Cope topa kum 100 cinna pawi: Open Letter ~ Zam Khat Kham

Cope topa kum 100 cinna pawi: Open Letter ~ Zam Khat Kham

Kong it ka u ka nau Zomite, Cope Topa Tedim khuapi hong tun zawh kum 100 cinna pawi kibawl ding hi, ci-a a kigengen pen hong nai vat peuhmah mawk!

Hih lam ah khuakhal sung (innlam ah bel tukpi sung na hi) sang khak ka hih manin innlam ka va ciah a ka tenna Tedim ah ka va om hi. CCJ vaihawm makaipite tawh ka kimu a, hih vai lianpi hong kuppih uh a, hih tawh kisai a sepnate uh thupi ka sa hi.

Cope Topa in Zomite hong itna ngaihsun pha dih ni. A nuam mahmah a gam uh (tua hun lai USA pen tulai USA sangin nuamzaw, ci tek uh hi) nusia-in Tedim ah hong pai viuviau-a, khuavak i muh theih nadingin a sihkhiat dong na hong sem hi. Ama’ tung pan-a i ngah hamphatna tawh a peng kua om mawk i hi hiam? Biakna vai ah ei leh ei i kipuaseh khak phial leh zong hih Zolai-a ka gelh lai a sim thei mi peuhmah Cope Topa’ tung ah lungdamna leii a ba hi pah hi hang.

2010 kum ciangin Tedim khuapi ah tua pawi kikhaam ding hi. Leitung bup-a ka u ka nau ka Zomi pihte aw, kihel ciat ni. Vaihawm makaite in pawi ahi a, phawkna innpi ahi zongin thu saupi ngaihsutna tawh gelgel uh hi. Dangka (sum) lo-in bangmah kisem thei lo a, Zomite’ tenna khuateng ah innvak-in sum dong uh hi. I nu i pa, i zi i tate in kamciam ahi a, a sumtang mahmah ahi zongin a piapia khin zong om ding hi, ei, gamdang-a omte mah hong muanna uh zong hi kha ding hi. Hi ta leh, tuni-in khatvei i tha saan pha kikin hih CCJ vai peuhmah ah kihel ciat dih ni.

2005 kumin Sia David Suum in Tedim ah Zomi Festival of Praise i bawl ding hi, Pasian leh gamdang-a i sanggamteng mah i muanna-in vaihawm ni, hong ci a, Tedim Christian Fellowship makaihna tawh kivaihawm hi.

Kei zong Korea pan sangkah man khin, inn tung phet mah hong zawn uh a ka hih theih zah-in ka kihel hi. Main committee ah kihel-in Newsletter editor-in hong koih uh a, pawi a man ciangin DVD khat bawl ni, cih thukimna nei-in tua lai bang ah tup loh pi-in narrator bangin ka pang suak kha zawzen hi.

Hih Hallelujah Pawipi a kibawl lai-in, a hun hong nai mahmah a, a sum ding upmawh bangin hong tung khol lo mawk hi. September bei maw, October bul lam maw (hih lai ah ka diary pua kha ke’ng, tel lian kei ing) hong hi keii ta a, sum om nai mel lo mawk hi.

Sia Mangnote’ inn (Bo Kam Cin Hangte’ inn) ah Nipi Ni sun khat emergency meeting hong kisam-a ka pai leh, committee bul lam mi 5, 6 khawng na om-in, bangbang hi leh sum hong tung hiau lo mawk a hih teh, Tonzang ah khat, Tedim ah khat, Kawlpi ah khat, lasakna mun thum ah nei mai leng, cih thu hong sung uh hi. Pasian’ hong makaihna hi ding hi ve’n, kei leh U Thang Siing ut het lo vial-in, a tawpna ah Khamtung gamteng Tedim ah, zang gangteng Kawlpi ah, mun nih ah nei beek leng, ci-in ngaihsutna ka nei uh hi. Tua thu a pulaak dingin TCF President Rev. Nang Khen Khup leh Bo Pau Khan Lal kiseh-in, Kawlpi va pai uh a, ahi zongin Kawlpi a i sanggam Zomite in na sang zo peuhmah lo uh hi.

Rev. Suan Khen Mung, U Hang Lian Khup, cihte hi a, “Ko Kawlpi peuh-a sak lelngel dingin la na sin kei ung, uniform na khui kei ung. Zomite’ khuapi Tedim-a sa dinga a kiging hi ung” ci hiaumawk uh a, a tawpna ah Pasian’ deihna om hi ding hi ve’n, i Tedim khuapi mah ah Hallelujah Pawipi i cihcih pen hong piang zo demdam hi. Tua pawi a piankhiat zawh nadingin nomau tek mah in na sum na paii uh leh thu leh la tawh na pankhop manun i minam buppi angtanna hi mawk lo ahi hiam?

