Pakistan gamah Christian nupa thatin a halte mi nga sih daan kipia

Pakistan gamah Christian nupa thatin a halte mi nga sih daan kipia

Nov. 24, 2016: Punjab province sunga om Kot Radha Kishan khua-ah 2014 in lai thei lo Christian nupa Shahzad Masih leh Shama Bibi kici in Islamte Lai Siangtho Koran laidal pawl khat bal khia in nin tawh pai khawm uh ci-in Muslim hong khatin in bawh huan in that uh a, a luang uh leisek (brick) halna (kiln) meiphual sungah haltum uh hi. Hih thupiang hangin Punjab sunga Christian tampi in zong Pasian gensiatna kammal hoih lo zang (blasphemed) hi ci-in ngawhna tuak uh a, Muslim ngongtatta lau-in thu-um tampi galtai uh hi.

Shahzad Masih leh Shama Bibite nupa kithahna leh kihalna hangin kum nih phial mahmah thu kanna kinei a, hihte gel nupa thahna a kihel mi ngate tungah sih daan (capital punishment) piak dingin Pakistani anti-terror court in thukhenna nei ta a, Pasian gensiatna kammal hoih lo zang (blasphemy) hi ci-in a man lo pi-in thahna tuak uh hi ci hi.

Pakistan gam-ah “Blasphemy Law” kici thukham khauh mahmah om a, Pasian gensiatna kammal hoih lo zangte thah theihna ding thukham om a, ngawhna man loin a thuak tam mahmah ta hi. Hih blasphemy law pen mimal in phuba lakna ding leh thuk kikna dingin vanzat in zang uh hi ci-in hih thukham gensia ten gen uh hi.

Shahzad Masih leh Shama Bibi kithat in leisek meiphual ah kihal hi a kicih hangin a kilot ma-in a sih leh sih loh uh kitel lo hi. Shahzad Masih leh Shama Bibi nupate gum dinga thukhen dinga kizang Riaz Anjum in amau gel kithahna ah mi 103 in ngawhna tuak uh a, ahih hangin Lahore Eastern Court in mi 90 mawh lo hi ci-in hih ngawhna panin phelkhia/pengsak (acquitted) a, tuate lakah leisakna neipa zong kihel hi ci hi.

Nupa that mi ngate kikhailum ding a, mi giatte a kum nih sung bek thongkia dingin Pakistani anti-terror court in sehsak hi ci-in Riaz Anjum in gen hi. Hih thukhenna pen Pakistani anti-terror court Senior prosecutor Khurram Khan in daan a piak ahi hi. Nupate 2014 pekin kihal ahih hangin Islamist-te kihtakna hangin a thatte police ten lawng ngam lo uh a, thah dinga kipiate zong kithat takpi ding hiam cih kitel lo hi. Source: Independent/ Thang Khan Lian