Philippines ah Bomb kitam, mi 14 si, 67 liam

Philippines ah Bomb kitam, mi 14 si, 67 liam

Philippines gamsung Roxas Boulevard ah zanni Friday (02 September) ni in Bomb puakkham a, mi 14 si in adang mi 67 liam cih AFP News pan kiza hi. Hih Bomb puakkhapna munpen nitaklam van akizuakna Night Martet khat hi a, vanlei vanzuak mipi tampi aki kaihkhopna munkhat ahihi.

Presidential Communications Secretary Martin Andanar in agenkhiatna ah hih Bomb sukhampen genkhiattheih nadingin ki theiciannailo cihi. Ahi zongin nungdiak in Abu Sayyaf Bandit Group kici te’n President Duterte ii nasepzia pen diksalo uh ahih manin aphu hong lakiknung ci’n vauna nei ngei uh cih kiza hi.

Hih Bomb puakkhapna munah mi zatampi apaizuaizuaiden uh hi a, nektheih tuamtuam leh cimekna akipan vantuamtuam aki leitheihna munkhat ahihi. Ateneo de Davao University tawhzong Meter 100 khawngbek kigamla in, hih buaina apianciang in sanginn zong ki kalhcippah cihi.

John Rhyl Sialmo III kici sangnaupang khat ii genkhiatna ah nitak Meeting kaneih laitak un agin ngaihkhialua mahmah khat kaza uh a, hipeuhmah Bomb puakkham hingelngel dinghi kaci uh cihi. Hih sangnaupangpa pen kum 20 bek hipan a, Ateneo de Davao University ah sangkah laitak ahihi.

Bomb puakkhapna pen cimek Massage Parlour geipan hi a, tua cimek saipan in numei pasal pawlkhat anasepna Uniform tawh hong taikhia uh a, sanginnlam zuanin hongpai uhhi. A pumpi tunguh ah sisan naisan tawh kituamcip uhhi ci’n sangnaupangpa in genkhia hi.

Hih kuamsungteng pen President Duterte apaitheih zelzelna munteng kici a, nungdiak mahmah inzong President Duterte ki suamlupsawm cihthu kiza hi. ZD Sawltak #zomidaily