Malaysia, Langkawi aom Security Guardhouse khat meikang in naupang kum 8 khat meikanglum cih NST pan kiza hi. Tuni Thursday zingsanglam in thupiang hi a, Guardhouse pen Jalan Bukit Tembok, Kilim aom ahihi.
Hih Guardhouse ah apa pen Duty alut, Security semin angak hi a, atapa inzong apa azui cihi. Meikat kipatpen tuzingsang 3:05am hunpawl ahihi.
Apa pen meikat ciangin kihemkhia thei a, liamna pawlkhatbel ngahveve hi. Atapa pen meikat laitak in a ihmu hi a, Guardhouse sungah awkcip ahih manin, meikang tawh sisuak ci hi.
Langkawi Fire and Rescue Department chief Comm Fadzlullah Mohd Noor in agenna ah huhngetna Distress Call pen zingsang 3:10am hunpawl in hongki zasak ahih manin, aphual ah kidelhpah cihi.
Meiphelh mawtaw “Fire Engine” 2 leh Firefighter mi 16 in kidelhpah a, zingsang 3:33am hunin mei amihsiangdong in ki phelhzo cihi.
Video: 8 year old killed, security guard father hurt in Langkawi guardhouse blaze
Tua Guardhouse pen 70% bang kangtumgawp a, akiphelhsiang khitciangin asungah pasalno ii aluanghawm pen meikanggawp in meihol bangkhinliang cihi.
Related: Malaysia gamsung ah SEA Games atunma in Security Drill 5 vei kibawlding
Apa pen kum 40 gualpawl hi a, aliamma te kibawlding in zato ah kipuak hi. Atapa ii aluanghawm pen Police te ki ap phot hi. Meikat kipatna pen ki theician nailo ahih manin, thunei te’n kancian laiding uh cih kiza hi. ZD Sawltak #zomidaily
Comment piaknop aomleh...