Chin State, Paletwa kikapna hangin India gamsung ah galtai mi 1400 bang phata

Chin State, Paletwa kikapna hangin India gamsung ah galtai mi 1400 bang phata

Chin State, Paletwa Myone sungah AA (Arakan Army) akici Rakhine galkap leh Tatmadaw galkap (Myanmar Army) te kikapna nasia mahmah kici hi. Tua gal kidona hangin Paletwa panin India, Mizoram sungah galtaikhia akigawm in mi 1400 bang phakhinta cih BBC pan kiza hi.

Gamsung buaina, gal kidona hangin ataikhia atamzaw pen Paletwa leilulam aom Kaladan River khunglam aom khuakhatpan hiphadiak uh cihi. Akigawm in galtai bekbek pen mi 1400 valkhin ci a, Mizoram State sung aom khuakhat ah aguklutphot uh kici hi.

India gamlampan in hih galtai te ahuh apanpih ahi Khine Min Thein kici in agenkhiatna ah tua galtai tepen Paletwa Myone sung aom Pakawa, Pinlewa cih khuatepan hi uh a, ahi zongin atamzaw pen Rakhine minam te cimawk hi.

Tulaitak Myanmar gampan in hongtaikhia Refugee galtai te ii sazian pen India Army te’n hoihtak in aki kaihkhop laitak uh cihi. Tua galtai in India gamsung alutte pen khuakhat leh khuakhatzong utut in apai kawikawiloh nadingin kikhamcip cihi.

Tulaitak tua galtai te ii anektawmding nekledawn pen kinak sapkin mahmah a, tuabek thamlo khuadamhun tawh kituak sawnsawn ahih manin, puanlum, puansilh tampizong kisamkin mahmah cihi.

Rakhine galkap leh Myanmar galkap tepen ki kapkaplai ci a, tua kidona hangin galtai Refugee pen kibehlap totolai khading hi ci’n thunei te’n genkhia uhhi.

Khuasung mite genkhiatna ah galkidona pen kizomzomlai a, Myanmar Army te’nzong nasiatak in galvanleng te zangliang in AA Rakhine galkap te omnading in a upmawhna pawlkhat ah Bomb khiatsuk uh cihi.

Abeisa inzong tuabangin galvanleng tawh Bomb akhiat pawlkhat omding kici a, tuaban ah abeisa November 26 ni mahmah inzong galvanleng tawh Bomb kikhiatsuk hi ci’n Khine Min Thein in genkhia hi.

More: USA, Kentucky ah Chin State pan Kawlgam mikhat thautawh kikaplum

India gamsung thukizakna ahi “The India Express” te genkhiatna ah hih gal kidona hangin Myanmar gampan in ataikhia Rakhine minam 1200 bang phading hi ci’n pulakkhia uhhi. Pawlkhat pen India gamsung ah alut aom mahbangin pawlkhatte pen Paletwa Myone sungtawnglam amuanhuaizaw munte ah ataizong pawlkhatom kici hi. Sawltak #zomidaily