Pasian tawh na kibuan ngei hiam?

“Jakob amah guak bek omlai a, zingsang khuavak dong mi khat in amah a lai hi. Tua mipa in Jakob a zawhlohna a theih ciangin amah in a khelkom sung suksak hi. Tua bangin amah tawh a kilaina-in Jakob’ khelguh a kilawi hi. Tua ciangin amah in, “Khua vak ta ahih ciangin hong khah in,” a ci hi. Ahih hangin Jakob in, “Kei, thupha nong piak kei leh kong khah kei ding hi,” a ci hi. 27 Amah in, “Na min bang ahi hiam?” a ci hi. Amah in, “Jakob,” ci hi.  Tua ciangin amah in, “Na min Jakob, kici nawnloin Israel, kici ding hi. Bang hang hiam cih leh Pasian leh mite tawh na kilai khinzo a, na zo hi,” a ci hi. Tua ciangin Jakob in amah dongin, “Na min hong gen in, hong thum ing,” a ci hi. Ahih hangin amah in, “Bang hanga ka min hong dong na hi hiam?” a ci hi. Tua lai-ah amah in Jakob thupha a pia hi.” (Piancilna 32:24-29).

Jacob in Pasian a buan thu I zaksa leh I theihciatsa uh hiding hi. Lai Siangtho sunga kibuanna (wrestling) a om masakna zong hikha ding hi. Bang hanga Pasian in Jacob buan mawk peuhmah hiding hiam? Bang dinga zankhua ihmu lo lianga kibuan uh hi ding hiam? Tua leh bang hanga hih tangthu pen kum tul bangzah hiam lai a thupiang hi napi tuni donga kigengen lai a, kikumkum lai hi ding I hi hiam?

Bang huan hiam khat ciangin in nuntakna ah mi khempeuh in Pasian I buan ding kisam hi. Haksatna nam tuamtuam, lungngaihna nam tuamtuam, zuau a kingawhna leh minsiatna hiam, mualphona hiam, natna haksa hiam, sihna leh siatna namkim zangin Pasian in I kisap bangin mihingte hong buan zel hi. I nuntaknate hibang dinmun I tun ciangin Pasian in Amah mai zong a buan ngam dingin hong deih hi. ‘Hih leitung nuntak tomcik sungin bang hangin lungkhamna leh thuakna haksate tuakin I omna leh I nuntakna san pentak bang hi hiam cih hanga Pasian pen I buan ngam ding ahi hi.

Tuabang haksatna tuah hun ciangin, mi dawilokte in maituah ngamlo in a maitang uh sel uh a, tuabang haksatna leh thuaknate taisan a tawldamtak leh awlsam taka nuntakna neih ding hanciam uh hi. Mi hangsante in tuabang haksatna leh thuaknate maituah ngam in amau’ maban nuntakna ding kiciantaka gel khol in Pasian pen a kisam bangin buan ngam uh hi.

Mi hangsante’ ading in haksatna khempeuhte pen gimthuakna leh bawlsiatna hilozaw in tona(challenge) leh masawnna ahi hi. Pasian in deihtel theihna leh tupguhna nei dingin hong suisui in hong tat hiam nuam den hi. Tuabang a maituah ngamte pen Pasian in thupha piak dingin hong kamciam hi. Tuabang a Pasian a buan ngamte in a sawt loin tawldamna leh suahtakna nei ding uh hi. Tua in gualzawhna ahi hi. Pasian tawh na kibuan ngei hiam?

Zomi Christian Fellowship, Delhi