Pu Van Thio (Vice President 2) leh mipi kimuh khopna

Pu Van Thio (Vice President 2) leh mipi kimuh khopna

Gam mipite nuntakzia leh mipite zat lampi dinmunte bang ciang ah om hiam, cih thei nuam ka hih manin keimah ngiat mawtaw zangin hong pai hi ing, ci-in hong paina ahang gen hi.

Mipi tampi tak tawh ka kimuhnop hi napi tulai Covid-19 hangin mi tawm bek tawh kimu kha ka hih manin poi sa mahmah ing, ci-in a lungnop lohna hong gen hi.

Tedim khuapi dinmun leh khantohnate thangah huai sa ing. Hih bang sang inn hoih hong lamsak Ministry of Education tungah zong lungdam mahmah hang. Kei zong angtang mahmah ing.

Gam khantohna ding sep theih zah a kihanciam laitak Covid-19 in i gam zong khantohna ding tampi hong sukha hi. Tua bang hi ta se leh i pan khop i sepkhopnate hangin leitungah natna kizel lua lo gamte lak ah kihel ihih manin lungdam huai hi. Kithutuak takin pang khawm toto lai ni. Thugen a man ciangin mipi lam pan dotnopte dotna leh dawnna hun kizang to suak hi.

Tedim Town Elders te dotnate VP-2 dawnna:

1. District Vai: Tedim pen District lunggulhna akilawm mahmah khat hi. Paletwa tawh nih a kipuak to khawm khin hi in hong lem to dingin lamen ing. District ngah leng leitang huang tampi kisam ding ahih manin na kiging khol un.

2. National Grid (Meikhaupi Vai): Tukum budget om nailo ahih manin 2022-2023 budget ah Kalay- Taingen-Tedim sep ding gelna om.

3. University Vai: A diakdiakin Tedim ah Government Technological High School Sangpi om khin a, GTI University sangpi a om zo naikei zong in ah, GTI a kisin pilna siamnate mah bang ci hilh theih ding cih hong hanciampih ning.

4. Zato Lupna 200 Vai: MOHS Tedim ah cina case apiang 17 bang om a, mipi panpihna tawh ICU building nei khin hi hang. Kumpi lam panin a kisam Siavuan Siamah pawlkhat zong hong kivaihawmsak khin hi. Maban ah ICU adingin a kisam laite hong vaihawmsak lai nung.

Mipi lametna ahi lupna 200 vai pen May 21, 2020 ni-in Chin State Health Department thukimna tawh ngetna om khin hi. Bangci dante in hih lupna 200 ngah thei, cih tehna tuamtuam om ahih manin ngah ding, cih kamciam hong pia ngam keng.

5. Town Hall Vai: Town hall tawh kisai pen ei lam pan tax i piakte tawmcik bek hi in vai haksa khat hi. 2021-2021 adingin budget geelna om nai lo hi phot hi.

6. Tuinek vai: Tui vai pen municipal lam pan haksatna a om leh municipal tawn loin Nahtahlah lam pan zong a kisem thei om in a lampi khatpeuh om thei kha dingin lamen ing.

Mipi lam pan dotna dawnnate a man khit ciangin Vice President – 2 in anuai abangin thapiakna nei-in hun nuamtak kizo hi.

Gam mi kum 18 cing khinsa khat in kum 5 ciang khat veita gambup adingin thuneihna i lah theih hun pen vote piak hun hi. Vote pia kim ciat ni. Min a om hiam, khialhna a om kha hiam, mipiten en ciat ni. Khuanu khuapate lamet leh ngetnate pen hong pia nuam mahmah hi ung. A tangtung pah thei nailote lungduai takin ngak siam tek ni.

Covid-19 hang a sum zatnate pen billion 600 – 700 bang hi-in sumte pen ministry dang pawlkhat pak akidotkhia hi, Pi Suh Kyi genna pan i theihsa ciat hi. Thanem laitak a lem dandan a hih gawp sangin i thahat deuh hun hi leh zong deih huai zaw a, zong hong gina zaw lel ding hi. Special Report: Lia Kimnu/ The Tedim Post

Pu Van Thio (VP-2) Tozang zinna

Myanmar Vice President 2 Pu Van Thio leh apawlte August 13, 2020 ni zingsang nai 10 hunin Tonzang Khuapi ah tung uh hi. Tedim Khuapi ah National Disaster Management Committee budget Million 224 tawh aki lamthak Multi Purpose Cyclone Shelter innpi en hi. Tonzang GAD zumah Covid-19 natna hang a hong kipia khia Volunteers te tungah sumtang Tein 10 pia hi.

Tonzang Town Elder Siapi Mungno dotna leh a kidawnkiknate:

1. Tonzang khuapi ading tui laknang sum beiding Million 2000 val amanlang penin vaihawm saknading: Tulaitak budget ki cinglo ahihmanin 2021-2022 Budget kum lamah kigel ding hi, ci-in Chief Minister Lian Luai in dawng kik hi.

2. Tonzang leh Cikha ading National Grid Line vai: Tedim Khuapi ah hong tun khit ciang kivaihawm thei pan ding hi, ci-in Ministry of Electricity and Energy Deputy Minister Khin Maung Win in dawng hi.

3. Tonzang zato lupna 50 leh Cikha zato lupna 25 val: Chin State bup Township khempeuh lakah Tonzang Township bek Zatop lupna 25 ahihman in lupna 50 khantoh ding vai bel asawt loin kivaihawm ding a, tua banah Tedim Zatopi pan Siavuan khat Tonzang Zatopi ading kihawm phei ding hi. Cikha Zatopi lupna 16 pan 25 khantoh ding vai bel Town dangte tawh ka khinkhai kik ding uh hi, ci-in DG U Soe Oo in dawng hi. The Tedim Post (Photo pen abeisa khualzinlai hi)