Penticost ~ Rev. T Ding Gin Lian

Penticost ~ Rev. T Ding Gin Lian

Penticost – cih thumal khiatna pen 50 cihna hi bek hi. Hih pen thawhkikni pan Nipi sagihna ni (7×7=49) a zingciang ni 50 cin ni cihna hi. Hih thawhkik ni pan sim ani 50 cing lian in Kha Siangtho hong tung ahi hi. Kha Siangtho hong tun ding tawh kisai Jesu in a vankah ding kuan in a nungzuite kiangah na gen hi. “Ahi zongin note tungah Kha siangtho hong tun ciangin vangliatna tawh na kidim ding uh a, Jerusalem khua sung, Judea gamsung, Samaria gamsung leh leimong dongin note in keimah thu na gen ding uh hi,’ ci hi (Sawltakte 1:8).

Pentecost ni hong tung takpi a, Jesu a um mi khempeuh munkhat ah kikhawm uh a, tua a kikhop laitakun huihpi bangin huih nung husa gingngaih, thawm om bangin huging khat hong tungvat a, tua in kikhopna innsung khempeuh zel suak in leii tawh a kibang meikuang bang pian amau lakah hong kithehthang in, tua Kha in minam dangte’ pau tawh amaute a pau theisak vek hi. Lamdang mahmah cih ding hi.

Tua hun laitak pen Judahte pawi sim dingin mun tuamtuam panin a hong pai, Jew mi biakna hahkat mitampitak Jerusalem khua sungah a om laitak uh ahi hi. Tua huging a zak uh ciangin Jesu a um mite thugen pen amau pauciat in za uh a, a lamdang mahmah Kha Siangtho nasepna ahi hi.

Huihpi nung –Grik leh Hebru kamte ah “huih pen” ‘Kha Siangtho” tawh a kibangin zang uh a, Lai Siangtho sungah nuntakna le Pasian ompihna le vangliatna lim in a kizang ahi hi. Leii tawh a kibang meikuang – Meikuang pen Pasian ompihna lim a hi hi. Tua banah Pasian thukhenna tawh zong na kigenteh hi. Minam dangte pau tawh amaute pau theisak pau pen khiatna anei mahmah pau hi a, a zate adingin limtak a theihtheih ahi hi.

Sepna (verb) “gen” “pau” ci in a kileh ciangin tha a pia, a nopci sak thugenna hi a, nuam lua, dahlua ci in gen vat kha cih bang dan hilo hi. Gam tuamtuam cih ciangin – tua hunin Jewte gam tuamtuam le Rom kumpi gam tuamtuamte ah kithehthang uh hi. Mi pawlkhatte PAWI siim dingin hong pai uh a, pawlkhatte Jerusalem ah a teengin hong ciah kik uh hi. Parthia gam I cih ciangin – tuhun a Iran gam nisuahna sak lam Kaspian tuipi nisuahna ah om hi.

I Lai Siangtho tawh kisai in Kha Siangtho gentehna pen Jesu in a nungzuite kiangah vangliatna puan na silh dong uh ngak un na ci hi. Kha Siangtho vangliatna Pasian in puanbang a hong silhsak ding cihna hi.

Kha Siangtho pen vakhu bangin Pasian omna vantung panin hong pai suk ahi hi. Vakhu in thu ummite siangthona leh kilemna genna in zong kizang hi. Sawltak Paul in Pasian in eite lungtang sungah thuciam bangin ama hihna hong lahna in Kha Siangtho hi. Gupkhiatna a ngah mite pen Kha Siangtho in hong ciamteh in, tua in I gupkhiatna muanhuai sak mahmah hi.

Kha Siangtho in thu-ummite hong kipumkhat sak hi. Pentecost ni hong tun ciangin Jesu a ummite khempeuh lungsim kipumkhat in om thei uh hi. Tuni in sanggamte aw, Pasian Kha Siangtho a ciamteh a na om khit nung a na cipih sapihte, na pawlpi mite leh committee memberpihte tawh ki-it theilo, kipumkhat theilo a om na hih leh na kha tan pen amaanlo hikha thei hi. Kha Siangtho dik leh amaan a tang mite pen kiniamkhiat in mite tawh kilem in lungnuam takin om hithiat thei uh hi.

Kha Siangtho pen mawhna/khialhna dopa ahi hi. Noah hunlai in mawhna/khialhna leh gitlohna nakpitak a khang ahih manin, thukham kalhna leh thumanlohna uang lua a, Topan hi bangin ci hi, “Ka kha in mi a tawntungin veh lo ding hi,” na ci hi. Thuciam Lui sungah mi pawlkhatte’ sungah Kha Siangtho a om cih zong i mu hi. Ahih hangin Topa kha om den lo a, lakkik theih ahihzia David in gen hi. (Late 51:11,12)

David in bang ci hiam cih leh, ‘Nangmah omna pan in kei hong kaikhia kei in,’ ci hi. Tua ahih manin Topa’ kha in hong nusia thei ahih lam phawk kik in, i gamtat khuahei ah Pasian kha in hong luah tawntung theih nadingin, pilvangtakin I nuntakna i zat ding i kideihsak hi. Rev. T Ding Gin Lian