Vondeih Kep Ding – 39 (Pau Khan Kap)

Dear Tawngno,
Na pa in ka theih ngei pa pi pawlkhatte innlak (milak ah) ah dik mahmah napi-in amau inn ah hi leh a innkuanpihte in sahang kihtaak in kihta-in kamkhat pau leh lingkalkal zah dongding in lau mawk uh hi. Pawl khat leuleu ciangin milak ah gitloh pau laklak napi-in a inn vuah hileh innkuanpihte tawh ciamnuih peuh bawl in om thei mawk uh hi.

Tangval pawlkhat ta leuleu a inn vuah bangmah sem nuam lo, khutzaw khezaw bangin om napi-in a nungak helna khawng ah thanuam cihtak in thanuam bilbel uh hi. Thu khat la khat om leh sawlkul genkul peuhmah lo-in leng laklak liangin tai valval liang uh hi. Pawl khat te leuleu a inn vuah thanuam napi-in midang peuhmah huh theih dingin a ngaihsut ngiatlo mi omta leuleu hi.

Na pu adam lai-in hong gen ngei thu khat ka phawk kik hi.“Mi inn khat peuh na hawh ciangin a innteekte-in vaimim khawng a tol leh nang guak melkhang khawng ah tu teta lo-in tol pih phei in. Innteek te an ne dingin hong kithawi in ankuang khawng hong lui ciang,‘ hong hawh kik ning’ci-in kihem in. Mi inn khat peuh na hawh ciangin na lut ma-in hemnawl masa hamtang in,’’hong ci ngei hi.

Tuin na pu hong gen thute ka ngaihsut kik ciangin na pu in khat peuh hong muhdah ding, khat peuh i mitdong dingin ka om khak ding hong na phal hetlo ahih lam phawk kik ing. Khat peuh hong etneu ding, khat peuh in ciamnuihna in nang hong zat ding ke’n zong hong phal lo hi ing. Kei bek hi tuan kei ning. Mi khempeuh in a sung panin apiang a tate uh mi etneu ding leh mi simmawh dingin a phal kuama ta omlo ding hi. Kong phal loh bek hi-in thatang suangin nang hong sawl thei, hong uk thei lo hi ing. Formula khawng aom hi leh bangzah bangzah abei zongin nang adingin lei in hong khak ning. Ahi zongin tuadan dingin a kibawl formula lah om lian nai lo ahih manin haksa sa ing.

Nang leh nang kisit in nisim in na kipuah tohtoh ding hong deih ing.

Tua leh khua sung ah vok asi si lai mah hiam ou. Khuapihte pawlkhat in,‘ mobile tower aom hang hi’n teh,’ci-in tua thu lunglut huai sa ing.

Hong it,
Na pa
Columbus, OH
July 30, 2016