Beh Siampu ~ Tual Khan Suan

Beh Siampu ~ Tual Khan Suan

Beh siampu i cih takteh laisim mite lungsim sungah dawi biakna, dawi thoihna tawh kizom dan in kikoih a, i lungsim sungah Pasian thu tawh kituak lo bangin ki ngaihsun kha pah theih hi. A beisa hun in Zomi sungah vai khatpeuh a om ciangin innsung dongta, beh le phung vai mah kibul phuh masa hi. Dam lohna khatpeuh ah dawi thoihna a om teh, beh leh phung (phung leh tang) pan in siampu khattek kinei a, tua siampu in dawithoihna makaih hi. Pu sa, pa sa thoihna, dawi thoihna khat peuh a om ciangin beh leh phung pan a siampu makaih in a kisam bangbangin vaihawm hi.

Beh siampu na sep pen, beh leh phung sungah damlo a om leh dawithoihna neih sak ding leh leitung ci leh sa tawh kinai zaw teng pen cidam lu damna ding, nuntak nek zonna ah daupai na dingin a kisap thupha khempeuh dawite kiangah thupha dawh sak ding cih a hihi. Biak piakna, (tu hun teh dawi thoihna i cih hi ding hi) ah ma kaih ding leh mite kha thu ah kisapte uh a kicing sak ding a hihi.

Beh siampu pen, beh le phung sungah biakpiakna lam makaih a hih mah bangin, a mau nuntakna ding a kisam nek leh dawn, inn leh lo pen beh sung, phung sungah kidon sak in kipia hi. Lam khat pan cileng, beh leh phung sungah kha thu ah makai a hih manin gilkial dangtak in kikoih lo hi. Zu mun, sa phual ah zong zucil a lim pen, sa sin sa lung khempeuh zong a maute kipia masa hi.

A beisa hun lai bangin beh siampu pen tu khangthak hun ah a kizat nawnloh hangin Zomi te sungah tua bang lungsim neihna pen bei thei taktak tuanlo hi. Ci leh sa vai tawh kingaih sun a hihna hang hizaw hi. I biakna a kilaih hangin i lungsim puak kilaih tuanlo mawk hi cih ding hi. Tu hun khang ah i biakna pen Christian upna bulphuh a hih bangin kha thu tawh makai dingin Siampi kinei hi (Siampu pen khanglui lai a, dawi thoih makaite cihna kammal hi). Christian biakna sungah Siampi in Pasian tawh kizopna ding leh mawhna khialhna pan suahtakna ding thumsak ding pen a mau nasep a hihi.

Biakna kipawlna sungah pawlkhat in zong Siampi pen beh leh phung sung a kizang Siampu dan bangin bawl uh a, a mau beh leh phung te in Siampi a sep leh bek piak khiatna zong pia nuam se uhhi. Pawlpi sungah beh leh phung tam mite in zong a mau beh leh phung teng a en ding a mau beh sung pan bek Siampi deih lel mawk uh hi. Pawlpi pawlkhat khat ah a mau beh sungpan Siampi a sem te bek deihsak in midangte ciangin deidan bawl mawk uhhi.

A taktak in beh Siampu pen a beisa hun in khua khat sunga teng khawm, behkhat leh phungkhat sungah dawi thoihna, pu sa, pa sa biakna ah makaih ding leh biak piakna a nei ding a ki nei a hihi. Tu hun a Christian thu upna sungah Siampi te leuleu pen beh leh phung sung bek a van ding hilo ban ah, beh khat in a mau beh a hih manin kineih sak ding, deih sak deuh ding hilo hi. Beh leh phung bulphuhna a hi lo pawlpi sungah beh Siampu dan in Pasian siampi te i zat nopna hangin midangte a dingin thu hoih lo suak thei hi. Tual Khan Suan