Phalbi tunma in hong pai in (A New Year Message) ~ Rev. Zam Khat Kham

Phalbi tunma in hong pai in (A New Year Message) ~ Rev. Zam Khat Kham

“Phalbi tun ma-in na hihtheih tawp-in hih lai mun hong tung in.” 2 Timothy 4:21 Laisiangtho in hun tawh kisai a genna tam simsim hi. Tua banga a genna khempeuh lakah i theihsa thu khat om a, tua pen i hunte kiciangtan mahmah cih thu ahi hi. Hun i cih a man nei-in kizang thei-a, a man nei lo-in kimawkbeisak thei hi. Hun i cih a bei khit teh kila kik thei ngiat lo hi.

A peuhmah-in “hun” i cih bang hi mawk ahi hiam? I ngaihsut ngei khol loh hangin “hun” i cih bang hiam cih ngaihsun taktakin gen taktak ni ci lehang genhak peuhmah hi. J. T. Fraser bang in hun i cih “the familiar stranger” (i kimeltheihpih mahmah mikhual/midangpi khat) hi, ci ngeuzen hi (J. T. Fraser, Time: The Familiar Stranger (Amherst: University of Massachusetts Press, 1987).

Christian tangthu ah mipil penpen khat-a kiciamteh St. Augustine in, “What, then, is time? If no one asks me, I know; but if I wish to explain it to one who asks, I know not” (Tua ahih leh hun i cih bang ahi hiam? Kuamah in hong dong kei leh ka thei hi; ahi zongin hong dong khatpeuh tung ah gencian sawm leng, ka thei kei hi) na ci ngeungau hi (Augustine, Confessions 11.14).

Biola University a professor sem Christian philosopher-theologian Dr. William Lane Craig in, “Time, it has been said, is what keeps everything from happening at once” (Hun i cih na khempeuh thakhat thu-a a pian hun kibanga a piangsak lo/a pian nading pan-a dal/khaam pen hi) ci-in na gen ngei a (Wiiliam Lane Craig, Time and Eternity: Exploring God’s Relationsip to Time (Wheaton: Crossway, 2001), 13), tua zong ciamnuih laibu sung khat ah a muh hi a, tua definition mah phyics lam-a minthang mahmah John Wheeler in Russian cosmologist Igor Novikov a laikhakna sung ah hun i cih bang ahi hiam cih ama’ kankhiatna tungtawn-a a muhna a genna ah na zang ngei hi, ci-in gen hi (Igor D. Novikov, The River of Time (Cambridge: Cambridge University Press, 1998),199).

Laisiangtho sung ah hun tawh kisai a kigennate lakah i sim mun mahmah mun khat om a, Thuhilhsia (Ecclesiastes) 3 sung ahi hi:

• Na khempeuh ading hun om ciat hi,
• Van nuai leitung ah sepna bawlna khat ciat ading khuahun om ciat hi.
• Suah hun om-a, sih hun om hi,
• Suan hun om-a, bawh hun om hi,
• Thah hun om-a, damsak hun om hi,
• Phel hun om-a, lam hun om hi,
• Kah hun om-a, nuih hun om hi.
• Thuum hun om-a, laam hun om hi.

Hun thupi hi. Mi khatpeuh ading hun cih a bei ciangin tua mi’ adingin a nuntakna zong a bei ta hi pah hi. Tua ahih manin “hun” a kici i neih lai-a i septe thupi mahmah hi. Khatveivei bang hun in hong ukcip hi leh i kilawm hun om hi. Lawmte khat tawh kimu dinga niangtui sai ah ka tutkhop uh leh sabuai tung ah a cell phone hong koih a, “Lawmte khat in hong hopih ding hi veh aw, ka zak loh khak ding” ci ngiatzen hi. Ka ngaihsutsut ciangin tuhun khang mite in mimal-a i kihona sangin phone-a i kihona ah hun tam zang zaw phial leng a kilawm hun om ka sa hi.

