Open Talk on Literacy facing Zomi Youth Today

Open Talk on Literacy facing Zomi Youth Today

Tedim – August 31

Organized by Zomi Youth Association – Tedim
Amun: CSO Hall, Zogam Villa, Sakollam Veng, Tedim
Ahun: August 31, 2014 (Sunday 2:00 – 4:00 PM)
Thusungpi: Sia G.S Pau, Associate Editor, TEDIM POST.

Thusunte atomin:
1. Lai gina kei leh minam zong gina zo ngei lo.
2. Lai kin lo minam, biakna leh kipawlna mangthang ding.
3. Degree nei tektek lai simsimte mah lawhcing zaw.
4. Pastor tektek laisim Pastor-te’ thugen kicimtaak theilo pen.
5. Na mailam ding pen na laisimna tungah tampi kinga hi.

Mipite Holimna Pan:

1. Zomite laisim minam ih kici ngam diam? –
Laisim minam ih ki ci ngam nai kei ding hi. Ahang in taangpi’ zat theih ding laibusaal anei zo khua le veng muh ding om nai lo mai hi. – Biakna Pawlpite zong laibusaal anei a om sam hangin mipi’ zat theih zuahzuah dingin kihong zo lo, mipi kihuup zo lo suak tadih lai hi. – Laibusaal om sunsunte panin laibu hoihte pen mimal in kawmin pia kik nawn lo, gu simin ama’ mimal neihsa suaksak zel uh hi. – Taangpi lungsim sangin mimal aituam vai ciang bek tawh kibuaibuai lai ahih manin laibusaal zong taangpi huamin akinei zo lo ahi hi. – Laisim minam ih kicih ngam lian nailoh hangin lai akin mawh lo minam hi hang, kici thei hi.

2. Zomite laigelh minam ih kici ngam diam?
– Laigelh minam hi hang, kici thei ding hi. Beh laibute, Biakna laibute leh atuamtuam laibu Zolai tawh kigelhte en leng miphazah tawh tehna-in lai kigelh gawp hi, cih theih hi. – Laigelh mite’ thalawp nading leh Zomi laigelhte’ nuntak nadingin mipi’ lam pan laibu lei ding leh thapiak kisam mahmah lai hi. – Khangnote leh mipite’ thalawp theih nading laibu nam kisam mahmah lai hi. Biakna thu bek hi loin khangno le naupangte’ sim theih ding zong kigelh zo lai leh hoih ding hi. – Laigelhte thapiak theih nadingin ZCLS makaihna nuai ah ZOMI ACADEMY OF LETTERS cih bang dan unit khat om hen la, tehna (Criteria) kician bawlin kumsim ‘Article of the Year,’ ‘Book of the Year,’ cih pahtawina laipi le sum cihtaak pian sim khat kipia zo den leh Zomi laigelh siam tampi kibehlap tuam ding hi. – Printing Press leh Offset anei zo Pawlpi khawng om leng lai lam nasepna kimazang tuam ding hi. Tedim ah Riso ciang bek kinei a, A3 nangawn akikhen thei nai lo suak hi.

3. Bang hangin Zomite laisim zo lo ih hi tam?
– Lai uk lo, lai thupitna thei lo, thadah… – Lai sim ding pen nasep aneilo mite’ hih ding bek sa.

4. Bang hangin lai uk lo, lai thupitna thei lo, thadah ihi tam?
– Nu le paten tate pantah lo, biakna makaiten mipite hanthawn zo lo, hausa upaten khua le tuite laisim dingin makaih kha lo, mipi’ nuntak haksa lua, kumpi ki-ukna in ahi ci ding ciang mah a hong koih…

5. Bang cih ding?
– Biakna makaite, nu le pate, hausa upate mahmah in laisim thupitna thei-in laisim hong zongsang photphot le uh mipi hong lawh lel ding uh hi. Kumpi in zong laibusaal leh media nasepna pen tha pia mahmah ta hi. – Zawn man hi lo a, theih loh man ahih manin laisim kipanin zongsang photphot leng laisim minamte ih suak ding hi.

6. Bang hangin taangpi’ laibusaal pen khuakim leh vengkim ah nei zo lo ih hi tam?
– Kin belin nei kha lo, inn sap zo lo, laibusaal ngak ding cial zo lo, bizu/laibu lei zo lo… Hih pen paulap leh ngaihsut khialhna khat hi, ci-in kimu hi. Bang hangin maw? – Inn sap sese loin mi inn khat peuh ah bizu khat tawh piang thei a, a innteekte pen laibusaal ngak hi pah thei lel hi. Khuakim vengkim ah tua bang a zat theih ding mi muanhuai khat le nih beek om sam ding hi.

7. Tedim khuapi sungah e leh taangpi laibusaal bangzah a om tam?
– DIIMTUI Laibusaal leh TYF Laibusaal om ngei hi. Ahi zongin tunai lam ciangin akihon loh sawt pian hi. – Biakna Pawlpite anei a om sam hangin bizu sungah kikalh cip a, mipite in sim ngeilo zaw uh hi. Mipi atam theithei in a zat theih ding leh a minthang news/journal-te kikoih zo den leh. – Lai Siangtho sang leh zum pawlkhat in bel amau’ zat ding khop tek nei uh a, ahi zongin taangpi taangtate in a zat theih ding uh laibusaal kisam mahmah lai hi.

Tedim Post