Pasian leh Siikan ~ Pau Khat Suan

Pasian leh Siikan ~ Pau Khat Suan

Siikan nei mahmah siapi nuai a, siikan khauh mahmah sang ah phayu-phaye a sangkah cihbang a om theihloh mahbang in, a kician mahmah Pasian’ thu upna leh zuihna ah phayu-phaye cihbang om theilo hi.

Mihing – Pasian kizopna tangthu limtak velkik lehang nakhempeuh, zia le tong khempeuh khunkholhsa sitset, kician tak a acih bangbang zuih a kul kizopna hi. Ut dandan a biakpiak.. cihbang om theilo hi. Kikhel lemlum lo hi. Tu le tu ading, tu a gentawm bawltawm khungtawm pak… cihbang omlo hi.

Zanni, tuni, atawntung a kikhel lo Pasian, kikhel lo hi. Khelsawm pong kei lehang hoihzaw ding hi.

A phawkhuai khat ah bel.. mihingte a it mahmah Pasian in mihingte tawh a kizopna ahun zui in Leitung zia tawh a lempen a a-adjust na ciangciang bel om hi. En amah zuizaw ding kimlai, aman mihingte zuizaw mikmek thei hi.

Ahi zong in a pongpi in leitung ki-ukna kumpiziate, mihingte’ pilna leh Pasian a muhdan uh, … ( localized bel hilo ) in mihingte va nai zaw (approach) mawk hi. Mihingte taitai in Pasian in delhdelh hileh a kilawmna, a kilawm hun tam mahmah zawzek mawk hi.

I ngaihsut theih leh (or) ngaihsut theihna ding a ongpiak khuak i zattheih leh a ngaihsut huai thu tampi om hi.

Bangbang ahi zong in Pasian bel Phayu-phaye Pasian hilo hi cih phawkden huai. Pau Khat Suan

Azo alel sang athu thupi zaw

Thu kikupna sung a kinialna leh thu kituhna khat peuhpeuh ah azo a lel cihsang in tua kinial kituhna pan bang thuhoih ngahkhia thei ihi hiam cih pen thupi zaw thamtham hi.

Thu kituhna peuhmah ah hoih i sak penpen, a hoihpen ding deihna tawh kigen, kinial, kituh ding hoih a, a zenzen a ei’ hoihsak, ei’ ngaihsutna sang a hoihzaw a om leh zong ei’-a a khiathei ding a kigin gige ding ahoih ahi hi.

Ka cihsa ka cihsa… ci a kipasalsak a pan’ tentan pongna pen pasalna hi hetlo a, haina hizaw hi. Ei’ cihsang, ei’ ngaihsutna sang a hoihzaw a om leh “aw! Nang ngaihsutna hoih ei!”… cithei a ei’ ngaihsutna khiattheihna pen pasal hihna leh pilna hizaw hi.

Tua in lungsim siangtho tak a kipawlkhop theihna piangsak a, khut kilen a ma pankhop theihna tawh gualzawhna hoihpen, ma tutna sangpen hong tunpih hizaw hi.

NB: Pawlkhat lungsim kawi vanglak, thu kikupna pan ama’ cih a kiman’ kei a, ama’ cihsang a hoihzaw a om leh pau phalo sim zawzen in meeting pualam ah a na lehtat, thudang ana phuang, ana vaihawm sese kaltang om thei peuhmah laizang hi. Meeting sung a ama’ cih a khia nuamlo teltalte sang suuksia zaw. Pau Khat Suan