Malaysia ah papi khatleh atate 3 asisa in amau innsung ah kimu

Malaysia ah papi khatleh atate 3 asisa in amau innsung ah kimu

Malaysia, Kedah State sung aom innsung khatah papi khatleh atate 3, akigawm in mi 4 tak asisa in kimu cih NST pan kiza hi. Sungai Petani khuasung aom Amanjaya, Perdana Heights kicihna innkhat ii lupna inndei sungah avekin asisa in akimu ahihi. Hih sihna vaipen Police te’n “Murder-suicide” Case hiding ci uhhi.

Zanni Monday nitaklam in hihte innkuan avekin asisa in akimu ci a, apapen amahleh amah khautawh ki khailum “gui awk” cihi. Asi ata 3 te lakah nihpen pasalno hi a, kum 5 leh kum 5 aphapan uh ahihi. Adang khatpen tanumei hi a, tuanu pen kum 8 aphakhin khat ahihi. Atate minpen Yamunasri, Sashvin Rau, Ragu Ram Rau kici hi.

Thukan ulianpen khat ahi Kedah Criminal Investigation Department chief Senior Assistant Commissioner Mior Farid Al Athrash Wahid in agenkhiatna ah tua papipa pen kum 49 aphakhin khat hi a, aminpen S. Sivarau cihi.

Misi akimuhna lupnadei pen Double-storey House khat ii atungnungdawl ah hi a, innteekpa aki khailupna Bedroom sung tektek ah abeisa kal 3 hunpawl in azi zong amahleh amah ki khailumkhin cimawk hi.

Thukan ulianpa genna ah hih innkuan mi 4 tepen aluanghawm akimuhma nai 12 hunpawl in asikhin hiding uh cihi. Aluanghawm akimuhpen zanni Monday nitaklam 1:30pm hunpawl in meltheih tanau khatin amuhkhiat ahihi.

Innteekpa in amahleh amah aki khailupma in atate naklahcipsak “Suffocated” in athahlup khitciangin amahleh amah aki sihbawl hiding kici hi. Banghanghiam cihleh atate ii pumpi tungah bangmah liamma omlo in, ahi zongin asihna ahang taktak “cause of death” pen zato panin Doctor te Post-mortem tungtawn in kicianpending cihi. Aluanghawm tepen Sultanah Bahiyah Hospital ah kipuaksak hi.

Hihte innkuan pen banghang in azi asihkhit zawhzong sawtnailo in, innkuan beiliang in ki sihbawl, ki thatlumliang uhhiam cih akikan ciangin sumlepaai vai buaina “financial problems” hang hiding kicimawk hi.

Kum 60 aphakhin S. Punita akici nupi khat ii genna ah ka tanu pen abeisa kalthum hunpawl in hongnusia a, kadah akahzong vengnailo in, tu’n katu te 3 takleh ka makpa in hongnusia leuleu ci’n genkhia hi. Tua nupinu pen innteekpa ii asungnu (azi’ nu) ahihi.

Tua asungnu pen innnuai ah alum hi a, amakpa leh atute pen inntung ah alum uh ahihi. Anunung kamuhpen zannitak annek laitak hi a, annek khitciangin nitaklam 10pm hunpawl in inntung ah alumding in akahto uh cihi.

Zankim ka ihmut laitak in atunu ii akah awging in hongphawng ci a, ahi zongin bangmah thusia apiangding in ka lamenkei cihi. Zingsang 8am hunpawl in kathokhia a, atute leh amakpa kuamah hong kumsuklo uh cihi.

More: Innkuan papi khatin ahawl mawtaw kibung in azi leh ata in sihlawh

Sun annek hundong kuamah akumsuk lohciangin inntung ah kahto in, kongkhak akiuhkiuh hangin husa zasa, kidawnglo ahih manin, kongkhak ahonleh patateng avek in asisa in na om cimawk hi. Asungnu in amakpa pen abeisa tawlkhatbel aomzia mantaklo, angei bangmello in, ahi zongin azi in asihsan tawh athuaklah hikhading ci’n ka ummawh ci’n genkhia hi.

Khasiat huai, mulkimhuai giapgiap mahmah mawk uhhi. Sawltak #zomidaily