Tua bang pawi khat tu’n vaihawm ni, ci lehang, Pasian’ hihtheihna i ciangtanna a hih loh hangin, kihta mai hi hang, vai tam mahmah hi, sum tam bei mahmah hi. Zong hi zo nawn pak lo mai ding hi. Mi namdang, Chin a kici veve sunga mi namdangte in zong a neih zawh nai loh uh, cik teh nei zo ding, cih zong a kigen thei khol lo thu khat hi a, Pasian in ei Zomite hong hehpih mahmah hi, hong hamphat mahmah hi, ci-in ka mu hi. Ama’ min a kiphat ziahziahna tungtawnin Pasian in i mipihte hizah thupha hong pia hi mai ding hi, cih zong ka upna ahi hi. Nang mahmah, kei mahmah zong tu-a i omna gam i tun theihna zong tua thuphate khawng mah hi mai lo ding ahi hiam!

Tu-in sanggamte aw, i mai ah Zomite’ pawi thupi mahmah khat nei hi hang. Kum 100 cinna hi. A kum tawh kiciangtan thu hi a, ei’ khan sunga hong tung pawi hi. Cope Topa ngiat tawh a kithuahkha i pu i pite’ khan sunga tung lo, ei a tu a tate’ khan sunga hong tung hih pawi vaihawmna ah, kihel ding hi hang. I sumte pia ding hi hang, i piak zawh zahzah, pek khat pek nih a kipan, sawm khat sawm nih, za khat za nih, i piak zawh bangbang pia ding hi hang. Kum 150 cin, Kum 200 cin pawite a kibawl lai phial zongin (i Topa hong pai kik nai lei leh), om nawn khol lo ciat kha ding hi hang!

“Zomi ka hi hi.” “Zomi leh Zogam ka it hi,” a ci lo kuama’ ta om kei hang. I kam bek tawh it kei tapeuh ni. Sep ding a om teh sem ni. Piak ding a kul teh pia ni. Pasian’ min leh minam vai-in a hoih lamin thangpaii thei dih ni. Eimah in pia-a eimah in i sep leh kizo bek dinga, i minam i itna, i gam i it takpina kimu thei pan ding hi. Mordecai in Esther Kumpinu tunga a gen bangin nang’ na piak na sep kei leh, Pasian in kul a sak nak leh mun khat peuh pan vaihawm lel dinga, nang a kihel kha lo, a sum hi lel ding hi teh. Supna i cih tua bangte hi. Hun hoih leh hamphatna pawlkhat kila kik thei nawn het lo takpi hi.

“Gamdang ah zong dangka (sum) singteh banga kilo hi kei, singteh banga kitawm hi kei” ci hi hang. Hi lua hi. A hi mah hi. Ahi zongin innlam-a sum haksat luat tawh kibang nai lo buang hi; a kibat taakin zi leh ta nu leh pa nusia-in kua peuhmah gamdang pai-in sum thalawh ding hiam? Na sepsa mah, khua-ul kaii-a na sepna pana na ngah pek khat pek nih mah Pasian’ min leh i minam min adingin piakhia in.

“Ngahna sangin piakna ah thupha om zaw”, “A piakhiatte hau semsem ding” cih Pasian’ kammalte Laisiangtho sungah a kimawkgelh hi lo a, a gensa peuhmah a khel het lo, a tangtungsak Pasian’ kammalte ahi hi. Sin in!

Leitung bup-a ka Zomi pihte, ka u a nau a kuamahpeuh, Cope Topa’ hong tun kum 100 cinna pawi tawh a kisai kha lo kuamah om lo hi hang. Pasian’ thu bek hi lo-in, Zolai hong bawlsaka, tua mah tawh i pu i pate na khangto-in, tu’n nang bang kei bang gamla pipi tung zo ta hi hang. Pek khat pek nih tek beek peuhmah i piak kim loh, i kihel kim loh-in bel ka lungkim zo ngei lo ding hi, hong zawnzawn phapha ing.

Ke’n maw, hi thei hi leh, hih pawipi hun sungin Cope Topa’ guhte bang Tedim ah pua-in han khat bang bawl leng a ut hi lai ing! Hi thei khol ke’n teh, ka lunggulhna kong gen pong hi. Hong it, Rev. Zam Khat Kham (Concordia Seminary Graduate School, 801, Seminary Place, St. Louis, MO 63105, USA)