A hun zui-in midangte tawh i kiho, i kizop zia zong kikhelkhel hi. Mangkangte mipil simtham khat in a genna ah: Kum 60 val mite in khutlam tawh kigelh ngiat laikhak kigelh ngiatngiatte phawk lai ding hi. Kum 40-60 mi khat in email nak zat hi. Kum 40 nuaisiahte in instant messaging zang deuh hi. Kum 30 nuaisiah in Facebook, FB Messenger, WhatApp , cihte zang hi, ci sezen-a hi gige hi. Bangbang bangbang i zang zongin i hunte mah a zangzang i hihi.

I phawk gige ding thu khat om hi: I hunte i khut sung ah om lo a, i nuntakna sau lua khol lo hi. Hih thu hang mah-in Late laphuakpa in, “Pilna/ciimna lungtang/lungsim ka neih theih nadingun ka nite uh ka sim ding uh hong hilh in” ci-in thu na ngen hi (Late 90:12). Laisiangtho mah in i hunte i zatsiam ding hong hilh hi (Ephesians 5:16). Laisiangtho Mangkam-a kitei khat bang ah hih mun pen “make every minute count” ci-in na tei se a khiatna nei mahmah hi. Zing cianga si ding, thai cianga si ding i hih lam thei lian hehang tuni-a i hun zat zia bel kilamdang taktak ding hi. Minute khat zong mawk beisak-in ki-um kei mawk ing!

Sawltakpi Paul’ Lungsim

Sawltakpi Paul thong sung ah om hi. A nihveina thong a kiat laitak hi. A masa pen “house arrest” nam pian hi a, galkapte in a cin teii hangin suakta lel-in Jesuh’ hong hotkhiatna thu teci pang thei lel hi. Tu-a thong a kiat kikna bel Rome mah hi a, ahi zongin a daam mahmah, a mial mahmah thonginn sung ah kikhumcip hi. Laisiangtho Thuciam Thak sung ah Paul’ laikhak 13 i nei hi. Tuate lak-a a nunungpen hih 2 Timothy hi a, a sih kuan-a upna thu-a a tapa Timothy tung ah a khak a laikhak ahi hi. Chapter 4 i sim ciangin Paul laikhak khempeuh laka a nunungpen, a kammal nunungpente a sim i hihi. Roman Emperor Nero in Paul a kithah nading thupia ahih manin a sawt lo-in a ngawng kitan-a si ahi hi.

Tua ahih leh hih laikhak a gelh hun laitakin Paul’ lungsim ah bang a om pen hiam? A sih kuan-in Paul lungsim ah thudangdangte sangin “mi” om hi. A naseppih a lawm a gualte om hi. Upna thu-a a tapa Timothy om hi. Amah mahmah leh Pasian’ thu leh Pasian’ nasepna sangin leitung a it zaw (leitung thupisa zaw) Demas thu ngaihsun hi. A lawm dangte, mun danga Pasian’ nasem-a om Crrescens, Titus, Tychicus-te ngaihsun hi. Rome ah amah tawh omkhawm gige-a amah a don a kem den Siavuan Luke’ thu ngaihsun-a Pasian’ tung ah a lungdam hi.

Lungdamna thu a tangkona ah a langpan den Alexander’ thu zong ngaihsun hi. Mun tuamtuam-a om mite leh pawlpite hopih kawikawi a, Rome khua-a thu-ummite’ hopihna Timothy tung ah gensawn hi. Thusitna a thuakna ah Pasian amah tawh om khawm den ahih manin a lungdamna zong Timothy ko lai hi. Humpi kam panin amah a honkhia Pasian mah in honkhia lai dinga ni khat ni ciangin vantung gam sung lut ta ding, cih zong na gen hi.

Thu dang tuamtuamte sangin Timothy hong pai mengmenga a sih ma-a a kimuh ding uh lunggulh lua hi. I theihsa mahbangin (I Timothy tungtawin) Timothy pen Ephesus khua ah pastor sem-a om hi a, Ephesus khua leh Rome khua kigamla mahmah hi. Ni tampi, kha tampi kipai kha ding hi. A kammal mahmah ngai dih ve ni e:

• “Na hih theih tawp-in kei’ kiang ah hong pai mengmeng in.” (v.9)
• “Mark hong zawn inla hong tonpih hamtang in.” (v. 11)
• “Nong pai ciangin Troas khua a Carpus kiang aka nusiat ka puantualpi hong puak inla, ka laizialte zong, a
• diakdiakin ka savun laizialte, hong puak hamtang in.” (v. 12)
• “Phalbi tun ma-in na hihtheih tawp-in hih lai mun hong tung in.” (v.21)

