Amyota Hlotdaw MP Pi Cing Ngaih Mang tung aa, lai tin tholh kikna

Amyota Hlotdaw MP Pi Cing Ngaih Mang tung aa, lai tin tholh kikna

ZIUSA kumcin khawmpi zinmangpi aa hong pai, Amyota Hlotdaw MP pi Cing Ngaih Mang tung ah, July 05, 2019 ni ” Zomi Political Forum” hun sungah, Forum Panelist khat ka hi na dung zui in, ka tin (Submit) lai pen bang hiam cih a theinuam mimal aa hong dong pawlkhat om aa, tua mimal te khualna in leh, hih lai in thusim hilo ahih teh Zomi khat peuh in a theih nop khak leh cih natawh, ih Zomi group pawl khat leh mimal email aa kizop pih ngei pawl khat tung kong khak hi.

Ih Tedim leh Tonzang gam pan telcing Zomi MP khempeuh leh Tedim, Tonzang AD te zong copy khat ciat pia in, pu Mang (Pi Cing Ngaih Mang pasal) maingap natawh cialin, copy addressee te tung hong na’piak sawnsak nading in ka khak pah hi. Ken’ lah kan zo nawnlo, copy ka piak te khat na’ngawn in, na lai tin ngah ing hong ci omlo ahih man’in, hih lai tawh zong na ngah uh leh ngahloh hong dongkik ka hi. Na ngah naikei zenzen uh leh zong copy hong pia ka hipah hi. Ih Zogam ading deihsak natawh, Khupkhan Thang Taithul

To, Your Excellency Pi Cing Ngaih Mang
Member of Parliament, Amyota Hlotdaw
Tongzang Township, Chin State.

From, Khupkhan Thang Taithul
5104 Ladbrook Street
Norman, OK 73072
USA. (405) 409 0536.
Date: July 5, 2019.

Subject: Zomi MP te tung deihngetna (Motion).

1. Khuahun lauhuaina genkholhna. (Dire Weather Predictions.)

Scientist ten Global Warming hang in, leitung satna khang khang hi ci hi. Kum zalom 20 na (20th Century) in leitung satna 1.44 degree Fahrenheit khang in, Tuipi mai letmat 4-8 ciang khang hi ci uhhi. Hih bang in ih awlmawh kei leh kum zalom 21na (21st Century) leitung satna 1.98F pan 11.52F ciang khang thei ding aa, tuipi mai letmat 19 pan 37 ciang khang thei ding hi ci uh hi. (Time: Global Warming 2007) A mau tuatna sangin leitung satna (Global Warming) hong manlang zaw ahih man in, tu kum sung in, nisaa luatna, khuadam luatna, huihpi guahpi uangluatna, gamkaang meikaang phelh zawhloh, keugawgam suah na (Drought), te leitung gam tuamtuam in ih thuak ta hi.

Hi thu diahdiah ding hilo aa, ihgam ihlei ah ih hihzawh zahzah ih seppah ding hita hi. Ih zak ngeilo, Tahan, Taungphila lam ah tui khukte kangh, Zogam ah luitui te tawm cih ihza kawikawi hi. Cikha, Tonzang, Tedim khamtung khua te nangwn ah khua lum dan kilim gen mahmah hi.

Aziakai maa in; MP teng in, hih thu nong sep uh kul ding hi.

• (1). Tui cilzat ding. (Conserve Water)
• (2).Tuinak kuam cing’ ding. (Protect Water Catchment Area)
• (3). Taam’pi Gammang Tulak teng kemcing ding (Reserve Our Forest.)
• (4). Gamlak ganhing thatlo in khawi ding (Wildlife Conservation, Sanctuary.)
• (5) Ganhing vasate omna te kemcingh ding. (Protect Wild Animal and Birds Habitats.
• (6) Tui ganhing te kemcing ding (Preserve Aquatic Animals)

2. Chin State Gamgi British hun lai aa hong khensakna teng ngenkik ding (Reclaim our Boundary demarcated by the British Government)

