Penglam’ mikheemna leh Zomite

Penglam-pen apilna lam-ah pil vilvel-in, ahaina lam-ahzong mi’ batloh-in hai-vet bilbel-hi.

Nitaak khat gilkial simsim-in lum-a, “Ziingsang daaihawh nupite-in haan-ah anlim nono, zuciil nono puak thei-uh ahihteh, haan-ah nana kipang leh-a, nupite kheemleng ante nusia-in taai vingveng lelding-uh, tuateh ken a-anteng ne ziauding, qiqiqiqi…” ci-in nuui kheuhkheuh-in ihmu-hi.

Phalvaak madeuh-in khanglo-a, haanlam manawh-in paipah vingveng-in daaihawhte’ anluuina suangpeekpi tung-ah tu liuliau-hi. Sawtlo-in, nupite khephiau puanza kikhuh kawm-in, “Nu-aw, pa-aw, u-aw, nau-aw, bangcici navua?….” ci-in hong kapphei liailiai uhhi. Penglam-in, “Atutu-tawh, alumlum-tawh om ung-ei” ci-in nana dawngkiik-hi.

Nupite-in “aw” azaak phet-in, “Sikha, sikha, si ing-ei, mang ing-ei,” ci-in sidek mangdek-in kukeek gawpsa-in lehtaai takpi uhhi. Atuading mah-a ageel Penglam-in ama’ geelna leenkip lo-in, mite’ dawntuahna (reaction) tung-ah kinga ahihman-in, “Eiiiii, sikha om-e? Qeih-qeih-qeih, lau ing-eih,…” ci-in nupite’ nung zuui-in taai vingveng-hi.

Hih thupaizia-tawh kisuun-in Zomi ulianpipi, apil pipi honkhat gamta uhhi. Bangmah ahi khollo nengno khatpeuh-tawh mindeih-in mipi kheem uh-a, mipi inzong mipil milian neilo lua mahmah ahihman-in tua akipumphat mite bawhpah huhu, uumpah hut-hut uhhi. Tuatak ciang-in tua mipi akheem upate-in amau’ hihna taktak thei nawnlo ahkl mangngilh uh-a, “apillua, alianlua” taktak bang-in hong ompah beubau uhhi.

Tua thupaizia thusim bang-in hong kinei deep uh-a, bangmahlopi nengcik khat ahipian omleh kibawh huhu, ki-um luatluat-in, tuabang-a kineihna “hoih” acihpihlo mite-in thuhoihpen, lahoihpen gen-in sa-taleh kitheihmawhbawl uhhi. Totuamnei (atuam-a mi khat’ Penglam gaalkaap) te-inzong atote-uh’ mit-heek ensiam mahmah uh-a, “maan” asak mahmah nangawn atote-in tha apiaklohlam atheih naakleh “maan” cihpihding genloh, “khial” ci-in panggiap lel-hi, hihpen Penglam Gaalkaap akicici mite’ zia ahihi.

Hih-pen khuaknimna masuan (brainwashing process) sung-a khuaknim athuak mite’ lungtang puakzia ahihi. Gentehna-in, Daw Aung San Suu Kyi leh U Thein Sein-in Kawlgam Kiukna kalsuan ziading thusunna nei tuak-uh cini! DASSK’ thugen maan mahmah, practical mahmah, kitel mahmah ahihman-in khutlaam-a thapiak kuul cini. Gaalkaap Kiukna sung-ah khuaknimsa mite-in “maan” sa-mahmah napi-in atopa-uh zahtaak, kihta ahihman-in “U Thein Sein’ cihmah maanzaw” ci teeiteei lel uhhi. Theipipi-a aci a-om mahbang-in, “thumaan athei thei-nawn ngiatlo”-zong om veve-hi.

Kawlgam huutna-ah Chin State sung-a mite mapankhop hun sungteng leh BSPP hunsiapi sungteng Zomi-tawh kisai genna sakna kalsuanna khempeuh Post-Panglong Zomism (PPZ) ci-in minphuak pak-ni. Post-Panglong Zomist te ataangpi-in Union of Burma cih uplehsaanna-tawh kalsuan-in Bama-pen tote bang-in seh-in amau-pen sila bang-in kiseh uhhi. Amau’ hihtheihna (rights) angen omleh, “Unity siat nading avaaihawm” bang-in mu lianlian uhhi. Hih Post-Panglong Zomist-pen tuni ciangdong nungta-in thahaat-a, Zomi sung-ah innteekpite hilaai-uh, ahilote nangawn-in tuhsawm laai-uh dinmun ahihi.