King James Version ah hih verse 21 pen kammal thum tawh na tei ziau-a bun peuhmah hi: “Come before winter.” “Timothy aw, ka sih ma-in hong mu nuam ing. Hong pai in, nong pai veve lah phalbi tun ma-in hong pai hamtang in. Hong manlang in. Ziakai kei in. Sawtpi om nawn kei leng kilawm hi. Ka tapa aw, ka lawm aw, hong pai mengmeng in,” a ci hi mawk hi.

Martin Luther King, Jr. in America gam tangthu ah a minthang mahmah Civil Rights Movement hun lai-in Washington DC a Lincoln Memorial pan mipite’ tung ah thu a genna ah, “We have also come to this hollowed spot to remind America of the fierce urgency of now” cih kammal na zang sezen hi. “The fierce urgency of now!” Hih kammal in bun taktak hi. Kisot toto thei nawn lo; uaikaii theih om nawn lo, cihna hi. Tumah-a sep ding thu a gen ahi hi.

Clarence McCarthy in kum 30 sung America gam Pennsylvania state sunga Pittsburgh khuapi a First Presbyterian Church ah pastor sem hi. Kum sim-in “Come before winter” cih sermon hih Laisiangtho mun bulphuh-in gen den hi. Tamveiipi gen hi; kicimtaak vet lo hi. Zaknop kisa mahmah den hi. Kum zalom 20 sunga thuhilhna sermon lakah a minthang pen khat suak hi. Tamveipi ka ngai ngei a, tamveipi lai-in ka sim ngei hi. Tua sermon pan-in ngaihsutna tampi la-in hih sermon kong gelh ahi hi.

I. Banghangin Phalbi Tun Ma Ci Sese?

Phalbi sungin tuipi tunga khualzinna haksa thei hi, ci hi. Khatveivei kizin thei lo phial hih tuak hi. Timothy ziakai leh Paul’ sih ma lap lo kha ding ahih manin phalbi tun ma-in hong pai in, a ci ahi hi.

Ute naute, i nuntakna sung ah phalbi tun ma-a i sep kei leh cikmah-a i sep theih nawn loh ding na tampi om thei ding hi. “ A hun a phaat” cih kammal khat i nei hi. A hun-a i sep kei leh tua hun hoih leh hamphatna kikhaksuah thei a, cikmah-in kingah kik nawn lo thei hi. James 4:13-17 sim lehang i nuntakna tuikhu bang hi, ci-in hong gen-a, tua mun tua khua ah zing ah thai ah pai-in sum zong ning, i cih hangin i hunte i khut sung ah a om loh lam hong telsak mahmah hi.

Nuntakna i cih kikhel ziauziau, lungmuanna om lo hi. Leitung-a thunei penpente laka khat ahi US Senator na hi phial zongin na ci hong nuam lo a siavuante’ kiang ah na pai leh na khuak sung ah a ki-at (khei) thei lo cancer tumor khat om, a tampen kha thum pan kha guk bek nungta ni teh, hong kici ziau leh na nuntakna-in bang man nawn peuhmah ahi hiam? Tu malam-in Senator Ted Kennedy tung ah tua bang lian piang ngei hi. Hunte i khut sung ah om het lo, cih kilang mahmah hi.

Ahih kei leh, mi khempeuh in a pahtaak Christian singer lasa siam khat zong na hi thei hi. A innkuan sung vuah dahna lianpi thakhat-in hong tung vat mawk, accident tuak uh a, a naupang uh si mawk. Mi khempeuh in dahpih mahmah. Steven Curtis Chapman-te innkuan a gen ka hi hi. 2005 kum December 22 ni-in Indianapolis Colts-te head coach Tony Dungi in phone call ngah-a, mi khempeuh in i kihtak ding, i limkhap ding kum 18 a pha a tapa James gui-awkin si, cih thu kigen geu ziaumawk hi. Bangzah-in a haksa zen tam.

