Pate Ni (Father’s Day) ~ Rev. Dr. Mang Do Thang

Pate Ni (Father’s Day) ~ Rev. Dr. Mang Do Thang

Tate aw, Topa sungah na nu na pate uh thu na man ding uh Khristian ngeina hi a, ahi ding mah ahi hi. Thupiakna a lian khat in, “Na nu le na pa zahtak in,” cihna hi a, khapna thu tawh kizom pahin, “Zatak lecin nang adingin thu hong hoihin, leitungah na khan a sau ding hi,” na ci pah hi. Pate aw, na tate uh a heh thei nadingin bawl kei unla, Khristiante ngeina tawh kituakin taai-in hilhin pantah un (Eph. 6:1-4)

Pate ni pen US gam Spoken khuo, Washington State a teng Sonora Dodd kici numei khat’ pat khiat hi a, 1909 kuma kibawl Nute ni kikhopna panin a hong piang khia ahi hi. A pa William Jackson Smart in ta guk nei a, a ta gukna a suahna panin a nu in na sih lawh a, tua ciangin a pa in lo kho-in hamsa pi-in pa din mun le nu dinmun a nihin la khawmin a tate (6) na vak keikai hi.

A tate adingin gim le tawl le gentheih liangvaihna tampi a thuak a pa a ngaihsut ciangin, Sonora in a pa in a tate bang zahin hong it hiam cih phawk sansan a, nute bek pahtawi ding hi lo a, pate zong pahtawi ding kilawm hi ci-in ngaihsun ahih manin a pa suah ni June 19, 1910 pen Spoken khua ah pate ni-in bawl sak hi. US kumpi in zong thukimpih ahih manin kum simin June kha nipi thumna pen nute ni-in kizang a, leitung buppi ah tuni dongin kibawl paisuak hi.

I. TATE TUNGAH PATE’ MAWHPUAK LIAN MAHMAH HI

“Pate aw, na tate uh a heh thei nadingin bawl kei unla, Khristiante ngeina tawh kituakin taai-in hilhin pantah un” (Eph. 6:4).

Thuciam lui sungah, “Ama pa hitaleh ama nu hitaleh a sat peuhmah kithat ding hi,” na ci thong hi (Pai. 21:15). Hih Lai Siangtho tung tawnin Pasian in tate tungah pate thuneihna nasia takin a piak lam kimu thei hi. Tua mah bangin Paul in zong tate in nu le pa a zahtak nadingun na hanthawn beh lai hi. Hih Lai Siangtho kammalte tung tawnin pate sanga a thupizaw leitungah kuamah a om lo lam kilang mahmah hi.

Pate ni a hong tun simin ih pate in a hong dampih lai-in ih phawh khak khol lo uh thu tampi ih mitkha ah hong kilang daudau hi. Ih pate pen tate adingin a hoih kei leh zong kiphawk kha veve a, a hoih leh lah kiphawk zaw zek lai hi. Pa hoih lo a neih tate bangin phawk zawsop thei lai uh hi. Pate pawlkhat’ gitnat lohna hangin a zi le a tate in maizum lawhin zong thuak lawh uh a, khan tawntungin meigong tagah min hoih lo ngah kha dih zen uh hi. A pa hangin a tate bang pen a lawm a gualte lakah a maizum hun uh tam peuhmah thei mai ding hi.

Pate pen ih gen sa mah bangin innkuan sungah vaihawm makaipi ahihna tawh thuneihna lianpi a nei uh pen pate kimkhat in zang khial thei mahmah uh hi. Hih thuneihna pen ei pate in zang khial kha kei ni. Tate in pate’ gamtatna za lakah sawm sagih nga (75%) bang luoh suk hi kici hi. Pate in zu a dawn leh tate a tamzawte in zong dawn pah uh a, a gamtat siatna a tamzaw zui uh hi kici hi. Tate in nu le pate thu a man ding Paul in a gen hun pen Rome kumpite in leitung a uk hun (Roman empire) ahi hi. Tua hunin Roman Empire ah “Pate thuneihna” (patria potestas) a khauh paih mahmah hun ahi hi. Rome upadi ah pate in tate sila dingin zuak theihna thu ngah uh hi. Pate in a tate a ut bangun daan pia thei uh a, sihna (death penalty) nangawn pia thei uh hi.

Rome upadi sungah tate pen a kumcing ta (come of age) cih bang om lo a, tate vondok, mangpi le ulien minthang suakin pahtawina lai tuamtuomte (honours) a ngah phial uh zongin a sih tanpha-un pate’ ukna tawh kipelh thei mahmah lo uh hi. Ei Zo ngeina tawh hoh kituak pian ka sa hi. Ei ngeina ah zong ih tate pen khang lianin zi le ta a neih dongun nu le pate ukna nuai ah ki-om ni loh hi. Nu le pa thuneihna sunga ih om bel ahi ding mah ci ni, ih innlak sanggamte (extended family) vaihawmna nuai ah zong ki-om lai zen hi.

Ka neu lai-in vondok Gin Za Cin le a pa Song Theu thu kigensawn ka za ngei a, a man takpi hiam cih bel ka thei kei hi. Nikhat a pa Songtheu pen mikhat tawh thu kineih hih tuak hi. Thjukhen ding pen a tapa hi a, tuale a pa lel sak dan hi tuak hi. A pa in zumkong mangkong ah thu a nei lo manin a gual lel pen lungkim pha lo hi ding hiven, ama’n zong Zo ngeina ah ama’ thuneihna zangin a tapa vondok pa kiangah, “Hua lai-a ka tuibuk va la sin,” ci se hi kici hi. Zo ngeina zanga a tapa tungah a thuneihna a lak dan ahi hi.

