Phone zangkawm in khetulsang abulh numeikhat akhe hawkguamsin ah awksak

Phone zangkawm in khetulsang abulh numeikhat akhe hawkguamsin ah awksak

Numeikhat Mobile Phone limetlua, azat kawmkawm in khetawh apaina leh hawkguam asin sikkhialkha in akhe awksak cih Yahoo pan kiza hi. Tua numeinu pen akhedapzong khetulsangte hisawnsawn a, tawlpikhat akhe awkcip hi.

Hih thuthang pen China gamsung thupiang kici a, khetawh mi tampi apai ziahziahna lamzikpi khatah thupiang kici hi.

Lampai nading hoihtak enlo in, Mobile Phone bekbek limet luamahmah ahih manin, Lesson khauhtak in atuak kici hi.

Hih Chinese numeinu pen kum 20 gualpawl kici a, khedap khetulsang khat bulhsawnsawn in, hawkguam akisitna Metal Drain Cover kawmkam asik khialkha ahihi.

Akhe pen apheiciang bang tumsuk kici a, ageinai aomte’n siksem leh Tools pawlkhat kawmsak in, tuatawh honkhiading in kithawi uhhi.

Siksem, siktawn tawh kalkhia in, tuaciang in damdam in kaikhiading in kithawi a, ahi zongin numeinu in na salua ahih manin, awngzel in khawlbawlzel uhhi.

Tamveipi tuabang in siksem tawh kalkhia in, kithawizel uh a, anunung ah honkhiathei in, bangmah liamna huaisialuapi omlo cihi.

Video: Woman staring at phone while walking in high heels gets trapped in drain

Nung July khasung inzong China gamsung mahah kum 20 gual numeikhatin Phone enkawmkawm in apaileh lei tungpan kia in sihlawhliang hi.

Hihbangdan Smartphone hangin buaina pen China gamsung ah kiza zelzel hi. Nung April khasung inzong Fujian Province sungah mawtawhawl khatin Phone kiho kawmkawm in mawtawhawl ahih manin, naupangno kum 2 aphapan pasal khat taihlumkha cihi.

Leitung gamtuamtuam ahzong Smartphone hong omkhitzawh tuahsiatna tampi kibehlap kici hi.

More: Kum 20 gual numeikhat Phone enkawmkawm in apaileh lei tungpan kia in si

US gamsung ahzong Smartphone zatna hangin khetawh khuasungvak “Pedestrians” asi tammahmah cihi. Abeisa March khasung in United States Governors Highway Safety Association (GHSA) te’n pulakna khat neikhia uh a, 2016 kumsung in Pedestrian asi mi 6000 pha cimawk hi. Kumkhat sungin tuazahzah asipen omngeilo a, abeisa kum 20 sungah atampenpen cimawk hi.

Khuasung vakciangin khetawh ihpai zongin, mawtaw ihhawl zongin Smartphone te limzatluat lohding leh lungsim pumpi ngaihsutna khempeuh Phone sungah tunsaklohding kidop huai mahmah hi. Sawltak #zomidaily