Pilna or Siamna? ~ Dal Sian Hung

I nuntakna ah pilna le siamna koi thupi zaw?
Pilna i cih in bang hiam?
Siamna i cih in bang hiam?

Ka Pu
Ka khua uh pen khuaneu khat hi in, thatang tawh nasepna mun hi. Mi a tamzaw in muallo kho in nuntak kivakna in nei hi. Kapute khat sang kahkah in BA hongzo hi. Amah pen pilna nei ahih mah bangin lokhawh sangin a baihzaw nasep ngaihsun thei hi. Khua panin sakol kawmin beli, zasan, vaimim, nahthak cihte la in Tonsim ah va zuak zelzel hi.

Khua sungah lo kho ngiatngiat ten buh bung 300 innkuan khat in a neih dinguh hamsa mahmah hi. Kapu ahih leh van zuakin Tonsim kha khat li vei nga vei bang pai thei hi.

Kapu in kumkhat vanzuak asep sungin buh bung 3000 leizo mawk hi. Khuakhal buh hamsat hun ciangin zuak kik in a zah nih bang met mawk hi. Hidan nasep theihpen pilna hi.

Ka U
Ka innlak U khat tan 4 khawng bek hi. Ahiangin amah zong khuak zang mahin nasem thei khat ahih manin nek le dawn ah khuasungah nek lim pen pawl hipah hi.

Amah zong lo kho peuhmahlo in, khua-kim khuapam panin Bawng, Sial, Lawi, Sakol cihte lei in Tonsim ah vazuak zel hi. Lo kho tangtangte sangin nek lim zaw pek hi.

Khua sungah a kiman mahmah-a Bawng kizuak khat a zak ciangin va dawp hi. Tua bawngtal pen hoih mahmah in Ks. 5000 tawh lei theih dingin kiho siang uh hi.

Tua bawng pen Tonsim ah zuak leh Ks 60000 olno takin kikhawng ding cih muhkholhna nei ahih manin ama’ neihsa Ks 10000 tawh a lei bawngpi khat Ks. 5000 in hong zuak hi.

Ks. 10000 tawh a lei bawngpi Ks. 5000 tawh hong zuak teh khuapih ten hai sa mahmah hi. Ahi zongin aman tua tulnga tawh bawngtal khat hong lei in Tonsim ah Ks. 65000 in va zuak thei hi.

A bawngpi tulnga in zuak loin Tonsim ah vakhia hileh Ks. 20000 val peuhmah khawng zolo ding hi. Ahi zongin tulsawm guk ngah kik theih nading lampi thei a hih manin sum ngam masa hi. Hih pen pilna hi.

Ka Khuapihte Khat
Khua sungah Zothau bawl thei khut siam mahmah khat om hi. Thau khat a bawlzawh nadingin ni 4 bit bang hunpia hi. Tua Zothau khat ciangin Ks. 3000 bang man hi.

Thau bawl bekbek tawh kumkhat in buh bung 2000 bangmah kholzo a, buh tawm hunciangin zuakkik leh a azah nih bangmah met hi. Ama’ khutsiamna tawh khuasa zo suak hi.

Zomi Khun Sa
Khun Sa kici pen Shan State ah mihau pen leh nasep khauhpai mahmah khat in i ciamteh hi. Beng (Zavom-Zakang) ciing in tua tawh leitungbup ah amin hong dawk hi.

Kalaymyo khuk sungah zong Zomi Khun Sa om kici hi. Ahi zongin title bek cian denin a mai ki laihlaih dan hihtuak hi. Hih Khun Sa title neipa pen khuak tai mahmah ci hi.

Thukan-Thauhlanzi ten a inn velcianna a vaneih leh a inn pen mi mawkmawkte inn dan mah hilel a, taihinnpi cih bang nahilo hi. Tua banah ‘Aaungbali” letmat bekbek mu hi.

Hih Zomi Khun Sa pen a khuak tai mahmah in “Aungbali” pauh a theih nak leh a zah nih bangin va lei zelzel hih tuak hi. Thauhlanzi tenzong mi genzah hau kenteh cita uh hi.