Tham loin, Rome kumpi hun lai-in pate in amau’ sisan pana a piang naungekte a dei phat kei vua leh lotkhiat theina ngeina (custom of child exposure) hoih het lo khat na om mawk hi. Tua hi a, naungek khat a suah zawh a sawt loin a pa khebul ah kipaipih masa a, tualeh tual ah a pa kunsukin nausen a domto-a leh tua nausen pen kihing khawi a, ahi hangin amah kinung hei-in a paisan vingveng-a leh tua nausen pen a pa in tua naungek deih lo hi ci-in kingaihsun ahih manin a pualam ah kilawnkhia hiau zmawk hi.

Tua bang ngeina hoih lo hun sungin Paul in hih lai a na gelh ahi hi. Pate aw, nang hangin na tate a maizumin a om kha ding uh hiam? Tate tungah Pate’ huzap (impact) pen khauh mahmah mawk hi. Nang a si lah hi lo, na tate in a gamla panin hong gal et den le uh na lungkim zo ding hiam? Lim takin ngaohsun in. Ih pu ih pate in “Sih khen sangin hing khen na zaw hi” na ci ngeungau uh hi. Amau’ gitnat lona hangin tate tawh a om khawm thei lo pate tampi om dingin ka um hi.

Bang zahin kha siat huai ahi hiam? Innkuan nuam le innkuan nuam lo pen pate tungah kinga tanghial hi. Nute in bangzahin innkuan nuam dingin a hanciam uh hangin pate in a hanciam pih kei leh piang thei vet lo hi. Tua ahih manin innkuan sung a nopciit theih nadingin tate heh sak loin, taai-in thuhilhin a pantah ding uh a kisap lam pen Paul in pate tungah na hanthawn tangtang hi (Eph. 6:4).

II. PATE TUNGAH TATE MAWHPUAK LIAN MAMAH HI

Absalom pen David’ tapa hi a, Israel khempeuh sungah ama zah a pasal mel hoih kuamah om lo hi kici hi (2 Sam. 14:25). Absalom pen thu gen zong siam, pawl huai mahmah khat hi a, ahi zongin a pa tungah thumaan ngiat lo hi. A pa kiangah Ephraim gam, Baalhazor-a a tuumul met pawi ah a sanggampa Amnon a pai nadingin a pa kiangah khuan ngen hi. Ahi hangin Absolom ngimna pen pawi sim dinga a sanggampa Absalom a sam hi peuhmah lo a, a thah nop mana a sam hi zen hi.

A ngimna bangin zong that takpi hi. Ahi hangin a pa in a mawhna maisak veve hi. Khatvei a pa khem leuleu a, Pasian bia dingin Hebron ah va pai ning ci a, a taktak ciangin a pa lang pangin a kumpi tokhom suh sawm na hi mawk hi (2 Sam. 15:7-12). Absalom in a pa khasia sak ahih manin gal sungah kuamah thangsiah lo pi-in gamlak tawsawh singhiang lakah awkin si hiau hi (2 Sam. 18:9-15). A pa in amah it veve ahih manin a sih a zak ciangin, “Oh, ka tapa Absalom, nang sih sangin kei si zaw leng maw!” ci-in kap ngetngut lai zen hi (2 Sam. 18:30).

Pate hong itna, tate tungah bang zahin lian hiam! Tate ih gitnat het lo hangin pate hong itna kiam ngei lo hi cih phawk ni. A pa a simmawh le a khasiat sak manin a khagno lai pi mah-in khansih hi. Khangluite in nu le pa simmawhte a naklawh pek lo hi, ci uh hi. Tua hi a, nu le pa in hong nutsiat ma-in lim ngaihsut in, na pahtawi zo kei leh zong khasia sak kei bek in.

III. IH HAMSIAT IH HAMPHAT SIALIN IH PA HONG KIKAN MASA HI.

David in Goliath a thah khit Saul kiangah a kipaipih ciangin Saul in, “Tangvalpa aw, kua tapa na hi hiam?” ci-in dong hi. David in zong, “Bethlehem a na nasempa Jesse’ tapa ka hi hi,” ci-in dawng hi (2 Sam. 17:58). Tate aw, David mah bangin thusia na tuak a, thupha na tuak zongin mite in na pa hong kan masa ding uh hi. Zu le sa el zenin dawnin lu le taw nangawn phawk lo liangin na om ciang ahi a, gual tung tuangin minphatna tuamtuam na ngah ciang ahi zongin “kua ta na hi hiam?” hong kici hamtang ding ahih lam phawk ni.

Tua hi a, ih gamtat ih lukekna huhau-in ih pa a kipak ding hiam? Ahih kei leh a mai zumin a tual kun ding hiam? Ahih kei leh ei a tate hangin ih nu ih pate dipkua-in lauthawng sa-in a om khikhe kha ding uh hiam? Tate in tuni Pate’ ni-in lung ngai dih ni. Tate kuamapeuh in Pate ni a hoih lamin a zang thei kim ciat dingin Topa in thupha namcin hong buaksuk tahen. Happy Father’s day. Rev. Dr. Mang Do Thang – Church Pastor, Zo Baptist Church Yangon (ZBCY)