Oxygen kikawm theita ~ Sia Do Khup

Oxygen kikawm theita ~ Sia Do Khup

Oxygen thun nading lungkham a i om laitakin Gaspa neite Nuam Nuam in phone hong set a, “Sia aw oxygen bung 20 hong thunsak nung, nang na dam ta hiam? Kei Topa hehpihna tawh dam ta ing” ci-in phone 📱 hong set zenzen a lungdamna kigen theilo hi.

Cina gim deuh a nei ten NRC card hong tawi unla, kikawm thei ta hi. Gaspa te deihsakna hi. Topa in Gaspa company thupha hong piaksak semsem ta hen.

COVID 19 TAWH A SI PASIAN NASEMTE

Covid 19 tawh a si Pasian nasemte innkuanpihte tungah antang ip khat leh sathau tawi khat ta kipia hi. A innkuanpihte in kisuang lo takin hong la ciat un, sih tawh gensiat tawh ngah ihih manin antang beek tawh kisiatveh ni ei guai. RC Topate, Pastor, Evangelist, Lai Siangtho sangsiate, Biakna zumpi a semte, a innkuanpihte ciatin la thei hi.

• CIKHA KUAL – Cikha lam a ten Thawnpi leh Sia Maa Sing kiangah na la un.
• TONZANG KUAL – Tonzang ah TCF-te kiangah kila thei hi.
• TEDIM KUAL – Lawibual a Sian Lian-te sai ah kila thei hi.
• KALAYMYO LEH TAMU KUAL – Sia Do Khupte inn ah kila thei hi.
• YANGON KUAL – Full Gospel a sem, Rev. Thang Kim leh Rev. Lun Cing kiangah kila thei hi.

TENGH 100 VAL HONG ZONG KHIA, DR. THAWN

DR. VUNGH KHAN THAWN -I mipihte huh nadingin Ks.10,500,000 val hong vaihawmkhia Dr. Thawn pen Ngen Nung khua Rev. Pau Hen Thang (Sukte) leh Pi En Ngaih Cingte tapa hi a, S.Korea panin Ph.D (Leadership) zo hi.

I mipihte huh nading ahih nak leh Dr. Thawn tha a pia den Syama Nuam (Lian San Nuam) pen Sia Lian Za Mung leh Pi Don Hau Niangte’ tanu ahi hi. Tu-in Dr. Thawn leh Syama Nuam in Topa thupha Tg. Thang Sian Piang nei uh a, S.Korea ah om lai uh hi.

More: A nihveina tangkha tui akhauh zawdeuh ~ Sia Do Khup

Amau a bawngin Zogam Zomi a vei mahmahte uh hi a, Sia ST Hau Go leh Zogam khanlawhna pupi, Sia Hau Lian Kham-te tawh bawng khat ahi uh hi. A pute a pate mah bangin Dr. Thawn in zong i mipihte veina tawh vai lianpi hong hawm manin lungdamna lianpi i ko hi. Pasian in Zogam leh leitungbup adingin hong zatsak semsem lai ta hen. Sia Do Khup