Peru gamsung ah Bus khat tuahsia, mi 44 si, 11 liam

Peru gamsung ah Bus khat tuahsia, mi 44 si, 11 liam

South America, Peru gamsung ah dawlnih apha Double-decker Bus khat Wednesday ni in kibung a, mi 44 takin sihlawh cih AFP pan kiza hi. Hih Double-decker Bus pen Peru gamsung Main Motorway ahi Pan – American Highway tungah atailaitak atuahsia ahihi.

Mualdawn ah akibawl Pan – American Highway panin akiasuk hi a, kengdang Pi 260 (80 meters) asanna ah akiasuk ahihi.

Peru, Arequipa Region sungah atuahsia hi a, Arequipa police chief General Walter Ortiz in agenna ah mi 44 sihi ci’n genkhia hi. Aliam bekbek zato akipuakzong mi 11 bang pha kici hi.

Hih Double-decker Bus sungah Passenger akigawm in mi 45 atuang in ki ciamteh, Register akibawl hi ci’n Interior Ministry te’n genkhia uhhi. Ahi zongin asi aliam leh Registered Passenger pen kituaklo kici hi.

Ahi zongin Peru gamsungah Bus tepen lamkal paninzong Passenger pawlkhat kumsak, pawlkhat tuanbehkikzel ahih manin, Registered Passenger leh asi aliam miphazah akituaklo hiding kici hi.

Asipen mi 44 hi ci’n Interior Ministry te’nzong gencianna nei uh a, ahi zongin aliam miphazah taktakpen akician in pulakkhia nailo uhhi.

Tuahsiatna apianhun pen zingsanglam khuamiallai 1:30am hunpawl kici hi. Tuahsiatna akizak ciangin Firefighter leh Police te akihel Rescue Team te’n delhpah uh a, aliam tezong zato ah puaktheih nadingin ki vaihawm pahhi ci’n Arequipa governor Yamila Osorio inzong ama Twitter tungah gelhkhia hi.

Traffic police chief Colonel Jorge Castillo inzong hih tuahsiatna ah misiluang tepen Rescue Team te’n hemkhia uh a, tuahsiatna ahangpen Police te’n hoihtak kankhiading uh cihi.

Aliam tezong tuahsiatna panin 57 km (35 Miles) bang agamlatna ah zato puakkul ahih manin, Rescue Team te buaimahmah uhhi. Tua ahih manin galkap te vanleng “military helicopter” kizang in, cina te vanleng tawh Arequipa City ah kipuak uhhi.

Hih atuahsia Double-decker Bus pen Rey Latino Company te neihsa hi a, Chala City panin Arequipa City zuanin azinkhia ahihi. Adinkhiat khitzawh nai 4 khitciangin atuahsia kici hi.

Peru gamsung ah tukumsung mawtaw tuahsiatna lianpi apiangpen anihveina ahihi. Nungkha January 02 ni inzong Central Coastal Area ah Bus khat tuahsia in, guamsungah kiasuk a, mi 52 takin sihlawh uhhi. Major Accident khakizom in apiangto ngekngek ahihi.

More: Malaysia, Rawang vengsung ah Bus tuahsia in mi 20 liam

2016 kumkhatsung bekbek inzong Peru gamsungah Traffic Accident tawh asipen mi 2700 bang phahi ci’n Official Figures pulakna kinei hi. Sawltak #zomidaily