Pu Zo Thang (Commander in Chief) tung ah laikhak – Open letter

Pu Zo Thang (Commander in Chief) tung ah laikhak – Open letter

Thu tampi kong gen ma-in, na dam uh hiam? ka cih kawm in zahtaakna kong pia nuam masa hi. Hong theikha khollo thei ding na hihhang, na nasepna te naza zeel ingh. Na innkuan, na pawlpi un Topa’n thathak hong guan hen.

Kong theih masakna pen, Tedim BEHS (1) aa, outstanding student (Luyaychon) selection ding na kiginlai pan a hihi. Tualai in, arts and science kikhen lai hun hi aa, arts (OB/OM) na la hi. Tuazawh sang kihong zeel kikhak zeel teng tawh 1990s lai in Mandalay University ah International Relation (IR) na kah ciang kong mukha leuleu hi.

Kamtawm mawhlo kong sakkawmkaal ah sangkahna zong kibanglo a hih man, i kitam hokha kei hi. Tua lai in IR a la pen, CKEDP (Suangpi) leh phamsa LSM@AaMung (Mualnuam) cihbang in, ka thei kha hi. Eimi a tamzaw bel main hostels (ShwePyi Aye leh Mangalar) cih bang ah ki om aa, Zeyyar hostel ah zong pawlkhat a om hi. Tua hunlai in minam galkapmaang in na mapang ding lam kuamah in ngaihsun khalo ding hiven. Topa hong lamlakna leh namipihte naveina hang bekmah hiding in ka um hi. IR na sim vang hiam? gamgi kaan in minam aa ding nalianpi na sem khinzo hi.

A tung aa te ka genna pen, pawlkhat a theilo te’n ZRA pen “saklam mite hi” cikha zenzen a hih hang hi. Hong telsiam in.

Na sepnate ka et ciang in,

1. Mandate

ZRA pen tu leh tu tawm in a kikaaikhawm a hi kei hi. A picing gamkhat a suah theih na ding a kisam-peelmawh thautawi kipawlna khat neihna ding lunggulhna siksak in 2019 Malaysia Zomi Khawmpi ah thukimna om aa, ZRA (EC) tung ah ki-ap a hihi. Khat leh nih veina peuh tawh hilo in, Khawmpi a kah makaai teng in, suaikaai (khutpi meek) na tawh a kipan a hi hi. Tua kantan in, Zomi aitang in Sawlna-Septheihna a sangzaw om nawnlo hi. Taangthu a kiciapteh zawh thautawi dang kuamah mipite muanna leh sawlna a ngah leh a kimakaih khat zong om nailo hi. Tua hi aa, hat inla mazang in, mipite na nung vuah om hi. Makai te aa kipan mimal khat ciat kipaak in leh lunghial lo in mapang ding a hihi.

ZRA (EC) has the mandate to stand for the Zomi and defend them whenever and where-ever needed. Your failure is the failure of the Zomi people, (ultimately the signatory representative committee of the conference).

2. Value and standard

ZRA (EC) pen donghu leh vaikin nasepna hilo in, picingtak in, a kilam a hihi. Tua a hih man in, gam khat ii a neih gaalkap a hiziak in, zuihding kepding thukhun leh kiciamna zong tawh kivaipuak hi. Gentelna, cihtakna, thuman-thutak leh suahtakna te bulphuh hi. Pasian thu-umte omkhopna a hihman-in zong Laisiangtho in munla aa, mihing nuntaakna masak in, khuasak-nuntaakzia innlehlo, khawilehvulh kepcing ding mungtup zong a hi hi. Tua hi aa, thangpaihna, a hoihlo lungkimlohnate a hoihlolam-in thuhkiknopna cihdan lungsim palauhna te siksanlo hi. Lungtup bulpite leh zuihding thukhun tawh kituaklo in kalsuan lo hi.

3. Political vision and operation

ZRA (EC) in national level ciang bek hilo in, international level in a kalsuan na hi uh hi. Gamkhat gaalkapte hunbit nasep a hi’ mipite humbitna, kepna leh daihna ding lunggulh lianpen na nei uh hi. Mipite khualding kepding a masa in na koih uh hi. Zogam ah ZRA te hang in sihna manna thuak ding cih genna vet omlo hi. Tua ban ah, midang huang zong va kikeek hetlo hi. Hithu Zomi makai leh mipi te lak ah a minam a sisan a veitaktak te-in a telsa uh zong a hihi.

Zomite mandate a ngah, ZRA (EC) in a mauthu bek tawh kalsuanziau hilo aa, ZPCC makaihna leh sawlna tawh a gamtang a hi hi. Tua pen, minam picing gamkhat in a neih gamtat-luheekdan hoih pen a hihi. Gamkhat namkhat aa ding a hih man in, picing tak in kalsuankulzong hi aa, na lakkhia uh hi. Ei sung ah minam khat gamkhat lungsim a omkhit nakleh, a hun a tunteh leitung kumpi te’n hong ciapteh loh phamawh in kamu hi.

