Pasian’ Thu um i cih ~ Evan. Suangh Dal

Pasian’ Thu um i cih ~ Evan. Suangh Dal

“Pasian in nang hong it hi, ahih hangin a Tapa na theih kei leh tawntung Hell mun na tung veve ding hi.”

Pasian’ Thu – Pasian pen Pa Pasian (God the Father) ahi hi. Thu pen Tapa Pasian (God the Son) hi. Pasian Pasian i cihcih tek hangin tua Thu i up kei leh hotkhiatna a kingah vet lo ding ahi hi. John in Topa Jesuh pen Thu ci-in na gen hi (Jn. 1:1). Sawltak (or Nasemte) gelhpa St. Luke in bel Jesu’ nungzuite pen Lampi zuite (9:2) na ci hi. Johan 14:6na ah zong Jesu in keimah in lampi ka hi hi na ci hi.

Jesu in Keimah a kicihna Nam (7) om hi.

• 1. Keimah in leenggui maan
• 2. Nuntakna khomun
• 3. Lampi, thumaan le nuntakna
• 4. Leitung khuavak
• 5. Nuntakna le thawhkikna
• 6. Kongpi
• 7. Tuucing hoih Pa ci-in na kigen hi.

Jesu in Abraham om ma-in kei ka om khin (before Abraham was I am) na ci hi. Tua ahih manin i gennop bulpi in, Pasian Pasian kicitek napi hih Jesu lo tawh Pasian’ kiang tun theih nading lampi dang, thudang om lo hi cih thu hi ta hi. A Pasian lam pen kinei teka, ahi zongin tua Pasian mihingte’ tungah hong kikoici laak cih le mihingte’ tungah hong kipholak kamsang kineih tuamtuamte lak ah a koi pen tua Pasian kiang pan hiam cih thu hong kul ta hi.

Judah mite pen Pasian’ maan nei kisakna lam ah kisial ngam uh-a, ahi zongin tua Pasian mite lakah hong pai khin Pa ahihna ah awk uh hi. Tua ahih manin tuni dongin Judah mite in Jesuh pen Messiah dingin sang lo uhi.

Biak nadangte in ahih leh amau Kamsang (Messiah) ciat nei kisikna ah kisial ciat uh-a, ahi zongin a maan Pasian khat a tun thei Lampi khat bek om ahihna tawh kisai upna ah awk uhi. Tua ahih manin i totna lampi kibang lo, i tupna kibang; biakna khempeuh ah hotkhiatna a om hi lel ci uhi. Jesu in Keimah in lampi, thumaan le nuntakna, kei hong tawn loin Kuamah Pa kiang tung thei lo ding a cih khawng bang a nial nuam uh hi pah hi.

Judah mite in Pasian pen Yahweh ci tinten napi, tua Yahweh pen Messiah Jesu (Yeshua) hong hihna ah nial uh hi. Biakna dangte in Jesu (Yeshua) pen Kamsang khat, honpa khat ahihna nial khol lo napi tua Jesu bek Messiah maan taktak ahihna nial citciat uhi.

Pau Cin Hau bang pen Zomi te adingin Pasian kiang i tun nading Laisangpa cih bangin minam khat ah honpa khat ta a om ciat hi lel ci uhi. Tua ahih manin Pasian cih kammal bang Zotual Lai ading bek hi-in, Christian te adingin zat khuan a om lo, Christian te Pasian’ min ding God hi cih peuh, Yahweh hi, Jesus hi cih bang peuh in gen thei uh hi. Christian te sem leuleu sungah zong Pasian’ cih le Yahweh kibang kei, Jesus cih leh Yeshua kibang kei cih tuamtuam zong om nenuk lai hi.

Ka gennop bulpi in Pasian Thu i cih ciangin a min lawhdan, a laimal gawmdan cihte sangin a Thu hizaw hi cih ka gen nuam hi. Jesu, Jesuh, Zeisu i ci-a; Jashua, Yeshua, Jesuh i ci zongin LST gen bangin tua mi banga hong piang Emmanuel Pasian, mawhna Singlamteh tungah a pua khia Pa, sihna in len zo loin a thokik Pa ahihna tawh Pasian’ Tapa ahihna thu a suah zo lo ihih ding kidop huai zaw hi. Pasian i ci-a, Yahweh i ci-a, Jehovah i ci zongin tua LST hong hilh Pa Ta Kha thugawm Pasian khat pen suah peuh mah lo-in Pasian Pasian cihcih pong mawk tawh kizo zo lo ding hi.

Tua ahih manin Pasian i cih pen a min lawh, a awkaih le a malgawm te sangin mawhnei mite tankhia dingin a Tapa Jesu hong sawl Pa ahihna, tatsa mite a gum dingin guppa Kha Siangtho hong sawl Pa ahihna, mawhna hangin mihingte’ tungah a heh Pasian ahihna, tua bang kawmkal ah a hehpih nopte a hehpih thei dingin thunei pen Pasian ahihna cih thute ah Pasian thu um ihih ding; Eite ciin le zuihte, ngeinate zui-a a kibiakna misak gawp, a kihanciam sak gawp bek ihih khak loh ding thupi hi.

Pasian in nang hong it mah hi. Ahih hangin a Tapa Jesu na up kei leh Hell na tung veve ding hi. Pasian Pasian Pasian tang cihcih tawh kingah loin a Thu (a Tapa) i up kul hi. Hih thu Lai Siangtho in gen hi.

Pasian’ thu um i cih: Lai Siangtho in hong gen tua Pa Pasian kiangah tua tapa lo tawh kuamah kitung thei lo dinga, tua Tapa lo tawh leitung mite ii gen pasian kiang tunna a cihte uh zuaupi vive hong hi ding hi. Evan. Suangh Dal