Myanmar, Rakhine State sungah akiphum Hindu misiluang 28 kimukhia

Myanmar, Rakhine State sungah akiphum Hindu misiluang 28 kimukhia

Myanmar, Rakhine State sungah Muslim Insurgent kici kumpi langpang migilo te thahlup hiding in aki ummawh misiluang akiphum 28 tak ki mukhia cih Reuters pan kiza hi. Tua misiluang 28 tepen avek un Hindu Villagers kici a, zanni Sunday ni in Myanmar Government Forces te’n Yebawkya khua panin Meter 1200 akigamlatna gamsung ah amuhkhiat uh cihi.

Rohingya migilo kipawlna Arakan Rohingya Salvation Army (ARSA) te’n ahihleh hih Hindu tepen kothahlup hilo hi, ARSA te’n khuasung mipi te nawngkai saklo hi ung ci’n genkhia uhhi.

Tua Hindu misi luang 28 akimukhia te lakah 20 pen numei kici a, adang 8 tepen naupang hi ci’n kumpi thunei te’n genkhia uhhi.

Ahi zongin Myanmar, Rakhine State sungah buaina hongki patkhiatna pen ARSA kici Muslim thautawi migilo te’n Police Posts leh Army Camp te asimmasak, ado masakna hangin buaina hongkipan ahihi.

Gamsung ah tapong migilo te ngongtatna pen Myanmar kumpi in deihlo ahih manin, siansuahna abawlna hangin Rohingya te Bangladesh gamsung ah taiphei ngeingai uhhi. Kawlgam kumpi galkap te leh ARSA kici Muslim galkap te kidona hangin, mi 400 bangin sihlawh uh a, asi atamzawtham pen ARSA migilo te kici hi.

August 25 ni in ARSA Militants 300 khawng khuasung ah asimding in kuankhia uh a, khuasungmi 100 bang thatlumding kici hi. Tuaban ah khuasungmi numei 8 tepen Islamic biakna ah lutsak uh a, tuakhit ciangin Bangladesh gamah paikhiatpih uhhi ci’n kumpi te’n genkhia uhhi.

Myanmar Government Spokesman Zaw Htay in agenkhiatna ah hih Hindu misiluang kimu vaitawh kisai in Security Forces te’n akanciansan laitak hi ci’n genkhia hi.

ARSA Spokesman khatin agenna ah hihpen Muslim leh Hindu kikal buaina, kikhenna, ki galneihna apiantheih nadingin Buddhist te gamtatna hiding hi cileuleu uhhi.

Related: Myanmar, Rakhine State sung buaina hangin misi 400 phata

Muslim te bek hilo in, Hindu zong luang 28 bang akiphum kimu khiamawk ahih manin, Rakhine State sung buaina pen hong nawngkai semsemleh kilawm hi. Rohingya te hangin leitung Muslim gamtuamtuam te lunghimawh mahmahkhin uh a, tu’n Hindu tezong kihel ahih manin, leitung Hindu gamte bang hongcidiam? Sawltak #zomidaily