Leitung thupai dan leh kalsuanna ah zong national leh international in na ki khen hi. Mikhat akl state khat peuh nation kici lo hi. Tua dungzui in zong, nation-gam khat bek in gamdang-international tawh kizomthei bek hi. A gentehna in, Mizoram state bang khangto mahmah taleh zong India gamsung mah a hih man in, gamdang tawh direct in kiho theilo hi. Delhi kumpi’ phalna leh theihpihna kisam hi. Kawlgam sung aa state te genna vet omlo hi. Gamnuaimi thahaat pen a kici Wah te zong Shan state sung mah hi lai uh hi. Kawlgam federalgam a suakzong in Shan Parliament kantan theilo ding cihna hi mawk hi. Lamka-lam eimi te dinmun zong Manipur state parliament kantan ding haksa hi.

A dang gamla pi et kullo, gamnei kimlai, kilawm mahmah taleh Chin State kumpi kantan in district kingah zolo mawk hi. Khasiat huai hi. A hizong in, midang kuamah kimawhsak ding in ka ngaihsun kei hi. A hang in, hunhoih tampi kingah khinzo aa, a kilalo bek in ka mu hi.

A sakhi tuineek in en leeng, Zogam pen Kawlgam sung ah kipawmlo in, Mangkang khutnuai ah na omlai le uh, tu-a dinmun ah kiomlo ding aa, Hong Kong bang in a huntun teh Zogam pen Zomite khut sung ah hong ki-ap kik ding hi. Kum20 val bang Mangkaang/Englishte tawh ka kithuahna sung ah “ Ngal hapaaksa tum kik ngeilo” a ci tinten te uh a hi uh hi. Zomite gamnei kimlai migambeel kibang hiau hi. A thuapthuap hong kinelhsiah sawm den hi. Vaisah hi. Eima bawl a tamzaw hi. Kigin leh kithawihung hong kipialai kingahlai cih-in lakding hoih kasa hi.

Zomi pawlkhatte Kawlgamneihsa kisa a hihman un, bumtuak bang in khenglah mahmah ta mawk uh hi. Sal lungsim pan kisuakta zonailo hi. Mi mai-et leh misawlna nuai ah nuamsa in, suahtaakna nangawn a lunggulh zolo tampi ki-om hi. A laklawh tampi ki-om hi. Kawlgam sung ah kipawl kei leeng a sipah ding, a mangpah ding kisa tampi ommawk hi. Dah huai hi. Hih pen ZRA leh Spring revolution paulap-mitaw meilette kilamdanna zong hipah lel hi. Zomi kipumkhatna sang in Kawlgamvai kin in, ki khualzaw a hiziak in, lampi leh muhna kibang theilo hi.

Mipawl khat in Khangno GenZte hun ci mah leh GenZ te a muam pen tulaitak kum50-60gual mahsahlah khutnuai aa khangkhia kipantahkhial pawlkhat na hizaw hi. A tamzaw zong Zogam-khamtung cih genloh Kawlgam sung ah zong om nawnlo uh hi. Lungsim siangtho GenZ te thangpaihna leh hehna a hijack na hi gige uh hi. C te vaibel i gen thadah ven. A hizong, tua sanggam melmate tokaaina pawlpen Cmin a daisak a susia a mau mah hi lel hi. Sialvom leh sialvom kingai ciphot ni. A sahawmding uh a bei mateng in kipawlkhawm thei lai. A hizong melma te zong sisan mah a hih man in, a huaiding in kiginkhol huai veve hi. Tamil LTTE leh ISIS te banghang tangtung zolo hiam?

Khasia ken mipi khuamah nang tung ah a khasiatna kizalo hi. Tua pen a thupi pen hi.

Kong dotnop zong pawlkhat omlai, a hih hang nidang ciang hong zop sawm ning. E maw, mangkang te’n “nalawmte tawh kinaih in, na gaalte tawh kinaai zaw lai in- Keep friends close and enemies closer” ci uh ei. A tello ten telhak sa mah aive. Ih gaalte a itzaw peuh sa mawk. Tua ciang mipil te’n, “thatang thautang kullo in, gaalzote gaalsiam” na ci ta leuleu uh ei. Pilna kician hong kipiakloh, a kingahkhak lohna gah a ki at-at dan ai ve.

ZRA (EC) aw muvanlai bang in hat inla, muizang in. Gualzawhna in hong piangsak Topa leh a tate Zomi te aa hi.

Hong it,
Nantal’suan