President thak Joe biden thugen tomlak

President thak Joe biden thugen tomlak

Tuni pen American te ni, Democracy ni, ih tangthu lametna ni, Democracy pen a man nei leh Democracy in gualzawhna ni hi. Ih mailam saupi ah kipuahphat ding, i kep ding, i zuun ding leh i ngah khiat ding tampi om hi.

Kum zalom khat sungah a khauh mahmah Virus hangin American ah kum khat sung mipi sihna pen galpi nihna sang tam zaw tham hi.

Siatna tuamtuamte leh gamsung ngongtatnate zawh sawm ding hi hang. American mite i kithutuah theih nading ka hamciamna ah mipiten nong panpih nading un kong thum hi.

Tulaitak ih phut khak i gal pen kimuhdahna, ngaihsutna pai khial, thukhun omlohna, ngongtatna, natna, nasep neihlohna leh lamet neih lohnate ahi hi.

I khialhnate a man theih nadingin kipuah pha ding hi hang. Naupangte in sangah bitna a ngah nadingun bawl ding hi hang. Pulnatna zong do zawh sawm ding hi hang.

Numeiten vote a piak theih nadingun kum tampi mipi tampi in lungphona nei ngei uh hi. Tu ni-in a masa pen numei khat kumpi inn sungah ong tonpih khin ta ing. A mah pen Vice President Kamala Harris hi.

Kei hong deihlote tungah thu hong gen nuam ing. Kei nong deihlohna uh zong om mah in teh. Hih pen Democracy hi. America hi. Hih nong deihlohna hang tawh ih kithutuahna kisia sak lo ding hi hang.

Kei pen America gam ii kumpi hi dingin ka kiciam hi. Kei hong deihte hi ta leh hong deihlohte adingin zong akibangin zingvai ka hawm ding hi.

Ei American khempeuhte akibang i ki-itna in lungmuanna, suahtakna, vaang, kizahtakna leh kipahtawinate ahi hi. Tua khit ciang thumanna zong hi.

Gam mi khat, American gam mi khat leh a diakdiak in gam makai khat ka hihna tawh gam thukhunpi tawh kituakin i gam ka kep ding vaipuak ka nei hi. Zuauphuahnate phiat zawh nading leh thumanna tawh galdo ding vaipuak ka nei hi.

Nasepna, Cidamna akipan mailam lungmuanna a omloh lam thei ing. Ka nu hong gen ngei thu khat in “Tawm vei sung mi dinmun pan en in hehpih in. Tua hileh khat vei ciang huhna a ngen na khut pen a piakhia khut hong suak ding hi.” Hih pen eite khempeuh in ih sep theih thu hi. Hih dan tawh hi leh ih gam hong cidam zaw ding hi. Hong khangto zaw ding a, mai lam ading zong kiginkholhna hong hi ding hi.

Mai lam kalsuanna dingte ah eite khat leh khat kisam hi hang. I gualzawh nadingin eite khempeuh i hanciam ding kisam hi. Politics vai pen nawlkhin phot in tulaitak i tuakhak Virus pen gam vaipuakpi in ngaihsun in sem khawm ding hi hang. Khut kilenin kantan khawm ding hi hang.

Leitung bup in eite hong etcik lam zong thei ing. Gam khat leh khat kizopna zong puah pha ding hing. Eite in a etteh tak dingin makaih ding hi hang. Gam khat leh khat kizopna ah kilemna, khantohna dingin a muanhuai zaw gam khat hisak ding hi hang.

“Pasian leh note khempeuh mai ah ong kiciam ing. Gambup thukhunpi pen kemcing ding hing. Democracy zong ka kembit ding hi. America gam ka kemcing ding hi. Ukna, thuneihnate ngaihsun masa loin mipi hoih nading thute ngaihsunin ka sem khia ding hi.” Translated By Lia Aungnu Source : One news Myanmar