Pasian um vs Thu um ~ Tungg Thang

Pasian um vs Thu um ~ Tungg Thang

Christian icih pen amah leh Pasian mahmah mimal in a kimu mite bek ahihi. Pasian tawh a kimuh teh mimawh ahih lam kiphawk in a khitui luangin Pasian tungah hehpihna a ngente ahihi. Pasian i muh ding zong a thupi ahihi. Pasian amute in mimawh ahihlam kitel pan uhhi. Tua masiah mihoih mah kisasa uh hi. Tua hi a Pasian tawh kimu lopi in Christian taktak na suak thei ngei kei ding hi. A minpua Christian hih ding pen haksa lo a, Christian taktak hihding ei utthu bek tawh a piang hikhinlo in Kha Siangtho thupha a kisam ahihi.

Mi khat in Jesuh kiangah na nung hong zui ning acihleh Jesuh in Mihing tapa in lungak nading mun neilo hi na cihsan in. Hong zui o leh na ci pahlo hi. Mi khat tung leuleu ah Jesuh in ka nung hong zui in acih leh ka innkuanpihte mangpha va khak phot ning ci-a Jesuh in Lawi leeng leen kawma nunglam ente kei tawh kituak lo hi, na cihsan ziau hi. Mi tampi in Pasian upna tawh kisai in zaangkhai ngaihsut lua mahmah uh hi.

Tu hun ciang in Christian tampi in Pasian’ thu um ci in hih kammal kitam zat mahmah hi. Ngaihsun phapha lehang hih Pasian’ thu um cih leh Pasian um cih pen a kibanglo ahihlam i mu thei ding hi. Tua hi in Pasian’ thu um dinmun tawh lungkim ding hilo in Pasian mahmah a um ihih ding thupi hi. Tu hun ciangin Christian lo zong in PhD in Theology cih tepawl laziahziah ta uh hi. Tuate in Pasian pen a um lian hilo hi. A hih hangin Pasian’ thu pen um mawk uhhi. Tu ni in sanggam aw nang pen Pasian um maw? Pasian’ thu um cih i kisittel ding a lunggulh ihihi.

Pasian um

Pasian um i cih te in Pasian mahmah pen a um ngiatte ahihi. Pasian’ thu tung bekah dinglo/kinga lo in Pasian mahmah tawh nisim naisim a kizom te ahihi. Pasian mahmah tawh thu ngetna ah a mimal in a kizom den, a kiho den te ahi uhhi. Tu hun ciangin Pasian um mi kitawm ta a, Pasian’ thu um mi kitam mahmah ta hi. Hih Pasian um i cih te in Pasian (Itna) cih len kipin a sep a bawlna ah mi deidan neilo uh hi. Tu hun ciangin Pasian’ nasem tampi in Pasian um zo taktaklo ahih manin mite deidan neilai uhhi. Pasian a um taktak te in tuate zo mahmah lel hi.

Kei bang ka up pen Pasian thu sangin a kammal ngiat bang a umzaw ka hihi. Pasian thu pen mihingte gen kik, khiat kik ahi a, Pasian tawh i tehkak ciangin a letcip tak hilo hi. Tua a thu bek tungah idin leh sehnel tunga inn lam mah i bang bek ding hi. Tua hilo in suang tunga inn lamte i hih ding thupi hi: Pasian tung, Jesuh tung mahmah ah kilam ding ahihi.

Pasian’ thu um

Tha ka ngah zawh mahmah loh thu in Pasian’ thu um cihthu ahihi. Tu hun ciangin zong Mikaangte’ upna peengta ka sa hi. Bang hanghiam cih leh thu a nget uh ciangin a tawpna ah “in his name” ci ziau in hih pen tha a ngahzo mahmah lo ka hihi. In the name of Lord Jesus Christ cih pen kei’ thangah pen ahihi. Bang hanghiam cihleh tuhun ciangin Jesus min phuak zong pawl khat omta hi. Hih mun ah ka gennop thu pen leitungah biakna tuamtuam om a, a kiciaptehna ah biakna nampi 11 in kiciamteh hi.

Biakna khat ciat in pasian ci in a min a lo tek uh ahihi. Tua hi in “in his name” cih pen Buddha maw? Allah maw? Confucious maw? Cih pen kiciansak zolo sa ka hih manin tha a ngah zolo ka hihi. Pasian thu um mite in itna bulphuh zolo uh hi. Pasian’ thu tawh buai den lel uh hi. A Pasian mahmah tawh kizop ding, thunget ding cih zong phawklo, thupi sak lo uhhi. Tua banah Pasian piaksa thuphate tawh buai den lel uha, a piapa pen lungdam koh ding zong phawk nawnlo uh hi.

