Malaysia Hotel sungkhat ah papikhat leh kum 10 aphapan atunu aomkhop laitak kiman

Malaysia Hotel sungkhat ah papikhat leh kum 10 aphapan atunu aomkhop laitak kiman

Malaysia, Johor Baru aom Hotel sungkhat panin papi khatleh kum 10 bekbek aphapan atunu (Niece) aomkhop laitak kiman cih Bernama pan kiza hi. Johor Baru, Taman Tunku Aminah vengsung aom Hotel khatpan in zanni Thursday zanlam in Police te’n amatkhiat uh ahihi.

Hihvai tawh kisai in kumpi thunei ahi Johor Baru Utara district police chief ACP Mohd Taib Ahmad in agenkhiatna ah papipa pen kum 48 aphakhin khat hi a, atunu kum 10 bekbek aphapan tawh Hotel sungah akiman cihi.

Papipa pen Cleaner nasep asemkhat hi a, Thursday zanlam 9:15pm hunpawl in atunu tawh Hotel khatah alutlam akimuh ciangin thuneite tungah ki zasak hi. Tuaciangin Police te’n Hotel ah delhpah uh a, tuapan in akimankhia ahihi.

Police te’n Hotel sungah adelh uhciangin kongkhak kiumasa uh a, ahi zongin ki honpaklo hi. Minute 5 khitciangin papipa in kongkhak honpan hi.

Papipa apusuah ciangin puan bangmah silhlo in, Towel dialkhat tawh kitunziau in kongkhak honsak hi. Hotel inndei sungah numeino khat aguaktang dekphial in kimu hi.

Athu hoihtak akikan ciangin tua numeino kum 10 bekbek aphapan pen papipa ii atunu (Niece) ahihlam kitheikhia hi ci’n Statement ah tuni in thunei te’n pulakkhia uhhi.

More: Malaysia, Penang ah kum 15 aphapan atanu buanin agaisak papi khat kiman

Papipa pen zi leh ta aneikhintham hi a, ta 3 neikhin in atate zong kum 25 leh kum 28 kikal aphakhin ahihi. Naupang kumcingnailo bekthamlo, sileh sa kinei mahmah (Incest) aomkhawm uh ahih manin, papipa pen Section 376A of the Penal Code tawh thu kibawlding cih kiza hi. Sawltak #zomidaily