Rakhine State sungah Yaba Pill kici vankham $270,000 manneiding kiman

Rakhine State sungah Yaba Pill kici vankham $270,000 manneiding kiman

Myanmar, Rakhine State sungah Burmese Navy te’n guihtheih khamtheih vankham Yaba Pills akici te 185,000 mankhia uh cih DVB pan kiza hi. Bangladesh leh Myanmar gamgi, Rakhine State sungaom Maungdaw Township, Naf River panin zanni akiman uh ahihi.

Maungdaw Police te genkhiatna ah Burmese Navy te’n gunkuang tawh gamgi encik in avakkawikawi laitak un muanmawhhuai gunkuangneu khat mukha uhhi. Tua gunkuang pen sitnuam uh ahih manin khawlsakding in Signal alah uhhangin tua gunkuangneu pen taisuaksawm uhhi.

Tuaciang in Burmese Navy te’n akhawlnading un thau tawh Warning Shoots kap uh a, tuaciangin gunkuang khawlsakthei uhhi.

Gunkuang tungah mi 5 atuang uh hi a, khatpa taisuah in adang 4 tepen mantheipah uhhi. Amat mi 4 tepen Rah Zein, Nuha Khan, Abdul Shaku, Maumad Essad cihteng hi uh a, avek un Maungdaw, Shweza Village pan ahi uhhi.

Gunkuang tungpan inzong vankham Yaba Pills 185,000 mankhia uh a, tulaitak Kawlgamsum tawh hileh 370 Million Kyats ($270,000) bang manneiding kici hi.

Ataisuahpa uhpen Maumad Elias kici minnei khat hi a, Maungdaw, Shweza Village pan ahihi.

More: Myanmar, Rakhine State sungah gamdangmi 28 gunkuang tawh kiman

Amatkhak tenguh avekin Burmese Navy te’n Local Law Enforcement Officials te kiangah apsawn uh cih kiza hi.

Rakhine State sungpan in vankham tawh akiman kilimzak mahmah hi. Nungdiak mahmah inzong Buddhist Monk khat vankham honpikhat tawh kiman hi. ZD Sawltak #zomidaily