India kumpi Mahattama Ghandi in zong Pasian thu um hi. A hi zong in Pasian leuleu tak teh um zo taklo hi. Jesuh thugente zong hoihsa hinapi Christian na suaklo hi. Tua hi in tu hun ciangin thu um cih bek tawh kicingzo nawnlo, bun nawnlo hi, thu icih tam lua mahmah hi. Bang thu himawk ding hiam? Jesuh in Pasian um unla kei zong hong um un na ci tektek hi. Pasian thu um un a cihna khat vei zong omlo hi. Hih pen leitung mite in a zat kammal bek a hi a, Jesuh in Pasian thu up ding na gen masa ngeilo hi.

Pasian thu pen taangthu bang in a gen siam mahmah Pasian umlo mi tampi tak omta hi. Ei Zomi sungah zong Pasian ka um acih khem hangin Pasian tawh a kimaituah ngeilo tampi om in tua bang mite pen thuak hak thei mahmah hi. Pasian tawh na kimaituah leh na tuisuak ding hi. Tua bangte nuntakna in man nei mahmah pan hi. A thu thei bekte nuntakna tawh kilamdang mahmah hi. Zomite sungah sit taktak ni ci lehang hi bang mi pen tawm lai khading in ka um hi. Tua bang mite in nuntakna thak/a kikheel nuntakna nei pah takpi uh hi. Tua banah vision nei in, Pasian in makaih takpi hi.

Pasian in a hehpih/huh theihloh mi pawl khat om a tuate pen amau leh amau hi a kisate, siam a kisate, pil a kisa a, midangte a muk piksante, maan a kisate leh mawhneilo a kisate ahihi. Tua ahih manin Jesuh in na mit a nintang lakha masa lo a mi mit a nin bang na lak khak sawm na ci hi. Khanglui paunak ah Zawng in a ma khawn mulo in a lawmte khawn ko na ci uhhi. Tua hi a Jesuh in nang tungah hong kibawl ding na deih bangin midangte tungah na bawl in ci pah hi.

Laisiangtho

Lai Siangtho pen i muh i san dan kibanglo hi. Fundamental pawl leh conservative pawl in Lai Siangtho sunga kammal khempeuh Pasian kammal hi ci in saang in um uhhi. Protestantte in ahih leh Pasian kammal pawl khat om a, a vekpi in Pasian kammal hikhin lo hi ci uh hi. Thu mah bangin thu leh la a tuam tuam zong a tawmpen in hih bangin thu nih a om ahihi. Roman Catholic te leuleu in Apocrypha a kici hepkhiat pawl zong Lai Siangtho mah in saang uh hi. Hih Apocrypha sunga laibu te zong zaknop in thupi mahmah hi. RC ka hih loh hangin ka sima, zong mannei sa in tha ka ngah mahmah hi.

Tua hi in Lai Siangtho enpak lehang muhdan thu thum bang a ompah ahihi. Tua hi in leitungah muhdan leh sandan kibanglo mah a tampen ahihi. Ei muh bang a mulote neu et pah cihte pawl, a za theilo cihte pawl pen mihing picing hilo hi. Extreme nam khat ahihi. A pai khial cih ding ahimai taveh. Tua tepawl in hih Lai Siangtho muh dan nam thum a neite bang neu et, hai sa mahmah kha ding uhhi. Amau mun ciat ah mipilte mah na hizel uhhi. Amau dinmun kimu theilo cih ding mi namkhat ahi taveh leh. Tua hi in beel a hawmte tum lehang a ngeih (ngaih) zaw thei mah ahihi.

(Lungdamna John 1na sunga Thu a cih ahih leh Logos (word, kammal) a gen nuam hi in tua in a mimal Topa Jesuh mahmah a heem gen ahihi. Hih i gen thu tawh kibang lo hi.)

Mittaw Sialkhaulet

Pasian pen pianzia a cingtaak khat bek anei ahih manin mittaw sialkhau let a i up ding amah ahihi. Nang Pasian na ci kei zong in amah pen Pasian hi khin hi. Nang Pasian na cih man a Pasian asuak hilo hi. A om tawntung Pasian ahihi. A hi zongin Pasian leh a thu pen gawm khak loh ding thupi hi. Pasian’ thu pen mittaw sial khau let in kilen theilo hi. Bang hang hiam cih leh a thu taangzai lua mahmah ahih manin nisim in thuthak om den hi. Tua hi a Lai Siangtho sungah Kahla gelhpa in Pasian thu pen zing nisuak bangin thak den hi acihna ahihi. Pasian in ama thu pen a kisap hunhun in ama nasem te tungah phuangkhia den hi.

Tua banah Lai Siangtho sungah mittaw sial khau let a i let ding thute pen Pasian gen kammalte, Jesuh gen kammalte cihte pen i let kip ngiat ding ahihi. Tua hilo in mi siangthote, sawltakte cihte kammal i letcip luat leh tua pen hilua lo zel kha ding hi. Tua hi in Pasian kammalte a nungtasak ngiat i hih ding thupi mahmah hi. Zong nungta takpi mah hi, tu ni dong in. Tua hi in Lai Siangtho sungah Pasian kammal leh mihingte’ kammal om hi cih phawk den ding thupi hi. Pawlu bangin Timothy kiangah a gelhte bangpen a kawnggak thu cih peuh hi in Pasian kammal hi khin khollo hi. Tua hi a i khen siam ding thupi mahmah ding hi.