Hih zong pilna mah hizel hi. Neihsa khempeuh a kilang ziahzuah a sepkhiatna, pholak khiatna pen a lau huai mahmah thu khat ahi hi. Pilna hangin sihna ding pan tampi honkhia hi.

Sang pilna leh Tualsuak pilna
Zomi sungah PhD dong a tungkhin tampi ki om hi. PhD khempeuh in ankhing khomlo mawk hi. BA genloh tan 10 a sinkhalo pawlkhat leuleu in ankhing khom zawhna ciangciang khuak nei hi.

Tualsuak Khuak Nei Zomi Mi thupi pawlkhat
1. Sia Dam Suan Mung
2. Sia Go Cin Zam
3. Sia Langh Do Khup
1. Sia Dam Suan Mung

Sia Mungtawng pen a nasepzia leh apilna i et ciangin tualsuak khuak mahin leek zaw mawk hi. PhD tenzong ama’ sep zah leh ama’ ngaiihsutzia a phak lohna tampi om mawk hi.

Leitungbup ah ki theitham ding Pawlpi nei in a mun munah Minitries nasepnate thupi thei mahmah hi.

2. Sia Go Cin Zam
Pilna tawphah kician nei cih ciang hi in, PhD khawng a ngah hipeuhmahlo hi. Ahi zongin ama’ nasepzia pen gamkhat level makaipi dinmun himawk hi. Kawlgambup ai-ah OM ah National Director dinmun lazo mawk hi.

Ama’ Administrative nuai ah PhD honkhat khut zat in nei thei cih pen pianpih khuak pilna mah himawk hi.

3. Sia Langh Do Khup
Zolai tan 4 zo khia ciang khawng himai hi. Pianpih khuak hoih mahmah ahih manin Zomi sungah Pasian nasem Millionaire khat suak zo mawk hi.

Ama’ khutsiamna tuamtuamte: Sia Do Khup pen muhna thak a nei den khangno lungsim pua, anavak sinsen khat ahi hi. IT Proffesional khat zahin Computer siam mawk hi.

Vision kician nei in Mission nasepna mahmah zong Chin taungpai gammial phu masa Minister hong suak mawk hi. Taungpai lamten i PhD te khawng hong theihpihlo in Sia Do Khup bek mah na thei mawk uh hi. Hihte pen pianpih khuak mah himawk hi.

Thu Khinkhaina
I Zomi sung ahuampi in i et ciangin Sang kah khalo, sang kah zolo sang pilna, laitan pilna neilo khangno 75% bang ki om ding hi. Khangual tawh i ki et kak ciangin tualngiam kisa mahmah in a lungkia tampi i om kha ding hi.

Hih a tunga i mi masa, i makai, i siate’ dinmun tawh tha lak huai ka sa mahmah hi. Laitan neikeng, pilna neikeng cikha peuhmah kei in. Pasian in mihingte hong piak khuak pen a kibang hilel hi. A khuak zangtheite a lawhcing hi.

Pawlkhat ten gamdang tungzote bek mi suak ding sa kha hi. Khuak zangtheite adingin i om om na pen khantoh theihna mun vive hipah lel hi. Thu i kan loh manin thu kimu lo hibek lel hi.

Kalaymyo
Kalaymyo pen nasep tam mahmahna mun ci-in Mandalay lam, Monyua lam khawng panin nasem dingin a hon honin Kalaymyo ah ong kah to ziahziah uh a, taihinn lamna ah let-ta-ma sem tawh, pa-yaan sem tawh mi hong tun ziahziah laitak in ei Zomi ten nasep ding omlo i cici lai hi.

Let-ta-ma khawng, pa-yaan khawng tawh zong nuntak nop khop zawhna a piangzo lua ahi hi. Kawlgam a om te ading bangin hun tawlkhat sung mah pia in siamna i sin theih ding thupi hi. I sepna khat peuhpeuh ah senior i suah khit ciangin nuntakna hong piangsak zo siamna a kingah ahi hi.

Dal Sian Hung