Pasian’ muhzia le Mite’ muhzia ~ Dong Mung

Pasian’ muhzia le Mite’ muhzia ~ Dong Mung

Jeremiah 29:11 Bang hang hiam cih leh Topa in kong cihin-ah, mai lamah lametna note kong piakkik ding, na siatna ding uh hi loin na phattuamna ding uh geelna ka neihte kei bek in ka thei hi.

Isaiah 55:8 Bang hang hiam cih leh keima ngaihsutnate nomaungaihsutna bang hi lo a, keima paiziate nomau paizia bang hi lo hi, Topa in ci hi.

Isaiah 55:9 Vantung pen leitung sangin a sanzawk mah bangin, keima paiziate zong, nomau paizia sangin sangzaw a, ka ngaihsutnate zong, nomau ngaihsutna sangin a sangzaw ahi hi.

Mihingte i nuntak kalsuanna ah pawlkhatte taikawm sa in mainawt uh a, pawlkhatte damdam in kalsuanna tawh mainawt uh hi. Kalsuan mainawtzia akibatloh zenzen hangin i phawk gige ding thu khat ah, Pasian in Sumkuang le Sakolte in Noah teembaw sung atun nadingun nikhat tuak mah na pia, hun khat tuak na pia veve hi. Tua mah bangin na nuntak kalsuanna ah Sumkuang bangin damdam in mainawt na hiphial zongin lungkham kei in. Pasianin na khualzinna hong tunpih ding hi.

Jacob in Joseph a muh ciangin tapa pahtaak huai mahmah khat in mu-a; ahi zongin a sanggam sawmte in mangmanpa, kimanna neilopa in mu uh hi. Khualzin mite in Joseph a muh uh ciangin sila dinga hoih khat in mu uh-a; Potifer in sila hoih khat in mu hi. Potifer zi’ in Joseph a muh ciangin a iplah huai tangval khat in mu-a; thongcingpa in a muh ciangin thongkia mi khat in mu hi. Amaute muhna bangzah takin khial hiam? Pasian in Joseph a muh ciangin Egypt gam-a ulianpen (Prime Minister) dingin mu hi… Ahi zongin a hun tung pah lian hisam lo hi.

Mite hong muhzia, mite hong muhdan hangin lungkia le thanem kisa kenla, Pasian hong muhzia le muhdan tawh kithakhauhsak zaw in. Na kianga mikhat zong va neumuh in va simmawh kha kei in. Pasian in ama ading akoihsak le Pasian in amah a muhzia, a muhdan theihpih lo hiteh!

Na inn nasemnu/pa zong mailam ah na tate na sepna mun ah makaipi ahihkeh a neipa hong suak thei a, na huan cingpa zong mailam ah kumpi hong suak thei hi. (A phawkhuai thu in- gamsunga tuucinga om tangvalno David pen Israel-te kumpi dingin sathau nilhna ngah in kumpi hong suaka, tagah numeino a pano in a kep Esther zong kumpinu hong suak hi… Tualaitak dinmun hangin kuamah neumuh kenla, mite hong muhna hangin thanem kei in…A hun a tung nailo deuh hizaw hi).

MITE hong muhzia le muhdante a thupi hi masalo a, PASIAN hong muhzia le muhdan un a THUPI pen ahi hi.

Topa Hoih Hi:

Kum tam tawh kisai in phamawh sa lo hi; Abraham zong a kum tam khit in thupha pia lel hi.

Siamna le theihnate en masa hilo hi; David zong bangmah theilo khat tel lel hi.

Pasal/numei ci-in khentuam neilo hi; tagah numeino Esther zong lamsang lel hi.

A beisa hunin bangzah gamtatsia cihte awlmawh lualo hi; Paul zong telin sam-a, zang lel hi.

Pumpi pianzia tawh bangmah thukhen lo hi; tuntom Zekhe telin a inn ah tung lel hi.

Thu gen siam zalzalna zong awlmawh masak in neilo hi; dawng-awk pau ziakai Moses zong telin Israelte makai in koih lel hi.

Tulaitak dinmun le nuntak khuasaknate awlmawh masak luatin neilo hi; numei paktat Mary Magdalene zong telin zang lel hi.

I Pasian kikhel ngeilo hi.

• A sep noploh ding kamciam hong pia ngeilo Pasian hi.
• Ahuh zawhloh ding kuamah om lo hi.
• A dawnkik noploh ding thungetna om ngeilo hi.
• A it zawhloh ding kha om tuamlo hi.
• A maisak zawhloh ding mawhna khat zong omlo hi.

Pasian hong muhzia le muhdante tel siamin, i mailam a om i thuphate i ngah theih nadingin tulaitak i dinmun le mite hong muhzia le muhdan hangin thanem loin mainawt ni… Lungdam, Dong Mung