Phone Screen khaangkhampi azatna hangin akhutpi tankhiat kuldektak

Phone Screen khaangkhampi azatna hangin akhutpi tankhiat kuldektak

Tuhun pen mikhempeuh Phone zatloh aphatmawhhun hi a, pawlkhat te’n a Phone Screen ahih keileh Screen Protector te akitamzaan pipimah in laihtuanlo in zangteitei uhhi. Malaysia gamsung ahzong pasal khatin a Phone Screen kitampipi in azatna hangin akhutme suplawhdektak, tankhiat kuldektak cih Metro News pan kiza hi.

Tua Malaysia gammipa pen amin Azuan Iqbal Abdullah Sani kici a, kum 23 aphakhin khat ahihi. A Mobile Phone zat ii atungah atuamna Screen Protector pen kitam, khaangkham in, ahi zongin tuapipi mahtawh kha 4 sungbang zangsuaksuak veve hi.

Adiakdiak in a Smartphone tungtawn in Game kimawlthei zelzel a, akhutpi (Thumb) pen limzat phadiak hi. Kha 4 sungbang Phone akhaangkhampi tawh azatzat khitciangin ataklam akhutpi asiduppian abawk bangdan in aomlam theipan hi.

Tuaciang in Doctor khatkiang ah kilak a, tua Doctor inzong gu lutkha hiding hi ci’n Antibiotics leh ana athuaklahloh nadingin Painkillers pawlkhat pia hi.

Ahi zongin akhutpi pen bawkngawh semsem a, ahi zongin apualam panin aliamna bangmah kimulo hi. Private Hospital khatah alungnoplo in akilah ciangin akhutpi pen amanlang in atding, Surgery bawlding cimawk hi. Tuabangin Surgery abawlpah keileh akhutpi pen tankhiat (Amputated) kulkha theiding cisawnsawn hi.

Ahangpen tuapa in a Phone Screen akitampipi in azat ciangin mittawh muhtheihloh maanthemneng (Glass Shards) tepen akhutpi asungah lutin, tuahangin guluk in abawk ahihi.

Amahzong akhutpi tankhiat kulthei dinmun ah aomlam akitheih ciangin patau mahmah a, baihtak in Screen Protector akikhekthei hilel a, kakhekkhakloh mahmah ka khialhna hi. Midang tezong keibang in apiankhakding ka patauhsak mahmah hi ci’n genkhia hi.

More: Smartphone leh Tablets te Naupang adingin lauhuai ~ Pau Do Lian

Hih thuthang tungtawn in, tulai khangnote Mobile Phone, Smartphone azanglo omlo ihhih manin, phawk khinkhianding thupi hi. Adiakdiak in naupangno te’n Phone Screen akitam cihkhawng theician khollo in, Phone amuh nakleh Game kimawl, YouTube ah video en cihbangin atoktok, azutzutnuam uh ahih manin lauhuai phadiak hi. Sawltak #zomidaily