Pasian lungtuak Sialsawm leh Khuado ~ Suum Do Thang

Pasian lungtuak Sialsawm leh Khuado ~ Suum Do Thang

1. Ihpu ihpa ten “Dawibia“ cih min ana puak zenzen uh hangin eite bangin a kha uh vantung gam tungding cih ngimna nei lo uh hi. Pasian om,dawi zong om hi cih um uh hi. A nat asat uh ciang in dawi in pet hi cih na um uh ahih manin dawi nathawih uh hi. Dawithawih na ah gango in a si taak a, tua agawh uh gan i mukdawn, khedawn, khadawn, a bildawn leh asin alung themno khat cih bang la in dawi te a ding “Khem na” tawh napia a, a satak limci nono teng huanin a mau ne uh hi. Dawite a dingin innsa leh gamsa , zam, dak leh khigui cihbang van manpha te zong ,tungman lomin “a lim” mek tawmin, khemna mahtawh pia in ciahsak uh hi.Thupha ngetna leh Lungdam koh biakpiakna “ Sialsawm leh Khuado “ te zong nanei uh hi.

2. 2012 October kha ni 1 ni in ih GZA makai pipa Rev.Dr. S. Pau Khan En (Sia En no) in Zongeina Sialsawm leh Khuado pawi te ih omna munmun ah, hamtang ngaihsut a, ih bawlding hong hanthawn hi. Thupi ka sa hi. Ih ngeina ih thupi sim keileh ih minam zong a simmawh ih hihi. Ih tenna khua leh tui, mun leh mual, luipeuh mualpeuh in honghal man a, zatdan a ki lamdang Zongeina hoihte Tapidaw nuntak zia tawh enpha in puahtuak te puah a,minam khat cih ih kitheihna dingin zat huai hi.

2012 October kha ni 6 ni Sia Hau Thang laiat na sungah ahi zongin, Lengtong Pauno leh Lia Deih Mang te thu kidot nate sungah Sialsawm leh Khuado thu tampi ih ihza ihmu a, muhdan theihdan leh zatdan zong, kibang kim hetlo hi. Tun ki kawmna awl ta ban ah khuakhat tuikhat bangin khuapi te ah tengkhawm ih hihman in Sialsawm leh Khuado pawi te ah, ih ngimna bulpi bang hi a, bang phattuamna (Aims and object) a om hiam? cih kantel in,Pasian lungtuak biakpiakna a ihzat theih nading leh thupha namkim ihsan na ahih theih nading,pawi bawlzia ding khat hong gelkhia zo leh ci-in Pasian nasem Pastor te leh a lunglut te tungah kei muhna kong pulak hi.

SIAL SAWM

3. Ihpu ihpa ten “Sialsawm“ cih min a na vawh uh hun lai bangin Zangsial kibeng, Sial kigo cih omzo nawnloin,a neizo ten pawlvok khawi gualtai in,,vok mah kigo pha pen hi. Tuhun teh vok naleng ki khawizo nawn loin bawng peuh sial peuh ki sehsat in, saseh peuh tawh behsung, u leh nau tawh ankuang umkhop kamkumna kinei zawsawp hi. Sialsawm i ngimna leh tupna thu kei theihna atom in konggen pak nuamhi. Ihpu ihpa ten vaimim leh taang zantak an dingin nacing uh a ,Dota kha(March)sung Vaimim tuh leh taangpawi na kipan uh hi. Dopi kha (April) kim khawngah khaici khiat nazo uhhi. Khaituh khitteh ni naksat lua mahmah ahih manin,guahzu keileh khaici te po theilo hi.