Burma Socialist Programme Party (BSPP) hunsung leh State Peace and Development Council (SPDC) hunsung-a hongpiang Zomi khangthak khenkhatte-in Kawlgam pualam hong daakkhia zawdiak uh-a, Human Rights cihte nengneng hong muhtheih man-in Post-Panglong Zomism Idea-pen hong saangsiam nawnlo (nulehpa’ ziak-a apomkip tentan khenkhat a-omteei hang-in) ahihman-in thumuhzia, thulaakzia hong tonkhawm taktak thei nawnlo-hi. Hih hong piangthak Zomism-pen Contemporary or Modern Zomism (C+MZ) minphuak-ni.

PPZ leh C+MZ kihual theilopi-mah omkhawm toto ahihman-in, mipil sehna-ah PPZ etna pan-in amau’ cihcih thupi laak-in “he, he, ” aci-thei, amaai-etsiam, amaaivilsiam, apumphat-thei, zumna-meel theilo-a Penglam gaalkaap-a akipia mite “Pil” sa-mahmah uhhi. C+MZ te leuleu-in gamdang huzaap-tawh suahtaakna gimnam diikkha ahihman-in “tokaaina” pan-in “topenna” lungsimpuak hongnei zawdeuh-uh ahihman-in (mipi’ lak-a minla-nuam om puutsaat zeel naven) ataangpi-in, thumaan lunggulhna, mihing’ hihtheihna (human rights) lunggulhna, amaan democracy kalsuanna leh lungdeihsuutna suahtaakna (freedom of speech) cihte bulphuh-in thugen lasa uh-a, PPZ te-in “hai, leé ahkl gám (foolish, wild or rude)” sa-mahmah-hi.

PPZ sungpan-a ngaihsutna lamsang hong madawk zawdeuhte-in “lamkabom laai-ah ading” ahihlam kithei-uh ahihman-in “ahi” thute “Hi” acihding leh “ahilo” thute “Hilo” acihding kizo zolo-in, “Hi dektak inteh or Hikei dektak inteh” cih-tawh “Baák” suak uhhi. Baák-pen vasate leh ganhingte akido ciang-in kuamah panpih lo-in kuamah do lo-hi. Ama’ ngaihsutna-ah, “mi’ muhdah nading zon sese kuulkei, kei’ om-in ompeuh lelleng gaalbei zawding” ci-in pil kisa mahmah-hi. Ahun hongtun ciang-in lei leh vaan-in thukhen ahihman-in, “Leilak ganhingte-in notkhia-a, vaanlaai vasate-in notkhia ahihman-in maaizum-in zaanmial sungbek-ah gamta-hi” kici-hi.

Zomite’ internet groups te-pen PPZ khenkhat leh tuate’ khekhaap azuui nihlehthum-in gensia uh-a, zahko-in, mansel-sak zeel uhhi. C+MZ muhna-tawh ahihleh hih groups-te naakpi-in manpha mahmah-a, mipi’ lungdeih kaihkhopna, thucin thutang kikupna, aki-iimcip thute kipulaakna, theihding kilawm taangthute kihopsawnna leh kilawmtaatna phualpi ahihi. PPZ upzia leh saanzia-ah, “mi tampi’ simding ahihteh kamzol kamkhum zatding” cih naakpi-in thupisak uhhi. C+MZ upzia saanzia-ah ahihleh, “Ahilopi kineih loding, thumaan ahi bangbang-a gelhding, suakta tak-a gelhding, theihlohte dongding, mihoih kineih mawkmawk loding, ahite ahibang-a saangsiamding” cihthu bulphuh zaw-hi.

Zomi minam kalsuanna abeisa hun khempeuh PPZ leh C+MZ thuluan-tawh saaikaak siamden lehang thulaak khopzia alem toto theiding lametna-tawh, Penglam’ mikheem bang-a kheemthuakte’ launa-nung alehzuih mite I-hihloh nading, kheem athuak nupite bang-a zaakna ciangbek-tawh patau gawp-a, banghiam cih nangawn en manlo, kan manlo liang-a taaikeek nading lam-ah I-manlaan luatloh nading deihna-tawh lungdeih thusunna ahihi.

Zomi Pasian’ Thupha!

Zokhai
60 Narr-Maen Drive
Croydon Hills VIC 3136
Melbourne, AU
Tel: +61 39723 0460
Mob: +61 420 800 560