Qua Vadis Zomi?

Ka neulai a ka et ngei Movie khat tudong in mangngilh thei nai lo hi’ng. Tua Movie min pen “ Qua Vadis Dominno?” kici hi.

Jeisu sihkhit a sawt loin a nungzuite in Christian biakna pen Juda gambek ah hilo Rome khuapi sung naleng ah zong va kizelsak uh hi. Rome kumpi Nero in hihthu azak ciangin Christiante bawlsiat hong kipan pah a, tampi takin sihna hong thuak uhciang in makai teng thukimna tawh Peter pen Jerusalem ah ciahkik dingin aana takin sawl uh hi. Lamkal ah Peter leh Jeisu kituak uh a, Peter in Jeisu kiangah Latin kam tawh “ Qua vadis Dominno?” cia adot ciangin Jeisu in “ Ka mite ta’ngin Rome khuapi ah va si kik ding hi’ng” ci hi. Peter in Jeisu gennop thuthuk tel ahihmanin Rome khuapi ah kilehkik a, hangsan takin sihna va thuak hi.

(Qua vadis = Koilam zuan ding na hiam? Dominno = Topa.) Hih thudotna kammal in ei Zomite adingin khiatna thukpi nei kasa hi. “Qua vadis, Zomi?“ Zomi aw koilam zuanin kalsuan na hiam? ciin eilehei zong kidong leng hoih in ka um hi.

Na gam na lei, na minamte ading bang gelna nei na hiam Zomi aw? “ Keilekei zong zong kivak zo nai keng” cih paulap tawh nitumtum lai ding maw?

Zomi aw na pianna Zogam na nusiat khit hangin na lungsim hong ciahsak kik in, na pilna na siamna hong ciahsak kik in, Zogam leitang leh Zomi na Itna hong ciahsak kik in. Koilam zuan ding na hiam Zomi aw? Va mangthang kei tapeuh in Zomi aw!

Qua Vadis Zomi?

Francis Lamthang