Khaituh khit Sialsawm ni in a behbeh, apawlpawl in sa kigo in ankuang umkhopna a kineih ban ah, khuazang ai awh in, khualaizang munhoih tualzang khatah, suang thum thuk bangin phutin a tungah suangpeekpi khat phah uha, biakna tau khat bawl uh hi. Tual siampi leh tual upa ten gan(vok ) khat go in suangpek tungah asi taak uh a, tualbaikna ading in, a mukdawn, bildawn, khecindawn, mei dawn, asin leh alung tawm tuak cih bang lain, biakpiakna tau suangpeek tungah lui uhhi.Zulup uh a,tual siampi pan zutep in phih a, phuisamin khaici te a po nading, akisam guahtui ngen uhhi.Zusa,vasa,ganhing tuamtuamten ankung a suksiat loh nading,cidam nading,huihsia guahsia aomloh na ding,khawi leh vulh ah thupha angah nading ngen a,kumpha toin kumkhat sung avai khempeuh aphi.(Late:-65 :9-13)

KHUADO PAWI

4. Khuado pawipen pawlkhat ten galdo,zindo danin ngaihsun hi.Kum khat sung lokhawh nasep, anlak ki zo, lungdamkoh biakpiakna nei, kumlui tawh kikhen, kumthak dawn,kumthak sung hauding, zawng ding, damding, nading cih khuai aisan na leh dawi leh kau hawlkhia, kha galdo na ahihi. Beh leh phung u leh nau ankuang umkhop, innkuan vaikikupna hi a,a beh abeh in,beh bulpen te inn ah ki omkhawl ahih manin,beh kibanglo atam leh omkhawl namun atam hipah hi. Gan (vok) khat peuhpeuh kigo a,gan gawhni pen pansikni kici hi. A zingteh kheklehni kici in a thai ciang pen khekleh sawn ni kici hi.Pansik ni-in sa sungkua leh a sa kham mahmah ding ki huan a, kheklehni leh kheklehsawn ni ading sa pawlkhat kikhai hi.Duhzah nek khit teh pawlkhat in gualnop na bawlin sa ki bak lailai uh hi.(Thkna 16 : 9-10 )

5. Pansikni nitak in gamsung ah khuaila uh a,khuaipua te masa in khuangtumpan zom in mi khat leh khat pi 10 tabang ki hal in meide sa in hong ciah uhhi. Hong tunkuan uhteh phit, khuang leh sialki tum in phitlam in honglam uhhi. Nupi ten zozu khaihsa thawlah thunin vai hongdawn uh a, a banban in zutulh in dawnsak uhhi. Inn hongtun uh teh Khuado lasa in lamvui uh a,a gualnop uh leh zanhak thei uhhi.Kumthak ading khuaipheng enin khuai ai an uhhi. Khekleh ni teh khuai ainuam aom uh leh sagoin zulupin aithei hi.Khuaiai leng ihsih teh khuai in thohung hi ci-in um uh hi.

6. Kheklehni nitak ciangin “Kau hawl“ uh hi. Khuado pawi bawlna inn khempeuhah nitak khuamui khit a kipanin, lupnapi khekhuan pan innsung khempeuh bemkawm dongin singkhuahbawk leh ciang tawh sat koikoi uh a, ”dawi aw ciah in, kau aw ciah in, miksi thovai aw ciah in,nazun naek namsia hi” ci-in ki ko gawp, awng gawpin tuhun khami te innsian suah bangin innsung pan bangkua, innlim, bikhalap, innka leh sialkawng dongah dawi hawlkhia in a singkhuah tawng tawi te uh tawh dengphei gawp uhhi. Hausa ten kau ki hawlkhia khinzo hi cih na thau honglawn in tuakhit teh kau hawlkhia inn khempeuh pan thau kilawn ziahziah a, khuasung tengah thauging leh awtna aw bekbek kiza hi. (Mark 16 : 17) ”Khua” cih pendawi tawh ki sai mun teah a kizang kammal ahihi. Gentehna in Ngalkhuahang, khuasia meide, innsung khuazing, khualei uikai, khuasia, khuapha cih te leh Mizo te bangin khuavangin, khuavang chinchiahna cih na nei hi.

7. Tua ahih manin Sialsawm, Khuado pawite zulehsa nekna leh zola sa a, zolam a lamding cih bang ciangbek in ngaihsun lo a, Pasian zia le tong tawh kituaka, Pasian lungtuak Sialsawm leh Khuado pawi te ahih theih na dingin, Zongeina tawh Pasian biakpiakna khat a suahtheih nading in Biaknalam makai ten hong vaihawm theileh cih ka lunggulhna kong pulak hi. (Paunak 3:9-10) Suum Do Thang