Malaysia, Penang ah Myanmar gammi 2 zukhamsul in kitawng in khatpa kidawtlum

Malaysia, Penang ah Myanmar gammi 2 zukhamsul in kitawng in khatpa kidawtlum

Malaysia, Penang State sungah Myanmar gammi 2 zudawnkhawm in, akhamkhit uhciangin kitawng uh a, khatpa temtawh ki dawtlumkha cih NST pan kiza hi. Hih thupiang pen Sunday nitaklam 8 – 9pm kikal in thupiang ahihi.

Jalan Bukit Tambun aom Factory nasemte omna Workers’ Hostel ah zudawnkhawm in akitawng uh ahihi. Buaina, kitotna aom ciangin khuasung mite’n Police te kiangah nitaklam 8:55pm hunpawl in zasakpah uhhi.

Dawtlup athuak Myanmar gammipa pen amin Sai Ko Ko kici a, kum 20 gualpawl ahihi. Amahpen Factory Operator asem hi a, a zudawn khoppih alawmpa in temta tawh a awmsung nihveitak dawtsak hi. Tuaban ah amaitang zong temta tawh satsak hi.

Palik thunei ahi Seberang Prai Tengah district police Assistant Commissioner Nik Ros Azhan Nik Abd Hamid in agenkhiatna ah hih kitotna pen lawmta zudawnkhawm in, akhamkhit uhciangin ki telkhial uh a, kitot kithahna apiang hiding hi ci’n genkhia hi.

Sai Ko Ko pen alawmpa in temta tawh adawtna aphualzang mahah sipah in, adawtpa leh alawm Myanmar gammi tepen tuaphual panin taikhiamang uhhi.

Tua akitawng Myanmar gammi 2 tepen tua nasepna ah asepzawh kha 2 khawngbek hipan a, anih un naseptheih nading Work Permit zong aneilotuak, illegal in aomtuak uh cisawnsawn hi.

Police te genkhiatna ah tua Myanmar gammi 2 te akitot, aki thahlup laitak pen Factory sung aom CCTV paninzong Video Record kimuthei cihi. Ki thahlupna ah azat uh temta pen kimukhiazo nailo a, hih buaina pen ki thahlupna Murder Case “Section 302 of Penal Code” tawh thu kibawlphot hi.

Police te’n hihvai tawh kisai in Factory Directors mi 2, Supervisor 1, Clerk 1 leh Nepalese Factory Operator mi 2 teng manphot uh a, thubuaina kankhiattheih nadingin thudotna neiding uh cihi.

More: Myanmar kumpi in cidamna lamsang ah zato siama “Nurse” azahnih in behlapding

Adawtlum in aki ummawhpen Myanmar gammi Maung akici kum 23 leh alawmte khat ahi Naing Naing kicite hi uh a, UNHCR (United Nations High Commissioner for Refugees) Card atawi uh kici sawnsawn hi. Hih Kawl (Burmese) te gitloh ngongtatna hangin Myanmar gammi khempeuh hongki lipkhaptuam, hongki mudahtuam mahmahding hizel hi. Tuaban ah UN Card tawite zong nasepna nawngkai saktuam khading hi. Sawltak #zomidaily