Hehpih mahmah ing. Amah bel thu-um mi taktak khat ahih manin midangte hanthotna kam na gen thei zawsop bilbel a, “Na tate uh hun hoih na ngah sim-un kawi/pom (hug) den un. Hun hoih na ngah sim-in hong it ing, ci-in gen tangtang un. Bang hun pen tua banga na hih theih nading hun hoih nunung pen hong hi kha mai ding, cih na thei kei hi” ci zen hi.

Kuakua i hi zongin, a tunga i gen thute i tuahkhak se loh hangin nopna ahi a, dahna ahi zongin kipelh thei het lo a, kituak thei lua hi. Banghangin Paul in, “phalbi tun ma” ci sese hiam? Hunte i khut sung ah om lo, i nuntaknate tom lua, cih hong hilh hi. Thusia khatpeuh in hong lap ma-in, a ci hi mai hi.

II. Timothy A Pai Takpi Hiam?

Thei lo hi hang. Laisiangtho in hong gen kikna om nawn lo hi. Mystery khat hi. McCarthy in bel a sermon sung ah Timothy amah leh amah kihosak a, “Pai lua ding, ka pai loh phamawh. Rome ka pai loh phamawh, ahi zongin ka pai ma-in Ephesus ah ka sep loh a phamawh pawlkhat ka sep phot kul ding,” ci-in pai pak thei lo a, phalbi hong tung takpi-in pai thei nawn lo a, khuakhal kipat kik dong tembaw ngah zo nawn lo hi, cisak hi.

A tawpna ah khua hong khal ciangin tembaw tawh va pai thei sam hi. Rome a tun ciangin a lawmpa Paul zong kawikawi a, mun khempeuh ah a zon kawikawi hangin mu zo mahmah lo hi. A tawpna ah Claudia-te, Pudens-te, Linu-te tawh kimu a (2Timothy 4 sunga minte) tuate in, “Nang Timothy maw? Paul in hong nak muhnop zen hi ven maw! A sih ma-a nang tawh a kimuh ding bekbek thungetna-a a neih hi ven. Na tun theih mahmah loh hang a sih ni dongin hong lam-en veve lai ei! October kha sunga a ngawng kitan-a a sih kuanin, ‘Ka tapa Timothy na gen hamtang un aw, it mahmah ngai mahmah ka hi.

Vantung ah kimu ni, hong ci hi, na cihsak un’ ci-in hong vaikhak lai hi,” ci uh hi, ci-in gen hi. Tua bang takpi hiam i thei kei hi. Tua bang takpi hi zen leh bel nak khasiathuai lua hi. Ngakngak, tung thei lo, thu ngenngen, tung thei mahmah lo. A tawpna ah a mai mahmah a muh nop luat a tapa, a lawmpa mu kha lo a Paul si takpi zen maw! “Rome bel pai lua ding, Ephesus ah ka hih nop lai pawlkhat om” ci sese kei leh hoih ding hi ven mataw!

Dr. McCarthy in a sermon sunga a gen (Laisiangtho sung ah om lian lo) bangin piang taktak hi, cih theih nading bel om kei. Ahi zongin na khat peuhpeuh i sot tohtoh ciangin a piang lo ding pi piang thei a, a khasiat huaipi piang thei hi. Hell sunga mite “interview” thei hi lehang hell sung tun ding a tum ngiat om het lo ding hi; Sot toto, uaikaiikaii, a tawpna ah upmawh loh laitak keek mah-a sihna in pha, hell sung tung. I nuntakna leh i hunte ei’ khut sung ah om lo hi.

Khatvei dawi meeting khat om hi, ci (a kiphuaktawm hi!). Mite in hotkhiatna a san loh nadingun bang cih ding cih thu kikum uh hi. Dawi khat in, “Pasian om kei ci-in mite khem ning” ci hi. Satan in, “Khem zo kei niteh, mi khempeuh in Pasian cih khat a om lam thei tek uh hi” ci hi. Dawi dang khat in, “Hell om kei, ci-in khem ning” ci leuleu hi. Satan in, “Tua zong piang ke’n teh, leitung ah siatna tam mahmah a, vantung gam thu sangin hell gam thu ki-um baih zaw hi” ci hi. Dawi thumna in, “Hun tampi om lai, kin luat kul kei, ci-in mite lungnuamsak thapai ning” a cih leh Satan in, “Pai o, tua bangin sem o, nang’ ngaihsutna hoihpen ei” ci hi.

