Philippines ah IS migilo tetawh akizom te’n Germany gammi khat a ngawng tansak

Philippines ah IS migilo tetawh akizom te’n Germany gammi khat a ngawng tansak

Philippines gamsung aom IS tawh akizom thautawi migilo te’n Germany gammi khat a ngawng tansak uh cih Reuters pan kiza hi. Tua thautawi migilo tepen Abu Sayyaf Militants te kici a, Islamic State akici IS tetawh akizom uh ahihi.

Hih Germany gammipa pen tua thautawi migilo te’n sumtawh tatkhiatsak dingin amat uh hi a, $600,000 tawh hong tankhia un ci’n atangko uh himahleh ani aciangtan uh khengvalta ahih manin, agensa mahbang un a ngawng tatsak takpi cimawk hi.

Ngawngtan athuak Germany gammipa minpen Jurgen Kantner hi a, kum 70 aphakhin puteek cihtheihta khat ahihi. Amah aman migilo te’n Video nihvei bang zaihin khahkhia uh a, huhna ngensak hi. Anunung Video akhahkhiatna ah $600,000 tawh February 27, nitak 3pm hunma in hongtan un. Nongtatkei uhleh ka ngawn temta tawh hong bantan tading uhhi ci’n genkhiasak hi.

Aciangtan anipen zanni in khengkhinta ahih manin, agensa mahbangin un migilo te’n tua Jurgen Kantner pen a ngawng bantansak in, Video zong khahkhia uh cihi.

Philippine Peace Process ah Presidential Adviser asem ahi Jesus Dureza akicipa in agenkhiatna ah Jurgen Kantner pen ka septheihbang un anuntakna hotkhiatding kakipan uh a, Jolo Island ah omding cih katheih uhhang in ka mukhiazo kei uh ci’n genkhia hi.

Hihbang in mawhneilo mihing khat hong ngawngtansak leuleu uhpen kamawhsak mahmah uhhi ci’n genkhia hi. Hihbang gamtatna te akhawltheih nadingin kanak hanciam mahmahding cih genkhia hi.

Jurgen Kantner leh alawmte pen abeisa November khasugn in tuipitung ah Sailing khualzin in aom uh hi a, Eastern Malaysia, Sabah gamsung ah migilo te’n naman uhhi. Tuapan in Jolo Island akicihna tuikulhna paipih uh a, alawmnu inzong akimat in na lehdosawm ahih manin, kaplup thuakkhin hi.

Nungkum inzong Abu Sayyaf migilo te’n Jolo Island mahah Canada gammi 2 a ngawng tansakmawk uhhi.

Hih migilo kipawlna Abu Sayyaf tepen 1990 kumpawl in akipankhia hi a, thauhoih tuamtuam tawi in mimawkmat in sumtawh kitansak zelzel uhhi. Akipat khiatzawh uh sum Dollars million tampitak ngenkhinding uh ci’n Security Experts te’n genkhia hi.

Tulaitak zong hih Abu Sayyaf migilo te’n sumtawh tatsakding in akep uh Hostages mi 26 bang kemlaiding kici hi. Tualak ah mi 13 pen Vietnamese, mi 7 pen Filipinos, Duthch National khat, Japanese khat, Indonesian 2 leh Malaysian 2 cihbang ahi uhhi. Sumtawh tansak in akhahkhit uhzong mi tampi omkhin cih kiza hi. ZD Sawltak #zomidaily