Tua hi in Pasian’ thu ah conservative ding hilo in Pasian mahmah tung bekah conservative ding ahihi. Pasian thu pen mihingte gelh ahihi. Pasian pen mihingte bawl hilo hi. Na um kei zong in amah pen a uphuai a belhhuai tawntung ahihi. A vaangliatna pen a kip den ding ahihi.

Jesuh maw a thupha?

Hih la a zangei kim ding in ka lamen hi. Tu hun ciangin mi tampi in a Jesuh masak lo in a thupha bek lamen den uhhi. A Jesuh tel sawm, neih sawm, up sawm masak ding ahihi. Tua loin a thupha zong mot pai samlo ding hi. Kiplo kha ding hi. Jesuh mahmah in Pasian gam leh ama dikna zong masa un ci hi. Mi pawl khat in i masak ding masak khalo in i nunun ding peuh kimasak kha thei hi. Jesuh masak in tua khitteh a thupha hong luang ding ahihi. Jesuh tawh kizom lopi in a thupha hong luanglo khading hi.

Tua hi in hunsim amah tawh kizop kul mawk hi. Tua teh na khempeuh a kip ding hipan hi. Tui zawn i zolh masak lo in tui pen inn hong tung zolo ding hi. Tua hi kei leh a thupha tawh a buai, a amh kham thei ding ahihi. A thupha bek a ente in Jesuh lah taan a thupha lah taan thei mawk hi. Ngaihsun pha in i masak dingte mah masak phot ni. A thu tung bekah kinga in Pasian tungah i kingak khak loh ding a lauhuai ahihi.

Thukhupna

Tua hi in tu a kipan in thu-um mi kici ziauziau nawnlo ding hi hang. Pasian um mi kicih ding ahihi (Ahih hang hih cih ding mi pen tawm kha ding hi). Tua munah Pasian um mi leh Pasian thu-um mite hong kilamdang mahmah ding hi. A thupha ngahna, a nuntak khiatna cihte enkaak lecin hong kidang kha ding hi. Tu hun ciangin thu-um mi kitam mahmah ta a, Pasian um mi kitawm hi.

Tua hi in Lai Siangtho sunga Pasian kammal thute zong a um zo tawm mahmah hi. Thu-um mi in um zolo in ahizongin Pasian a ummi in umzo, saangzo mawk hi. Tua mun ah a kilamdanna na mu ding hi. Thu ummi cih bek tawh na lungkim leh na nuntakna in keu lam a manawh ahihi. Pasian um na hihna tungtawn in a hing/nosuah den ding na hihi. A thu bekin hong nosuah zolo ding hi.

Zomi sungah hih thu zong kitam ngaihsut lo ahih manin mite muhna ah nuntakzia hoih i lakzo kei hi. Tua pen ahangin thu um mi hihna ciang bek din mun ahih man hi. Pasian um te dinmun in mite nuntakna ah etteh huai nuntakna lak denzo ding hi. Tua kilamdanna te damdam in na tel ding hi. Tua hi a Christian minpua cihte pen thu um bek mite ahihi. Tua mite hangin Pasian min thanglo ding hi. Pasian um (Thu um) ngiat mite nuntakna ah kikhelna om ahih mah bangin tua mite hangin Pasian min thangin, a gam zong zai in kikeek toto ding hi.

Tua ahih manin i upna, i dinmun kisit zel ding cih pen nisim in a kisam den thu ahihi. Job in a tate adingin nisim in thu ngen den hi banghang hiam cihleh a lungsim uhah Pasian tung a mawh khak leh a cihna ahihi. Pasian thu-um icih sang in Pasian kammal um kici leh a hoih zaw ding khat ahihi. Tua hi a Pasian thu-um cih leh Pasian um cih kibanglo hi cih phawk tek ni. Pasian thu um hong kicih ding ka lung a kimzo nawn kei hi, Pasian kammal um hong kici leh tha ngahhuai zaw kasa hi.

Hih Pasian um cih leh Pasian thu um cih i khen siamloh, i tel siamloh manin mite lakah Khuavak bangin i taang zo kei a, ci bangin i alna i kilanghsak zo kei hi.

(I kammal zat zia enpha in Pasian thu um kici nawnlo in Pasian kammal um kici leh a hoihzaw khatam, a bunzaw kha diam? Tua ahih kei leh pasian tampi lak ah Pasian khat bek ci-in capital ‘P’ tawh igelh bangmah in thu tampi lakah Thu ci-in capital ‘T’ tawh gelh lehang Pasian a cinuam ahihlam kilangh ding hi. Tua hileh thu um hilo in Thu um=Pasian um) Tungg Thang 9UB Fellow, Silliman University, Dumaguete City, Philippines)