Nidangin Chin Hills gamgi Bohtai Kalaymyo leh Tulsuk kikal “Phaai” ah kiphut hi. Tu in Tulsuk ah khinto uh hi. Tua mah bangin Gangaw lam ah zong gamgi Bohtai mualbul ah na khinto uhhi. Magwe Division leh Sagaing Division te in Chin State gamgi mualbul ciang ah hong khinto uh hi. Chin State in ih zaanglei hoih teng ih tan hi. Hih gamgi khin vai pen siimmawh zawhthawhna (Contemptuous Bullied) tawh hong kikhinsak uh ahi hi. Chin State buppi MP teng in, lungsim kitauk in ih lakkik ding ahi hi.

3. Tedim pan Kalaymyo leh Tonzang pan Khampat-Kalaymyo mawtaw lamthak siaal’ ding.

Kalaymyo pan Haka ciang Pyidaungsuh Lanmagyi hi aa, Kumpi in, sumtampi bei in hong puahsak hi. Tu-in Haka te in Falam khua nawk/tawn nawnlo in, Kalaymyo pan Haka direct lampi siaal ding hamciamsim uh hi. Tai 30 bang tom zaw hi ci uhhi. Zong hong hihzo takpi ding uhhi. Falam te in zong Webula lampi omsa upgrade in zatding lungngai ta uhhi. (Webula pen Myo/ town thak hi.) Tai 25 pan 30 bang tom zaw ding ci hi. Hih Capital khuapi leh District Hq. te in, lampi dang/ thak hong nei khin uh leh, Kalaymyo pan Taingen, Tedim kumpi in, Pyidaungsuh Lanmagyi in hong koih nawnlo ding aa, sumtampi bei in, hong puahsak nawnlo ding hi. Tua hi leh Tonzang, Cikha zong aman’ linlian ding ih hihi.

Tua ahih ciangin Tedim pan Kalaymyo lampi thak ih zonkul ding hi. Nidang aa alignment kizongsa, Lawibual pan leilum, Sezang, Sonsing lamka ah, tua pan Tuisau, Tawlciang ah, Pimpih ah Kalaymyo ah ihsial kul ngeingei ding hi. Tai 20 pan 25 bang tomzaw ding hi. Tua main Road pan Feeder Road; Vando, Tui Vial, Dolluang, Tamdeng, Thangsan, etc Thangkai kual khua teng tawh kizomto thei pah ding hi.
Tonzang pan Khampat-Kalaymyo lampi thak khat ih sial/tawh kul ding hi. Tai 50 tom tuam ding in ka um hi. Tonzang gamthu tam theihlo ka hih man’ in tampi kong gen thei kei hi. Thaangkaai Zokual khua tampi in nop tuampih pah ding hi.

Hih Motion thum teng Tedim leh Tonzang Myone MP teng leh Tedim, Tonzang AD te in hong vaan in tavuan nong lak nang uh zahtakna lianpi tawh kong thum hi.

Copy to:

• 1. Your Excellency Pu Cin Sian Thang MP, Pyitu Hlotdaw, Tedim.
• 2. Your Excellency Pu Kham Khan Thang MP, Pyitu Hlotdaw, Tonzang.
• 3. Your Excellency Pu Gin Kam Lian MP, Amyota Hlotdaw, Tedim.
• 4. Your Excellency Pu Cin Khan Pau MP, Amyota Hlotdaw, Tedim.
• 5. Hon’ble Pu Pau Lun Min Thang, Chin State Minister.
• 6. Hon’ble Pu Suan Do Cin MP, Chin State Hlotdaw, Tedim.
• 7. Hon’ble Pu Thang Deih Khup MP, Chin State Hlotdaw, Tedim.
• 8. Hon’ble Pu Thawng Khaw Mang MP, Chin State Hlotdaw, Tonzang.
• 9. U Go Suan Khai, AD Tedim.
• 10. AD, Tonzang
• 11. Chairman, Board of Directors, ZIUSA.
• 12. Executive Director, ZIUSA.
• 13. ZIUSA File.