Malaysia, Penang ah pasal khat thautawh 10 val veibang kikapgawp in silo bilbel

Malaysia, Penang ah pasal khat thautawh 10 val veibang kikapgawp in silo bilbel

Malaysia, Penang ah Handphone azuak pasalkhat zanni Saturday ni in thautawh 10 val veitak kikapliam cih theStar pan kiza hi. Tua aki kapliampa ii aminpen Tan Yi Chin kici a, kum 23 aphakhin khat ahihi.

Zingsanglam in alawmte khattawh Food Court ah zingsangan Breakfast nekhawm uh a, tuakhit ciangin Machang Bubok aom ama omna inn ah aciahkhia ahihi.

Nidang inzong tuabangin anawkzelna himahleh zanni zingsangin Taman Sentosa geinai aom Jalan Kulim ah Traffic Red Light ngakin aomlaitak thautawi pasal khat hong suakkhiavat in, thautawh amawtaw kapsakgawp hi.

Akigawm in 10 val veibang kikapding ci’n ki pulakkhia a, ahi zongin kamphatna tawh Tan Yi Chin pen suaktathei bilbel hi. Ahi zongin ataklam aliang, akhut leh apumpi ah thautawh kikapkha hi. Tua liamma tengtawh mawtaw ii aveilam panin ki hemkhiathei a, amanlang in Bukit Mertajam Hospital ah kipuak hi.

Tua thautawipa pen akizom in 10 val veibang akap ngekngek khitciangin aphual panin taikhia vingveng hiding in ki ummawh hi.

Penang police chief Comm Datuk A. Thaiveegan in agenkhiatna ah hih buaina apianhun pen zingsanglam 11:15am hunpawl hi a, Jalan Kulim lamkabom mawtaw tampi in anawknawkna “Busy traffic light junction” ah thupiang ahihi ci’n genkhia hi.

Thau kapliam athuakpa pen zato ah kikem in, bangmah lunghimawh naluatding omlo hi. Thautawh akappa pen matkhiattheih nadingin amankhiading Task Force kiphuan in, aki kansan laitak hi ci’n genkhia hi.

Central Seberang Prai OCPD Asst Comm Nik Ros Azhan Nik Abdul Hamid in agenkhiatna ah thautawipa pen amaitang akimulo dingin Ski Mask thuahin, Tan Yi Chin ii atuanna mawtaw Honda Accord pen apualam panin 10 val veibang akapgawp hi ci’n genkhia hi.

Tua thau kikapna aphual ah thautang ahawng “bullet casing” bekbek zong 11 bang kimukhia in, Semi-automatic Pistol thaunamte kizang hiding in ki ummawh cihi. Tua kuamsung aom CCTV te panin Video Footage te ki kaikhawmding a, thaukappa matkhiattheih nadingin ki hanciamding cih kiza hi. Malaysia gamsung ahzong thau kikapna kizathei zelzel hi. Sawltak #zomidaily

Video: A 23-year-old smartphone dealer survived a shooting incident at the Jalan Kulim traffic light junction in front of the Taman Sentosa food court in Bukit Mertajam, Penang on Saturday morning.

Update: theSun te’n tuni Sunday ni in apulakkhiatna ah tua thaukappa pen Police te’n mankhia theita uh cihi. Thautawh kapgawp athuakpa pen phone azuak kawikawi, Smartphone Dealer khat kici a, thautang in 4 veitak akhak hangin silo hi.

Thautawi, thaukappa pen kum 40 gualpawl hi a, Saturday zankimlam 10:30pm hunpawl in Tanjong Tokong ah akimankhia ahihi. Friday nidong Remand tawh kikemphot dinga, tuaciangin thusitna kineiding cihi.

More: Malaysia, Setapak vengsung ah sangsia khat thautawh kikaplum

Tuabangin thaukikapna apianna pen St Anne Church biakinn geinai hi a, hihcibangin khuasung ah thuakikapna apian ciangin khuasung mipite patau linglawngthei mahmah uhhi.

Kapliam athuakpa pen Seberang Jaya Hospital ah kikem in, 10 val veibang akikap hangin thautang 4 bekin kha hi. Tulaitak zong zato ah aki suamlup khakding, Security apiading in Police te kicingsak cihi. Hihbangin aki thahsawmna, suamlup sawmna pen sumbawlna ah kidempih “Business Rivalry” hang hiding in ki ummawh hi. Sawltak #zomidaily