Kum thak hong tung ding hi. A beisa hun-a i sot tohtoh nate sem pah ni. Laisiangtho sim tangtang ni. Ni kum sangin hunget hat zaw ni. Mite i hehpih theih zawk nadingin kisin ni. Itna lak ni. Mawhmaisakna kisin ni. I kam khumsak ni. I lungsim thutangsak ni. Kawisak kei ni, maamsak ni. Kisik nading neukha hi.

III. Nang Hi Lecin Na Pai Pah Diam?

Pai pah dingin ki-um ing. Mataw, pai pahlian mah lo ding i hi maw! I cih vial hangin i nuntakna ah i kisik tam peuhmah ei. Bang dinga tua ni a pai pah lo ka hi zen tam? Kisik lua mahmah, kibawl thei nawn kiuhkeuh lo. Khitui luanga kisikna, lungsim na ngeungau-a kisikna, kibawl thei nawn peuhmah lo. Kibawl thei kik zen leh maw! i cih nak tam lua hi ven!

Ke’n zong tuak, nang zong tuak! Ke’n ka tuah kha khat val deuh pha pan, na mahmah ei, lawmlawm tazen! Kibawl thei nawn lo. Zangkong ah ka pu, ka it mahmah ka pu, a cina, a nat sawt, nidang zong veh zel, a hun ding kithei lo. Kei Zangkong pai, ka pu veh kawm ding, Hmawbi ah conference pai kawm ding. Ka tun suk ni-in airport pan a omna uh Yuzana pai suak leng, tua zan va giakin a zing teh Hmawbi pai to leng a hoih lua ding kimlai, “Hmawbi ah ni nih ni thum, tua khit teh Yuzana ah ka ut tan taam ding” ci kha laizang.

A zan masa-a kipan ka cina, Zangkong ah lumcip, Yuzana tung phei zo mahmah lo, ka aw nangawn suak lo, phone nangawn kipau thei lo. Ka pu in hong nusiat madeh minute 10 bekbek va lap zen. Nu vaw, lawmlawm tazen, ka kisik dan aw! Kibawl thei nawn peuhmah lo, ka pu tawh kam kisang nawn lo. Ka tun phet-a a khutlen, hopih, kam vaikhak, ama’n hong nusia hi ta, na mahmah ei, guai aw. Hunte i khut sung ah om kei. Ki la kik thei kei sawnsawn ei.

Ngaihsun kha zel sam, sem lian lo, bawl lian lo. Nite beibei, khate beibei. Kumte beibei lai. “Tuaci zen leng” cih bek tawh kisikna vive hi thei hi. Pasian’ hong sapna bang hiam? Bang sem bang bawl dingin hong deih hiam? A bangci dingin hong deih hiam? Bang hong hilh hiam? Bang hong phawksak hiam? Sem in. Sot toto ke’n. Kisik niteh. Na innsung ah, na bawng sung ah, na sep ding peuh sem in. Na gen ding peuh gen in. Na hawm ding peuh hawm in. Zia nei se ke’n.

“Come before winter” hong kicih leh pai pah in aw, na kisik sangin. Quaker kicite khat’ gen hi, ci-a a kigen mun mahmah kammal hoih pawlkhat ka za ngei hi. Tuma kum 200 lai peka kipau kammal hi.

I expect to pass through the world only once. Any good therefore that I can do, or any kindness that I can show to any fellow creature, let me do it now. Let me not defer or neglect it, for I shall not pass this way again.

Na sep ding peuh sem in. Na gen ding peuh gen in. “Phalbu tun ma-in hong pai in,” pai pah ni. Uaikaii kei ni. Na hoih sep ding thadah kei ni. 2019 kum sung Topa ading nungta ni. Nidanga i hih khak loh leh i hih zawh lohte i hih theih nading hun hoih hong om zenzen leh sem pah ni. “Come before winter.” (November 21, 2018 ni-a hong nusia Jireh EBC, Yangon pastor Rev. Dr. Pum Suan Mung, DMin.,PhD ka phawkna hi. Rev. Zam Khat Kham).