it Catholic Pawlpi, Siadaw pa Msgr. Felix Lian Khen Thang, Pasian na a sep khoppih ahi Kalay Diocese sung aa Siampi te leh thuzuite khempeuh leh meltheih u leh nau te hongnusia nusia in, ama’ nasep thaman Kham Lukhu sang dingin hong piangsak pa Pasian kiangah tuni (19 Nov 2014 – Wednesday- 7:00 pm) in hong paisan ta hi. Amah pen Siampiza tawh a nuntak sung tawntungin Pasian na sem bekthamloh in midangte zong ahehpih siam mahmah khat ahihi.

Ama’ hong nusiatna in Kalay Siadaw Msgr. Felix Lian Khen Thang leh Siampi te, Catholic thuzui khempeuh ading leh Catholic Pawlpi ading supna lianpi ahih manin, ki khasia mahmah hi.

Fr. Isidore Tuang Khan Pau (57 yr) ii tangthu a tom

1. Suahni
Fr. Isidore Tuang Khanpau pen 11 May, 1957 in Limkhai khua ah Pu En Khaw Mang leh Pi Lian Dim sungpan pianghi.

2. Pianpih sanggam te

1. Pa Ngo Tual Lian (ၾက့ံခုိင္ေရး ရုးံခ်ဳပ္ – Naypyidaw) + Nu Dim Khan Cing
2. Rev. Fr. Isidore Tuang Khan Pau
3. Lia Dim Sial Cing (Si khin)
4. Nu Dim Cing Khup (Si khin)
5. Rev. Lian Cin Nang (Tuiphum, Tahan, Phaitaya) + Nu Kaang Dim Niang
6. Tg. Tual Mun Mang (Si khin)
7. Tg Vungh Thian Cin (Si khin)
8. Pa Peter Ngo Tun Cin Thang (Australia) + Nu Thang Khan Niam

3. Pawlpi sungah khantohzia leh Pasian na asepna te
– Tui kisawp kum – April 14, 1972; Tuisawpna pia – Rev. Fr. Peter Hla Shwe
– Deacon ngahkum – May 19, 1989, Mandalay
– Siampiza Ordination ngahkum – Oct 14, 1989;
– Siampiza pia pa – Archbishop Alphonse U Than Aung, Mandalay

Pasian nasepna mun leh a kumte –

– Chauntaa Village, Mandalay Archdiocese – Siampi suakma May 19 1989
– Parish priest of Lukse (Hakha Diocese) – 1989 Dec 9
– Parish priest of Kanpalett (Hakha Diocese) – 1993 April 8
– Parish priest of Saizang – 1996 April 20
– Parish priest of Sakollam and Vicar Forane of Tedim zone – 2007 May 29
Mainuai P.P – 2009 Dec. 19
Mainuai Old-age Home – 2011 – 2014
Pastoral Center, Kalay diocese – May 29, 2014
Sihni: 19 Nov, 2014 (Wednesday); 7pm
Sivui ni: 21 Nov, 2014 (Friday); 2:00pm

Zogam Siampi lian Msgr. Felix Lian Khen Thang ii uksungpan Siampi te in Rev. Fr. Isidore Tuangpau ii kha ading leh a nusiat u leh nau leh sanggamte ading ni 3 sung MISSA bawlsak ding phawk ciat ni.

Fr. Isidore acidam hun sung aa Pasian na asepna ah sumleh paii leh thungetna tawh a panpih khempeuh te leh, a dam loh aa kipan zatui naha, thungetna leh sum leh paii tawh a huh khempeuh te, hong nusiat na hang aa hongdahpih hong kahpih thuzui te leh meltheih khempeuh leh sihvuina ding vai khempeuh hong buai pih mimal khatciat tungah nakpitak in lungdam hi, cih thu hong tangko ung.

Note ii thungetsak na hangin Fr. Isidore ii kha in vantung gamtuam tunghenla, hong nusiat sanggam uh leh nau meltheih a kuamaciat leh thuzui te tungah hehnepna thupha hong pia ta hen.

Fr. Isidore phawkna lianpi tawh,

Msgr. Felix Lian Khen Thang leh Siampi te,
Kalay diocese
Kalaymyo